Read Biblia Revisión Chuya Qellqa 1992 – Chuya Qellqa 1992 Juan 1 Bible Online

Juan 1 - Biblia Revisión Chuya Qellqa 1992 – Chuya Qellqa 1992 bible

Juan 1

¹Tukuy imapa qallariyninpiqa Simiqa karqañam, chay Simiqa Dioswanmi karqa, chay Simiqa Diosmi.

²Paymi tukuy imapa qallariyninpi Dioswan karqa.

³Paynintakamam tukuy imapas unanchasqa karqa, mana paywanqa manam imapas unanchasqachu karqa.

⁴Kawsaymi paypi karqa, chay kawsaymi llapa runakunapaq achkiy karqa.

⁵Kay achkiymi tutayaypi kancharirqa, tutayaypas manam wañuchiyta atirqachu.

⁶Diosmi huk runata kachamurqa, sutinmi karqa Juan.

⁷Paymi chay achkiymanta willakunanpaq testigo hina hamurqa, chaynapi Juannintakama lliw runakuna creenankupaq.

⁸Juanqa manam chay achkiychu karqa, aswanqa chay achkiymanta willakunanpaq kachamusqallam.

⁹Llapa runakunata kanchariq cheqap achkiymi kay pachaman hamurqa.

¹⁰Kay pachapim karqa, kay pachapas paynintakama unanchasqam karqa, runakunam ichaqa mana reqsirqakuchu.

¹¹Paypa kaqmanmi hamurqa, paypa kaqkunam ichaqa mana chaskirqakuchu.

¹²Haykam payta chaskispa iñiqninkunamanmi ichaqa atiyta qorqa Diospa churinña kanankupaq.

¹³Paykunaqa manam nacerqaku yawarmantachu, manataqmi aychaman hinachu, nitaqmi runapa munasqanman hinachu, aswanqa Diosmantam.

¹⁴Chay Simim runayaruspan ñoqanchikwan yacharqa. Atiynintapas rikurqanchikmi, chay atiytam sapallan Churin kasqanrayku Taytamanta chaskirqa, payqa kuyakuywan hinaspa cheqap kaywan huntarisqam karqa.

¹⁵Juanmi paymanta willakuspan nirqa: Paymantam nirqani: “Qepay hamuqqa ñoqamantaqa atiyniyuqmi, payqa manaraqpas nacechkaptiyqa karqañam”, nispay.

¹⁶Paypa tukuy kapuqninmantam chani-chaninta mana imallapaq chaskinchik.

¹⁷Leyqa Moisesnintakamam qomusqa karqa, kuyakuywan cheqap kaqmi ichaqa Jesucristontakama hamuwarqanchik.

¹⁸Diostaqa manam pipas rikurqachu, aswanqa sapallan Churinmi Dios kasqanrayku hinaspa Taytanwan huklla kasqanrayku, imaynam Dios kasqanta reqsichiwarqanchik, nispa.

¹⁹Kaynatam Juan willakurqa, Judiokunapa kamachiqninkunam Jerusalenmanta sacerdotekunata hinaspa levitakunata kacharqaku: ¿Pitaq kanki? nispa Juanta tapumunankupaq.

²⁰Chaymi Juanñataq mana llullakuspa willakurqa: Manam ñoqachu Cristoqa kani, nispa.

²¹ Hinaptinmi tapurqaku: Chaynaqa, ¿pitaq kanki? ¿icha profeta Eliaschu? nispanku. Juanñataqmi nirqa: Manam ñoqaqa Eliaschu kani, nispa. Chaymi paykunañataq kaqllamanta tapurqaku: ¿Icha qamchu Diospa kachamusqan profeta kachkanki? nispanku. Juanñataqmi nirqa: Manam paychu kani, nispa.

²²Hinaptinmi nirqaku: Chaynaqa, ¿pitaq kanki? Kachamuwaqniykumanmi willanayku. ¿Pim kasqaykitataq niwankikuman? nispanku.

²³Chaymi Juan nirqa: Ñoqaqa kani profeta Isaiaspa nisqanpi hina: “Señorpa hamunan ñanta derechaychik” nispa purunpi qayakuqmi.

²⁴Juanta tapumunankupaq riqkunaqa fariseokunam karqaku.

²⁵Paykunam musoqmanta tapuspa nirqaku: Mana Cristopas, ni Eliaspas, nitaq profetapas kachkaspaykiqa ¿imanasqataq bautizankiqa? nispanku.

²⁶Juanñataqmi nirqa: Ñoqaqa yakullawanmi bautizani, ichaqa qamkuna ukupim kachkan mana reqsisqaykichik.

²⁷Paymi qepay hamuqqa. Paypataqa manam usutanpa watullantapas paskanaypaq hinachu kani, nispan.

²⁸Chaykunaqa pasakurqa Jordán mayupa waklawnin [1]Betábara lawpim, chaypim Juan bautizachkarqa.

²⁹Juanmi paqarinnintin punchaw rikururqa Jesusta paypa lawman hamuchkaqta, hinaspanmi nirqa: Qawaychik, paymi llapa runakunapa huchanta mayllaq Diospa [2]Corderonqa.

³⁰Paymantam nirqani: “Qepay hamuqqa ñoqamantapas ñawpaq kaqraqmi, payqa manaraqpas kachkaptiymi karqaña”, nispay.

³¹Manam ñoqapas reqsirqanichu, ichaqa yakuwanmi bautizarqani, chaynapi Israel runakuna reqsinankupaq, nispa.

³²Juanqa nirqataqmi: Ñoqam rikurqani Chuya Espíritu hanaq pachamanta paloma hina uraykamuspa Jesuspa hawanman tiyaykuqta.

³³Manam paytaqa reqsirqanichu, ichaqa yakupi bautizanaypaq kachamuwaqniymi niwarqa: “Pimanmi Chuya Espíritu uraykamuspa hawanman tiyaykuqta rikusqaykim Chuya Espirituwan bautizaqqa”, nispa.

³⁴Kunanqa rikuykuniñam, chayraykum Diospa Churin kasqanta willakuni, nispa.

³⁵Paqarinnintin punchawmi Bautizaq Juanqa huktawan maymi kasqanpi, iskay discipulonkunawan kachkarqa.

³⁶Hinaspanmi chayninta Jesús pasachkaqta rikuruspan nirqa: “Qawaychik, paymi Diospa Corderonqa”, nispa.

³⁷Chaymi Juanpa iskay discipulonkuna chayta uyariykuspanku Jesusta qatikurqaku.

³⁸Jesusñataqmi muyuriykuspan, paykuna qatimusqanta qawarispan kaynata nirqa: ¿Imatataq maskachkankichik? nispa. Paykunañataqmi nirqaku: Yachachikuq ¿maypitaq yachanki? nispanku.

³⁹Hinaptinmi Jesusñataq nirqa: Hakuchik qawamunaykichikpaq, nispa. Chaymi rispanku Jesuspa maypim yachasqanta qawamurqaku, hinaspankum tawa hora tardeykuyña kasqanrayku paywan chay punchaw qeparqaku.

⁴⁰Simón Pedropa wawqen Andresmi karqa Juanpa nisqanta uyariykuspa Jesusta qatikuqkunapa huknin.

⁴¹Paymi puntata wawqen Simonta tariykurqa, hinaspanmi nirqa: Mesiastam tariramuniku, nispa. (Mesiasqa Cristo ninanmi)

⁴²Hinaspanmi Andresqa wawqen Simonta Jesuspa kasqanman pusarqa. Jesusñataqmi Simonta rikuykuspan nirqa: Qamqa Juanpa churin Simonmi kanki, kunanmantaqa Cefasñam sutiki kanqa, nispa. (Cefasqa Pedro ninanmi)

⁴³Jesusmi paqarinnintinta Galilea lawman rinanpaq kachkaspa Felipewan tuparurqa, hinaspam nirqa: Qatiway, nispan.

⁴⁴Felipeqa karqa Betsaida llaqtayuqmi, hina chay llaqtayuqtaqmi karqaku Andreswan Pedropas.

⁴⁵Felipem Natanaelta tariruspan nirqa: Tariramunikum huk runata, paymantam Moisespas chaynataq profetakunapas qellqarqa. Payqa Joseypa churin Nazaret llaqtayuq Jesusmi, nispa.

⁴⁶Chaymi Natanael nirqa: ¿Yaqachu Nazaret llaqtamanta ima allinpas lloqsiramunman? nispa. Hinaptinmi Felipeñataq nirqa: Hakuchik qawamunaykipaq, nispa.

⁴⁷Jesusñataqmi Natanaelta rikuruspan nirqa: Kay hamuq runaqa cheqap israelitam, paypiqa manam ima engañopas kanchu, nispa.

⁴⁸Chaymi Natanaelñataq tapurqa: ¿Maypitaq reqsinakurqanchik? nispa. Jesusñataqmi nirqa: Manaraqpas Felipe willasuchkaptikim higos sachapa sikinpi kachkaqta rikurqayki, nispa.

⁴⁹Chaymi Natanaelñataq nirqa: Yachachikuq, qamqa Diospa Churinmi kanki, Israel runakunapa reyninmi kanki, nispa.

⁵⁰Jesusñataqmi nirqa: ¿Higospa sikinpim rikurqayki nisqayraykuchu creerunki? Chaymantapas aswan mas hatun kaqkunataraqmi rikunki.

⁵¹Cheqaptapunim nikichik: Kunanmantam rikunkichik hanaq pachata kicharayachkaqta hinaspa Diospa angelninkuna runapa Churinpa hawanman uraykamuspa wicharichkaqta, nispa.