Read Biblia Revisión Chuya Qellqa 1992 – Chuya Qellqa 1992 Juan 11 Bible Online

Juan 11 - Biblia Revisión Chuya Qellqa 1992 – Chuya Qellqa 1992 bible

Juan 11

¹Betania llaqtayuq Lázaro sutiyuq runam onqochkarqa, payqa yacharqa panin Mariawan hinaspa panin Martawanmi.

²Huk kutipim onqoq Lazaropa panin María, Señor Jesuspa chakinman perfumeta talliykurqa, hinaspam chukchanwan chakichirqa.

³Lazaropa paninkunam Señor Jesusman willachiq kacharqaku: Señorlláy, amistadniki Lazarom onqochkan, nispanku.

⁴Jesusñataqmi chayta uyariruspan nirqa: Chay onqoyqa manam wañuy onqoychu, aswanqa Dios hatunchasqa kananpaqmi chaynataq Diospa Churinpas hatunchasqa kananpaqmi, nispa.

⁵Jesusqa llumpaytam kuyarqa Lazarota, Martata chaynataq ñañantapas.

⁶Chaymi “Lazaropa onqosqanmanta” uyariykuspan iskay punchawtawanraq qeparurqa.

⁷Chaymantañam discipulonkunata nirqa: Hakuchik Judea lawman kutisun, nispa.

⁸Discipulonkunañataqmi nirqaku: Yachachikuq, qayninpallataq llapa judiokunaqa rumiwan wañurachiyta munasurqanki ¿chaychu kutiytaraq munachkanki? nispanku.

⁹Jesusñataqmi nirqa: ¿Punchawqa manachu chunka iskaynin horayuq? Pipas punchawpi purispaqa manam mitkanchu kay pachapi achkiywan qawakusqanrayku.

¹⁰Tuta puriqmi ichaqa mitkan tutayaypi kasqanrayku.

¹¹Chaymantam Jesús nirqa: Amistadninchik Lazaroqa puñuchkanmi, risaqyá rikchachimunaypaq, nispa.

¹²Discipulonkunañataqmi nirqaku: Señorllayku, sichum puñuspallaqa sanoyanqachá, nispanku.

¹³Jesusqa chaynataqa nirqa Lazaropa wañukusqantañam, discipulonkunañataqmi puñuspa samasqallanmanta rimasqanta piensarqaku.

¹⁴Chaymi Jesusqa cheqaptapuni nirqa: Lazaroqa wañukunñam.

¹⁵Qamkunaraykum kusikuni mana chaypi kasqaymanta, chaynapi aswan mastaraq creenaykichikpaq. Hakuchikyá payman, nispa.

¹⁶Chaymi mellizowan sutichasqanku Tomasqa wakiqnin discipulomasinkunata nirqa: Hakuchik ñoqanchikpas Jesuswan kuska wañumunanchikpaq, nispan.

¹⁷Jesusmi chayaruspan tawa punchaw pampasqataña Lazarota tariykurqa.

¹⁸Betania llaqtaqa karqa Jerusalenmanta kimsa kilómetro hinallam.

¹⁹Chaymi achkaq judiokuna rirqaku Martapatawan Mariapata turinku wañukuptin llakisqa kasqankumanta consuelamunankupaq.

²⁰Martam Jesuspa hamusqanta yacharuspan tariparqa, Mariañataqmi wasipi qeparurqa.

²¹Martam Jesusta nirqa: Señorlláy, qam kaypi kaptikiqa turillayqa manachá wañunmanchu karqa.

²²Aswanqa yachanim, Diospa imam mañakusqayki qosunaykitaqa, nispa.

²³Jesusñataqmi nirqa: Turikiqa kawsarimunqam, nispa.

²⁴Chaymi Marta nirqa: Arí, tukupay punchawpi wañuqkunawan kawsarimunantaqa yachanim, nispa.

²⁵Jesusñataqmi nirqa: Ñoqam kani kawsarichiqpas chaynataq kawsay qokuqpas. Pipas ñoqapi iñiqqa wañuspapas kawsarimunqam.

²⁶Pipas kawsachkaspallanraq ñoqaman iñiqqa manam wiñaypaqchu wañunqa. ¿Marta creenkichu kayta? nispa.

²⁷Chaymi Martañataq nirqa: Arí Señorlláy, ñoqaqa creenim, qamqa kanki kay pachaman hamuq Diospa Churin Cristom, nispa.

²⁸Chaynata nispanmi Martaqa rirqa ñañan Mariata qayaq, paytam upallallamanta nirqa: Yachachikuqqa kaypiñam kachkan, qayasuchkankim, nispan.

²⁹Chaynata Marta niykuptinmi Mariañataq utqayman hatarispan Jesuspa kasqanman rirqa.

³⁰Jesusqa manaraqmi llaqtamanqa chayarqaraqchu, payqa Martawan tupaykusqan sitiollapiraqmi kachkarqa.

³¹Consuelaqnin judiokunañataqmi María chaylla hatariruspan lloqsiramuptin qatimurqaku: “Sepulturatachiki waqaq richkan”, nispanku.

³²Mariañataqmi Jesuspa kasqanman chayaruspan qonqorakuykurqa, hinaspam nirqa: Señorlláy, kaypi kaptikiqa turillayqa manachá wañunmanchu karqa, nispa.

³³Jesusñataqmi Mariapa waqasqantawan chaynataq hamuqmasin judiokunapa waqasqanta qawaykuspan sonqonpi sinchita llakirikurqa.

³⁴Chaymi tapurqa: ¿Maypitaq pamparurqankichik? nispa. Paykunañataqmi nirqaku: Señor, hakuchikyá qawaykamunki, nispanku.

³⁵Jesusmi waqarqa.

³⁶Judiokunañataqmi ninakurqaku: Qawaychik maynatam kuyasqa, nispanku.

³⁷Wakiqninñataqmi nirqaku: Payqa ñawsatapas qawarichiqmi, kaypi kaspaqa imallatapas ruwanmancha karqa Lázaro mana wañunanpaq, nispanku.

³⁸Jesusmi huktawan sinchita llakirikurqa, hinaspam sepulturaman asuykurqa, chayqa karqa machaymi, punkunpas karqa hatun rumiwan wichqasqam.

³⁹Jesusmi nirqa: Chay rumita hurqoychik, nispa. Hinaptinmi wañukuqpa panin Martañataq nirqa: Señorlláy, ñachá asnarichkanñapas, tawa punchawñam wañukusqanqa, nispa.

⁴⁰Jesusñataqmi nirqa: ¿Manachu nirqayki: “Creespaykiqa rikunkim Diospa atiyninta”, nispay?

⁴¹Tapasqanku rumita hurqoruptinkum Jesusqa hanaq pachata qawarispan nirqa: Taytáy, graciastam qoyki uyariykuwasqaykimanta.

⁴²Ñoqaqa yachanim chaylla uyariwaqniy kasqaykita, kaytaqa nichkayki muyuriqniypi runakuna kasqanraykum, chaynapi kachamuwasqaykita creenankupaq.

⁴³Chaynata nispanmi hatunmanta qaparispan nirqa: ¡Lázaro, lloqsimuy! nispa.

⁴⁴Hinaptinmi chay wañuqqa lloqsiramurqa, makin chakin watasqa hinaspa uyanpas telawan wankusqa. Jesusñataqmi nirqa: Purinanpaq paskaychik, nispa.

⁴⁵Mariawan riq achkaq judiokunañataqmi Lazarota kawsarirachisqanta qawaykuspanku Jesusman iñikuykurqaku.

⁴⁶Wakiqninñataqmi fariseokunaman Jesuspa imam ruwasqanta willamurqaku.

⁴⁷Hinaptinmi sacerdotekunapa kamachiqninkunawan fariseokuna cortepi huñunakurqaku, hinaspam nirqaku: ¿Imatataq ruwasun? Kay runaqa achkatañam milagrokunata ruwarun.

⁴⁸Ruwaqta hinalla saqeptinchikqa lliw runachá payman iñikurunqaku, hinaptinchá romanokuna hamuruspanku templonchiktawan nacionninchikta purmarachinqaku.

⁴⁹Paykuna ukupi Caifasmi karqa sumo sacerdote chay watapi, chaymi pay nirqa: Qamkunaqa manam imatapas yachankichikchu,

⁵⁰nitaqmi cuentatapas qokunkichikchu. Aswan allinqa kanman huk runalla nacionninchikpa rantinpi wañuyninmi, lliw nación puchukarunanmantaqa, nispa.

⁵¹Chaykunataqa Caifasqa rimarqa manam kikillanmantachu, chay watapi sumo sacerdote kasqanraykum Dios revelarqa, chaymi profetizarqa nacionpa rantinpi Jesuspa wañunanmanta.

⁵²Jesusqa wañunan karqa manam paykunapa rantillanpichu aswanqa Diospa cheqesqa churinkunata hukllaman huñunanpaqwanmi.

⁵³Chay punchawmantam judiokunapa kamachiqninkuna tanteanakurqaku Jesusta wañurachinankupaq.

⁵⁴Chaynapim Jesusqa judiokunamanta pakakuspallaña purirqa. Judeamanta lloqsispanmi chunniqpa hichpan Efraín sutiyuq llaqtaman rirqa, chaypim discipulonkunawan qeparqa.

⁵⁵Judiokunapa Pascua fiestanmi hichpamuchkarqaña, chaymi llapa runakuna tukuy hinastin llaqtakunamanta manaraq Pascua fiesta chayamuchkaptin Jerusalenman rirqaku chuyanchakuq.

⁵⁶Jesusta maskaspankum temploman chayaruspanku tapunakurqaku: ¿Imaninkichiktaq? ¿Hamunqachu fiestaman icha manachu? nispanku.

⁵⁷Sacerdotekunapa kamachiqninkunawan fariseokunam kamachirqaku: Pipas Jesuspa maypim kasqanta yachaspankuqa willakamuchunkuyá presochamunaykupaq, nispanku.