Read Biblia Revisión Chuya Qellqa 1992 – Chuya Qellqa 1992 Juan 16 Bible Online

Juan 16 - Biblia Revisión Chuya Qellqa 1992 – Chuya Qellqa 1992 bible

Juan 16

¹Tukuy kaykunatam nikichik iñiynikichikpi mana hukmanyanaykichikpaq.

²Sinagogakunamantam qarqosunkichik, hamuchkanmi wañuchisunaykichik punchawkuna, chayta ruwaspankum “Diostam servichkani”, ninqaku.

³Kaykunataqa ruwanqaku Taytatawan ñoqata mana reqsiwasqankuraykum.

⁴Kaykunataqa nikichik chay tiempokuna chayamuptin kay nisqaykunata yuyarinaykichikpaqmi. Qamkunawan kasqayraykum kaykunataqa mana qallariyninmantaqa willarqaykichikchu.

⁵Kunanmi ichaqa kachamuwaqniypa kasqanman richkani. Ichaqa manam mayqannikichikpas tapuwankichikchu: “¿Maytataq richkanki?” nispaqa.

⁶Aswanraqmi qamkunaqa kay nisqaywan sinchi llakisqa kachkankichik.

⁷Cheqaptam nikichik: Qamkunapaqqa allinpunim ñoqapa riyniyqa, mana riptiyqa manachá qamkunapa kallpanchasuqnikichikpas hamunmanchu, rispaymi ichaqa kachamusqaykichik.

⁸Pay hamuspanmi runakunata reqsichinqa huchayuq kasqankumanta, Diospa kuyakuyninmanta hinaspa juicio punchawmanta,

⁹huchayuq kasqankutaqa reqsichinqa ñoqapi mana iñisqankuraykum,

¹⁰Diospa kuyakuyninmantaqa reqsichinqa, Taytaman kutikuptiy manaña rikuwasqaykichikraykum,

¹¹juiciomantañataqmi reqsichinqa, kay pachallapi kamachikuqqa juzgasqaña kasqanmanta.

¹²Achkaraqmi qamkunaman ninay kachkan, ichaqa manaraqmi entiendewaqchikchu.

¹³Cheqap Espíritu hamuspanñam pusasunkichik tukuy imapas cheqap kaqkunaman, payqa manam kikillanmantachu rimanqa, aswanqa llapa imapas uyarisqanmantam; hinaspam willasunkichik hamuq punchawkunapi imakunam pasakunanmanta.

¹⁴Payqa atiyniytam qawachinqa, ñoqamanta chaskisqantam qamkunaman willasunkichik.

¹⁵Taytapa kaqkunaqa ñoqapam, chayraykum nirqaykichik: “Espirituqa ñoqamanta chaskisqantam qamkunaman willasunkichik, nispay”.

¹⁶Asllamantaqa manam rikuwankichikñachu, chaymanta qepamanmi ichaqa kaqllamanta rikuwankichik, nispa.

¹⁷Chaynata niptinmi wakin discipulonkuna tapunakurqaku: ¿Imanichkantaq: “Asllamantaqa manam rikuwankichikñachu, chaymanta qepamanmi ichaqa kaqllamanta rikuwankichik, ñoqaqa Taytapa kasqanmanmi richkani”, nispaqa?

¹⁸¿Ima ninantataq nichkan “asllamantaqa manam rikuwankichikñachu” nispaqa? Manam chaytaqa entiendenchikchu, nispanku.

¹⁹Jesusñataqmi tapuy munasqankuta musyaruspan nirqa: Nirqaykichikmi qamkunataqa “asllamantaqa manam rikuwankichikñachu, chaymanta qepamanmi ichaqa kaqllamanta rikuwankichik”, nispay.

²⁰Cheqaptapunim nikichik, qamkunam waqaspa llakikunkichik, hinaptinmi runakunañataq kusikunqaku. Ichaqa qamkuna llakipi kaptikichikpas, chay llakikuynikichikmi kusikuyman tikrasqa kanqa.

²¹Warmiqa wachakunan tiempo chayaramuptinmi nanaywan tarikun; wawan naceramuptinñataqmi nanayninkunatapas qonqarun, kay pachapi wawan nacerusqanraykum payqa kusikun.

²²Chaynam qamkunapas kunan llakisqa kachkankichik, ñoqa kutimuptiymi ichaqa kusisqa kankichik, chay kusikuytaqa manam pipas qechusunkichikchu.

²³Chay punchawpiqa manañam imamantapas tapuwankichikchu. Cheqaptapunim nikichik, sutiypi mañakuptikichikqa Taytaqa qosunkichikmi.

²⁴Kunankamam sutiypiqa manaraq imatapas mañakurqankichikchu. Mañakuychikyá hinaspaqa chaskinkichikmi, chaynapim kusikuynikichik qespisqa kanqa.

²⁵Kaykunatam rikchanachiykunawan nirqaykichik, hamuq punchawpiqa manañam rikchanachiykunawanñachu rimapayasqaykichik, aswanqa imam kaqtañam Taytaymanta rimapayasqaykichik.

²⁶Chay punchawmi ñoqapa sutiypi Taytata mañakunkichik, manam ñoqañachu Taytataqa mañapusqaykichik.

²⁷Taytayqa kuyasunkichikmi ñoqata kuyawasqaykichikrayku, qamkunaqa creerqankichikmi Diosmanta hamusqayta.

²⁸Taytapa kasqanmantam kay pachaman hamurqani, kunanñataqmi kay pachata saqespay Taytayman kutisaq, nispa.

²⁹Discipulonkunañataqmi nirqaku: Kunanqa sutillatañam rimachkanki, manam rikchanachiykunawanñachu.

³⁰Kunanqa yachanikuñam tukuy ima yachaq kasqaykita, manam necesarioñachu pipapas tapusunaykiqa, chayraykum Diosmanta hamusqaykita creeniku, nispanku.

³¹Jesusñataqmi nirqa: ¿Ñachu kunanqa creerunkichikña?

³²Ñam hora chayaramunña, sapakamam cheqerunkichik hinaspam sapallaytaña saqeruwankichik. Ichaqa manam sapallaychu kachkani, Taytaymi ñoqawanqa kachkan.

³³Kaykunataqa nikichik hawkayayta ñoqapi tarinaykichikpaqmi. Kay pachapiqa ñakarinkichikmi, ichaqa kallpanchakuychikyá, kay pachapi mana allinkunataqa venceruniñam, nispa.