Read Biblia Revisión Chuya Qellqa 1992 – Chuya Qellqa 1992 Juan 17 Bible Online

Juan 17 - Biblia Revisión Chuya Qellqa 1992 – Chuya Qellqa 1992 bible

Juan 17

¹Jesusmi chaykunata niruspan hanaq pachata qawarispan nirqa: Taytáy, ñam hora chayaramunña. Churikitaqa hatunchawayñayá chaynapi qamtapas kay Churiki hatunchasunaykipaq.

²Qanmi atiyta qowarqanki llapallan runapi munaychakunaypaq, chaynapi qowasqayki llapallan runakunaman wiñay kawsayta qonaypaq.

³Wiñay kawsayqa kaymi: Sapallan cheqap Dios kasqaykita hinaspa kachamusqayki Jesucristota reqsiymi.

⁴Ñoqam kay pachapi hatuncharqayki, kamachiwasqayki ruwaytapas ñam tukuruniña.

⁵Taytáy, kunanyá ñawpaqnikipi hatunchaway, chayna hatunchasqam karqani manaraqpas kay pacha kachkaptin.

⁶Kay pachamanta qowasqayki runakunamanqa ñam willaniña pim kasqaykita. Paykunaqa qampam karqa chaymi qowarqanki, paykunaqa palabraykitam kasukunku.

⁷Kunanqa yachankuñam tukuy ima qowasqaykiqa qampa kasqanta.

⁸Qowasqayki palabraykitaqa willaruniñam paykunaqa ñam chaskirunkuña. Yachankutaqmi cheqaptapuni qanmanta hamusqayta, hinaspam creenku qampuni kachamuwasqaykita.

⁹Ñoqaqa paykunapaqmi ruegakuyki, manam kay pachapi wakin runakunapaqwanchu, aswanqa qowasqallaykipaqmi, paykunaqa qampam.

¹⁰Tukuy ima kapuqniyqa qampam, qampa kaqñataqmi ñoqapa, tukuy chaykunapim ñoqaqa hatunchasqa kani.

¹¹Manañam kay pachapiñachu kasaq, paykunam ichaqa kay pachapiraq kanqaku, ñoqam ichaqa hamuchkaniña qanwan kuska kanaypaq. Chuya Taytáy, qowasqaykikunataqa atiynikiwanyá waqaychaykuy chaynapi ñoqanchik hina huklla kanankupaq.

¹²Paykunawan kay pachapiraq kaspayqa atiyniyuq sutikipim nanachikurqani, qowasqaykikunataqa allintam waqaycharqani, manam mayqanllanpas chinkarqachu, ichaqa chinkananpaq kaq runallam, chaynapi Qellqapa nisqan cumplikunanpaq.

¹³Kunanqa qampa kasqaykimanmi hamuchkaniña. Kay pachapiraqmi nichkani kaykunataqa ñoqapa kusikuyniywan huntasqa kanankupaq.

¹⁴Ñoqam palabraykita willarqani, chaymi runakunañataq cheqninku, paykunaqa manam kay pachapaqchu kanku, ñoqapas manataqmi kay pachapi kaqchu kani.

¹⁵Mañakuykiqa manam kay pachamanta hurqonaykipaqchu aswanqa diablomanta waqaychanaykipaqmi.

¹⁶Ñoqaqa manam kay pachapaqchu kani, paykunapas manataqmi kay pachapaqchu kanku.

¹⁷Cheqap kaynikiwanyá chuyanchay, palabraykiqa cheqapmi.

¹⁸Imaynam ñoqata kachamuwarqanki kay pachapi kaq runakunaman, chaynataqmi paykunatapas kay pachapi kaq runakunaman kachani.

¹⁹Paykunaraykum kikiypuni chuyanchakuni, chaynapi paykunapas cheqap palabraykiwan chuyanchakunankupaq.

²⁰Manataqmi ñoqaqa paykunallapaqchu mañakuyki, aswanqa paykuna ñoqamanta willakuptin iñiqkunapaqwanmi.

²¹Taytáy, mañakuchkaykiqa paykuna huklla kanankupaqmi, imaynam qanwan huklla kasqanchikpi hinayá paykunapas huklla ñoqanchikwan kachunku, chaynapi qampa kachamuwasqaykita runakuna creenankupaq.

²²Hatunchawasqaykiman hinam ñoqapas paykunata hatuncharqani, chaynapi qanwan huklla kasqanchikpi hina paykunapas huklla kanankupaq.

²³Ñoqam paykunapi kachkani, qamñataqmi ñoqapi, chaynapi paykunaqa hukllaña kanankupaq, chaynapim runakuna yachanqaku qampuni kachamuwasqaykita, yachanqakutaqmi kuyawasqaykita hina paykuna kuyasqaykitapas.

²⁴Taytáy, qanmi qowarqanki paykunata chaymi munani paykunapas ñoqapa kasqaypi kanankuta, chaynapi hatunchawasqaykita qawanankupaq. Manaraqpas kay pacha unanchasqa kachkaptinmi qamqa kuyawarqankiña.

²⁵Chuya Taytáy, kay pachapi kaq runakunaqa manam reqsisunkichu, ñoqam ichaqa reqsiki, qowasqayki runakunapas yachantaqmi qam kachamuwasqaykitaqa.

²⁶Yachachirqanim pim kasqaykita, chaywanpas hinallaraqmi yachachisaq, chaynapi kuyawasqaykiman hina paykunapas kuyanakunankupaq chaynataq ñoqapas paykunapi kanaypaq, nispa.