Read Biblia Revisión Chuya Qellqa 1992 – Chuya Qellqa 1992 Juan 18 Bible Online

Juan 18 - Biblia Revisión Chuya Qellqa 1992 – Chuya Qellqa 1992 bible

Juan 18

¹Chaykunata niruspanmi discipulonkunawan Jesús lloqsirqa Cedrón wayqopa waklawninman. Chaypi kaq huertamanmi Jesús yaykurqa discipulonkunapiwan.

²Traicionaqnin Judaspas sumaqtam reqsirqa chay sitiotaqa, chaypiqa achka kutitam Jesusqa discipulonkunawan huñunakuq.

³Chaymanmi Judas chayaramurqa soldadokunawan hinaspa sacerdotekunapa kamachiqninkunapa hinaspa fariseokunapa kachasqan guardiakunawan. Paykunam antorchayuqkama, mecheroyuqkama hinaspa armayuqkama rirqaku.

⁴Jesusqa yacharqañam tukuy ima pasananta chaymi asuykuspa tapurqa: ¿Pitataq maskachkankichik? nispa.

⁵Paykunañataqmi nirqaku: Nazaretmanta kaq Jesustam, nispanku. Jesusñataqmi nirqa: Ñoqam kani, nispa. Traicionaqnin Judaspas paykunawanmi kachkarqa.

⁶“Ñoqam kani” nispa Jesús niptinmi runakunaqa qepaman suchurispanku pampaman wichiykurqaku.

⁷Jesusmi musoqmanta tapurqa: ¿Pitataq maskachkankichik? nispa. Paykunañataqmi nirqaku: Nazaretmanta kaq Jesustam, nispanku.

⁸Jesusñataqmi nirqa: Ñam nikichikña “Ñoqam kani” nispa. Ñoqata maskawaspaykichikqa paykunataqa saqeychik pasakunankupaq, nispa.

⁹Chaynapim cumplikurqa Jesuspa ñawpaq rimarisqan, paymi nirqa: “Taytapa qowasqankunataqa waqaycharqanim, manam mayqanninpas chinkarqachu” nispa.

¹⁰Simón Pedroñataqmi espadayuq kasqanrayku, hurqoykuspa Malco sutiyuq runapa alleq rinrinta qorururqa. Malcoqa karqa sumo sacerdotepa serviqninmi.

¹¹Jesusñataqmi Pedrota nirqa: Espadaykita vainanman kutiykachiy. ¿Ñakarinaypaq Taytaypa qowasqantaqa manachu chaskiyman? nispa.

¹²Llapa soldadokunam capitanninpiwan hinaspa judiokunamanta kaq guardiakunapiwan Jesusta hapiruspanku chaqnarurqaku.

¹³Hinaspam puntata pusarqaku Anaspa wasinman. Anasqa karqa Caifaspa suegronmi. Chay watapim Caifasqa karqa sumo sacerdote.

¹⁴Caifasqa puntataraqmi judiokunata nirqa: “Aswan allinqa kanman nacionninchikpa rantinpi huk runallapa wañuyninmi”, nispan.

¹⁵Simón Pedroñataqmi huknin discipulomasinwan Jesusta qatirqaku, chay discipuloqa karqa sumo sacerdotepa reqsisqanmi, chaymi Jesuswan kuska sumo sacerdotepa pationman yaykururqaku.

¹⁶Pedroñataqmi qeparurqa hawa law punkupa waqtallanpi, chaymi sumo sacerdotepa reqsisqan discípulo lloqsiramuspan punku nanachikuq warmita ruegakuspan Pedrota pusaykurqa.

¹⁷Punku nanachikuq criadañataqmi Pedrota nirqa: Qamqa kachkanki kay runapa huknin discipulonmi, nispa. Pedroñataqmi nirqa: Manam ñoqachu kani, nispa.

¹⁸Chirimuptinmi criadokunawan guardiakuna ninata sansarachispanku sayaspa qonikuchkarqaku, chaypitaqmi Pedropas paykunawan qonikuchkarqa.

¹⁹Sumo sacerdotem tapurqa Jesusta pikunam discipulonkuna kasqanmanta chaynataq imakunam yachachisqanmanta.

²⁰Jesusmi nirqa: Ñoqaqa llapa runapa qayllanpim rimarqani. Tukuy tiempom sinagogapi chaynataq llapa judiokunapa huñunakunan templopipas yachachirqani, ñoqaqa manam pakasqallapichu imatapas rimarqani.

²¹¿Imanasqataq ñoqata tapuwanki? Tapuyqa uyariqniykunatayá, paykunayá nichun imamantam rimasqaytapas. Paykunaqa yachankum imamantam rimasqaytapas, nispa.

²²Chaynata niptinmi, templo waqaychaq guardiakunamanta huknin kaqñataq, Jesusta uyanpi takaruspan nirqa: ¿Chaynatachu sumo sacerdoteta ninki? nispa.

²³Chaymi Jesusñataq nirqa: Mana allinta rimaruptiyqa niykuwayá imapim pantarusqayta. Sichum nisqay allin kaptinqa ¿imamantataq maqawankiqa? nispa.

²⁴Chaymantam Anasqa Jesusta hina chaqnasqallata sumo sacerdote Caifasman pusachirqa.

²⁵Pedroqa hinallam sayaspa ninapi qonikuchkarqa, hinaptinmi nirqaku: Qamqa kanki kay runapa huknin discipulonmi, nispanku. Pedroñataqmi negakuspan nirqa: Manam ñoqachu kani, nispa.

²⁶Chaymantam sumo sacerdotepa serviqnin tapurqa, chay sirvienteqa karqa Pedrowan rinrin kuchurachikuq runapa ayllunmi, paymi nirqa: ¿Manachum rikurqayki Jesuswan kuska huertapi kachkaqta? nispa.

²⁷Chaymi huktawan Pedro negakurqa, hinaptinmi chaylla utulu waqaramurqa.

²⁸Caifaspa wasinmantam Jesusta pusarqaku gobernador Pilatopa palacionman. Achikyaramuptinmi judiokunaqa manaña palaciomanqa yaykurqakuchu. Chayman yaykuspaqa manañam Pascua carnerotaqa mikuyta atinmankuñachu karqa.

²⁹Chaymi Pilato hawaman lloqsimuspa paykunata nirqa: ¿Imamantataq kay runata acusankichik? nispa.

³⁰Paykunañataqmi nirqaku: Allin runa kaptinqa manachá entregaykikumanchu, nispanku.

³¹Hinaptinmi Pilatoñataq nirqa: Pusaspaykichikyá juzgamuychik leynikichikman hina, nispa. Judiokunañataqmi nirqaku: Ñoqaykuqa pitapas wañuchinaykumantaqa prohibisqam kaniku, nispanku.

³²Chaynapim imaynam cruzpi wañunanmanta Jesuspa nisqan cumplikurqa.

³³Pilatom palacioman kutirispan Jesusta tapurqa: ¿Qamchu kachkanki judiokunapa reynin? nispa.

³⁴Chaymi Jesusñataq nirqa: ¿Kikillaykimantachu chayta niwachkanki icha pim ñoqamanta willasurqanki? nispa.

³⁵Pilatoñataqmi nirqa: ¿Judiochu ñoqaqa karqani? Llaqtamasikikunawan sacerdotekunapa kamachiqninkunam qamtaqa ñoqaman entregamuwachkanku ¿imatataq ruwarunki? nispa.

³⁶Jesusñataqmi nirqa: Munaychakuyniyqa manam kay pachamantachu, kay pachallamanta kaptinqa qatiwaqniykunachá judiokunawan peleanmanku mana entregasqa kanaypaq. Munaychakuyniyqa manam kay pachamantachu, nispa.

³⁷Hinaptinmi Pilato nirqa: Chaynaqa, ¿qamchu rey kachkanki? nispa. Jesusñataqmi nirqa: Qanmi rey kasqaytaqa nichkanki. Chaypaqmi ñoqaqa nacerqani, chaypaqtaqmi kay pachamanpas hamurqani, chaynapi cheqapmanta rimanaypaq. Cheqap kasukuqkunaqa nisqaykunatam uyarin, nispa.

³⁸Pilatom nirqa: ¿Imataq chay cheqapqa? nispa. Chaynata tapuruspanmi Pilatoqa huktawan lloqsimurqa hinaspam judiokunaman nirqa: Kay runapiqa manam imatapas tarinichu sentencianaypaq hinaqa.

³⁹Qamkunapa costumbrekichikman hinam Pascua fiestapi huk presota kacharini. Chaynaqa, ¿judiokunapa reynin kacharinayta munawaqchikchu? nispa.

⁴⁰Chaynata niptinmi llapallanku qaparirqaku: ¡Ama paytaqa kachariychu, Barrabasta kachariyqa! nispanku. Barrabasqa karqa suwa runam.