Read Biblia Revisión Chuya Qellqa 1992 – Chuya Qellqa 1992 Juan 19 Bible Online

Juan 19 - Biblia Revisión Chuya Qellqa 1992 – Chuya Qellqa 1992 bible

Juan 19

¹Chaynata niptinkum Jesusta Pilato azoterqa.

²Soldadokunañataqmi kichkamanta coronata simparuspanku Jesuspa umanman churarqaku, hinachirqakutaqmi puka grosella capawanpas.

³Asuykuspankum nirqaku: ¡Kawsachun Judiokunapa reynin! Chaynata nispankum uyanpi laqechurqaku.

⁴Pilatom musoqmanta lloqsimuspan nirqa: Jesustam hurqomuchkani, yachaychikyá, paypiqa manam imatapas tarinichu sentencianaypaq hinaqa, nispa.

⁵Jesusmi hawaman lloqsimurqa kichkamanta coronayuq hinaspa puka grosella capawan churasqa. Chaymi Pilato nirqa: ¡Kayqaya kay runaqa! nispan.

⁶Sacerdotekunapa jefenkunañataqmi guardiakunapiwan Jesusta rikuykuspanku qaparirqaku: ¡Chakatay, chakatay! nispanku. Pilatoñataqmi nirqa: ¡Qamkunayá chakatamuychik! Paypiqa manam imatapas tarinichu sentencianaypaq hinaqa, nispa.

⁷Judiokunañataqmi nirqaku: Kanmi ñoqaykupa leyniyku, chayman hinaqa wañunanmi yachakun “Diospa Churinmi kani” nisqanrayku, nispanku.

⁸Chay nisqankuta uyariruspanmi Pilatoqa astawanraq mancharikurqa.

⁹Palacioman kutichispanmi Jesusta tapurqa: ¿Maymantataq kanki? nispan. Jesusñataqmi mana imatapas rimarirqachu.

¹⁰Chaymi Pilato nirqa: ¿Manachu imatapas ninki? ¿Manachum yachanki kacharinaypaq otaq chakatanaypaqpas atiyniyuq kasqayta? nispan.

¹¹Jesusñataqmi nirqa: Sichum atiyta Dios mana qosuptikiqa manam imanawankimanchu. Chaynaqa, qampa makikiman ñoqata churamuqmi qanmantapas aswan huchayuqqa, nispa.

¹²Chayta uyariruspanmi Pilatoqa aswanraq munarqa kachaykuyta, chaymi judiokunañataq astawanraq qaparirqaku: Payta kachaykuspaqa manam rey Cesarpa amistadninchu kanki. Pipas reypaq hapikuqqa rey Cesarpa enemigonmi, nispanku.

¹³Chaynata niptinkum Jesusta hawaman pusachimuspan sentencianan cortepi Pilato tiyaykurqa. Chay sitiopa sutinmi karqa Empedrado, hebreopiñataq Gábata.

¹⁴Pascua fiestapaq huk punchawllaña faltachkaptinmi, yaqa chawpi punchawta judiokunata Pilato nirqa: Kayqaya reynikichikqa, nispan.

¹⁵Paykunañataqmi kaynata qaparirqaku: ¡Wañuchun, wañuchun! ¡Chakatay! nispanku. Pilatoñataqmi nirqa: ¿Reynikichiktachu chakatarusaq? nispan. Sacerdotekunapa kamachiqninkunañataqmi nirqaku: Rey Cesarllam reyniykuqa, manam hukqa kanchu, nispanku.

¹⁶Hinaptinmi Pilatoqa paykunaman entregaykurqa Jesusta chakatanankupaq, chaymi Jesusta pasachirqaku.

¹⁷Jesusmi lloqsirqa cruzninta hombrokuykuspa Calaverawan sutichasqanku sitioman, hebreopi sutinñataqmi Gólgota.

¹⁸Chaypim Jesusta chakatarqaku, kaylaw-waklaw waqtankunapipas iskay runakunatam chakatarqaku.

¹⁹Pilatom cruzpa umanpi qellqachirqa: “JUDIOKUNAPA REYNIN NAZARETMANTA KAQ JESÚS” niqta.

²⁰Chay letrerotam achkaq judiokuna leerqaku, Jesusta chakatasqanku sitioqa llaqtapa hichpallanpi kasqanrayku. Chay letrerotaqa qellqachirqa kimsa rimaypim: Hebreopi, latinpi hinaspa griegopi.

²¹Pilatotañataqmi sacerdotekunapa kamachiqninkuna nirqaku: Ama qellqaychu “judiokunapa Reyninmi” niqtaqa. Qellqaspaqa-qellqachiy: “Judiokunapa Reyninmi kani”, nispa niqta.

²²Pilatoñataqmi nirqa: Qellqasqayqa ñam qellqasqaña, nispa.

²³Jesusta chakataruspankum llapa soldadokuna capanta tawa parteman llikirurqaku sapa soldadopaq hukta. Jesuspaqa karqataqmi mana costurayuq tunicanpas, chaynaqa karqa hanaymanta urayman awasqa kasqanrayku.

²⁴Soldadokunam ninakurqaku: Ama llikispalla sortearusunchik mayqanninchikpaqpas kananpaq, nispanku. Chaynapim Qellqapa kayna nisqan cumplikurqa: “Pachaykunatam rakinakurqaku, pachaypaqmi suertetaraq choqarqaku”, nispa. Chaynatam soldadokuna ruwarqaku.

²⁵Cruzpa hichpanpim kachkarqa Jesuspa maman, kachkarqataqmi mamanpa ñañanpas, Cleofaspa warmin Mariapas chaynataq Magdala llaqtayuq Mariapas.

²⁶Jesusmi mamantawan kuyasqan discipulonta rikuruspan mamanta nirqa: Warmi, chayqaya wawayki, nispa.

²⁷Discipulontañataqmi nirqa: Chayqaya mamayki, nispa. Chay horamantam Jesuspa mamantaqa discipulonña wasinman pusarqa.

²⁸Kaykuna pasakuptinqa Jesusqa yacharqañam tukuy imapas cumplikusqanta, chaymi Qellqapa nisqan cumplikunanpaq nirqa: Yakunayaruwanmi, nispa.

²⁹Chaypim kachkarqa puyñupi vinagre, chaymi kaspipa puntanman esponjata wataykuspanku chayta vinagreman challpuykuspanku Jesusman haywarqaku.

³⁰Jesusñataqmi vinagreta malliykuspan nirqa: ¡Tukusqañam! nispa. Hinaspam umanta kumuykachispa espiritunta Taytanman entregaykuspa wañukurqa.

³¹Pascua fiestapaq huk punchawllaña faltachkaptin preparakusqankuraykum judiokuna mana munarqakuchu samana punchawpi wañusqakuna cruzpi hinalla kananta, samana punchawqa karqa hatun punchawmi. Chaymi Pilatota mañakurqaku chakatasqakunapa piernanta pakichimunanpaq hinaspa cuerponkuta uraykachimunanpaq.

³²Chaymi soldadokuna rispanku pakirqaku hukninpa piernankunata chaynataq iskay kaqpa piernankunatapas.

³³Jesusman asuykuspa qawaykuptinkum wañusqaña kachkasqa, chaymi paypa piernankunataqa manaña pakirqakuñachu.

³⁴Chaymi Jesuspa waqtanta huknin soldado lanzawan tuksirurqa, hinaptinmi yawarwan yaku pawaramurqa.

³⁵Tukuy kaykunata rikuqmi chaynata willakun, willakuyninqa cheqapmi; paypas yachanmi cheqap nisqantaqa, chaynapi qamkunapas creenaykichikpaq.

³⁶Tukuy kaykunaqa pasakurqa Qellqapa “manam pakisqachu tullunqa karqa” nisqan cumplikunanpaqmi.

³⁷Huklawpipas Qellqaqa nichkantaqmi: “Paykunaqa tuksirusqankutam rikunqaku”, nispa.

³⁸Kaykunapa qepantam Arimatea llaqtayuq José ruegakurqa Pilatota, Jesuspa cuerponta qonanpaq. Joseyqa Jesuspa discipulonmi karqa, ichaqa judiokunata manchakusqanraykum mana musyachikuspalla qatikurqa. Pilato autorizaykuptinmi Joseyqa Jesuspa cuerponta aparqa.

³⁹Jesuswan rimananpaq huk kutipi tutallan riq Nicodemopas yaqa pachak libra mirrawan áloes chaqrusqata aparikuspanmi rirqa.

⁴⁰Joseywan Nicodemom chay miski asnaqwan fino sabanasta chapurqaku hinaspam Jesuspa cuerponta wankururqaku, chaynataqa ruwarqaku wañuqkunata pampanankupaq judiokunapa costumbrenman hinam.

⁴¹Jesusta chakatasqanku sitiopim huerta karqa, chaypim manaraq pipapas pampakusqan musoq sepultura karqa.

⁴²Chaypim hichpalla kasqanrayku Jesuspa cuerponta pamparurqaku, chaynataqa ruwarqaku judiokunapa samananku punchaw hichpamusqanraykum.