Read Biblia Revisión Chuya Qellqa 1992 – Chuya Qellqa 1992 Juan 2 Bible Online

Juan 2 - Biblia Revisión Chuya Qellqa 1992 – Chuya Qellqa 1992 bible

Juan 2

¹Kimsa punchawmanmi, Galilea law Caná llaqtapi huk casamiento karqa. Jesuspa mamanpas chaypim karqa.

²Chay casamientomanqa Jesuswan discipulonkunapas invitasqam karqaku.

³Vino pisiruptinmi Jesusta maman nirqa: Vinom pisirun, nispa.

⁴Chaymi Jesusñataq nirqa: Warmi ¿imanasqataq kayta niwanki? Manaraqmi horay chayamunraqchu, nispa.

⁵Chaymi serviqkunata María nirqa: Jesuspa imam nisusqaykichikta ruwaychik, nispa.

⁶Chaypim rumimanta ruwasqa soqta urpukuna kachkarqa, chayna urpukunapim judiokuna yakuta waqaychaq chuyanchakunankupaq. Sapa urpumanmi yaqa qanchis chunka litro yaku huntaq.

⁷Chaymi serviqkunata Jesús nirqa: Kay urpukunaman yakuta hillpuychik, nispa. Hinaptinmi huntanankama hillpururqaku.

⁸Jesusñataqmi nirqa: Wisispa mayordomoman apaychik, nispa. Chaymi kamachisqanman hina aparqaku.

⁹Vinoyaruq yakuta mayordomo malliykuspanmi, maymantam hurqoramusqankuta mana yachasqanrayku (Chaytaqa yakuta hurqoq sirvientekunallam yacharqaku) noviota qayaykuspan nirqa:

¹⁰Llapa runakunaqa allinnin vinotam puntataqa servinku, qamyan kaqtañataqmi allinta tomaruptinkuña. Qamñataqmi qepapaqña allinnin vinota waqaychasqanki, nispa.

¹¹Kay punta kaq milagrotam Jesús ruwarqa Galilea law Caná llaqtapi. Chaywanmi atiyninta qawachikurqa, hinaptinmi discipulonkuna paypi creerqaku.

¹²Chaymantam mamanwan, wawqenkunawan hinaspa discipulonkunawan kuska Capernaúm llaqtaman rirqaku, chaypim as punchawkunalla kamurqaku.

¹³Judiokunapa Pascua fiestanku hichpamuptinmi, Jerusalenman Jesús rirqa.

¹⁴Hinaspanmi templopi tarirurqa torokuna, ovejakuna hinaspa palomakuna rantikuqkunata chaynataq qollqe cambiaqkunatapas, paykunam puestonkupi tiyachkasqaku.

¹⁵Chayta qawaykuspanmi Jesusñataq waskamanta latigota ruwakuykuspan templomanta lliwta qarqomurqa ovejakunatawan hinaspa torokunatawan kuskata. Qollqe cambiaq runakunapa qollqentapas talliruspanmi mesankutapas wikaparamurqa.

¹⁶Palomakuna rantikuqkunatañataqmi nirqa: ¡Kaykunata kaymanta hurqowaychik! ¡Taytaypa wasintaqa ama mercadota hinaqa ruwaychikchu! nispan.

¹⁷Hinaptinmi discipulonkuna yuyarirurqaku Qellqapa: “Temploykita kuyayniymi nina hinaraq sonqoypi ruparin”, nisqanta.

¹⁸Judiokunañataqmi nirqaku: ¿Kaykunata ruwachkaspaykiqa ima señaltataq qawachiwankiku? nispanku.

¹⁹Chaymi Jesusñataq nirqa: Kay templota tuñirachiychik, hinaptinmi kimsa punchawllapi huktawan hatarirachisaq, nispa.

²⁰Judiokunañataqmi nirqaku: Kay temploqa tawa chunka soqtayuq watapim ruwasqa karqa ¿hinaptinchu qamñataq kimsa punchawllapi hatarirachiwaq? nispanku.

²¹Templomanta rimaspanqa Jesusqa nichkarqa kikinpa cuerponmantam.

²²Chayraykum wañusqanmanta Jesús kawsarimuptin, chaynakuna nisqanta discipulonkuna yuyarirqaku, hinaspam Qellqapa nisqanpi chaynataq Jesuspa nisqankunapipas creerqaku.

²³Jesusmi Jerusalenpi kaspan Pascua fiestapi achkaq milagrokunata ruwarqa, chaymi achkallaña runakuna paypi iñirqaku.

²⁴Jesusmi ichaqa runakunata allinta reqsisqanrayku, mana mayqanninkupipas confiakurqachu.

²⁵Manataqmi pitapas necesitarqachu chay runakuna imaynam kasqanmanta willananpaqqa, kikin Jesusmi sapakamapa sonqonta allinta reqsirqa.