Read Biblia Revisión Chuya Qellqa 1992 – Chuya Qellqa 1992 Juan 21 Bible Online

Juan 21 - Biblia Revisión Chuya Qellqa 1992 – Chuya Qellqa 1992 bible

Juan 21

¹Kaykunapa qepantam Jesús huktawan rikurirqa discipulonkunaman Tiberias Qochapa patanpi; kaynatam rikurirqa:

²Simón Pedrowanmi kachkarqa mellizowan sutichasqa Tomás, Galilea law Caná llaqtayuq Natanael, Zebedeopa churinkuna hinaspa iskay discipulonkunapas.

³Simón Pedrom nirqa: Challwakuqyá risaq, nispa. Chaymi wakiqninpas nirqaku: Hakuchik ñoqaykupiwan, nispanku. Barcaman rispankum chay tutaqa mana imaniraqtapas challwarqakuchu.

⁴Achikyamuqtam Jesusqa qochapa patanpi sayachkarqa, discipulonkunañataqmi mana yacharqakuchu Jesús kasqanta.

⁵Jesusmi nirqa: Qarikuna ¿manachu challwa hapisqaykichik kan? nispa. Paykunañataqmi nirqaku: Manam kanchu, nispanku.

⁶Chaymi Jesús nirqa: Barcapa alleqnin lawman mallaykichikta wischuychik hinaspaqa hapinkichikmi. Nisqanta hina ruwaspankum mallatapas manaña chutayta atirqakuchu achkallaña challwa kasqanrayku.

⁷Jesuspa kuyasqan discipulonñataqmi Pedroman nirqa: Payqa Señormi, nispa. Simón Pedroñataqmi Señor kasqanta yacharuspan mana pachayuq kasqanrayku pachakuykuspan yakuman pawakuykurqa.

⁸Wakiqnin discipulonkunañataqmi barcawan yakupa patanman chayamurqaku challwata mallapi aysamuspanku, yakupa patanmanqa karqa yaqa huk cuadrallañam.

⁹Qochapa patanman chayaramuspankum nina sansata tarirurqaku, chaypa hawanpiñataq challwatawan tantata.

¹⁰Jesusmi nirqa: Challwa hapimusqaykichikta apamuychik, nispa.

¹¹Simón Pedrom barcaman yaykuspa qochapa patanman mallata chutamurqa hunta challwayuqta, chaymi karqa pachak pichqa chunka kimsayuq hatun challwakuna, achkallaña challwa kachkaspapas manam mallataqa llikirurqachu.

¹²Jesusmi nirqa: Hamuychik mikusunchik, nispa. Manataqmi mayqan discipulonpas atirqachu: “¿Qamqa pitaq kanki?” niyta. Yacharqakum payqa Señorpuni kasqanta.

¹³Jesusmi asuykuspa tantatawan challwata paykunaman qoykarirqa.

¹⁴Kaywanqa kimsakamañam Jesusqa discipulonkunaman rikurirqa wañusqanmanta kawsarimuspan.

¹⁵Mikuruptinkuñam Simón Pedrota Jesús tapurqa: Juanpa churin Simón ¿paykunamanta mastachu kuyawanki? nispa. Pedroñataqmi nirqa: Arí Señor, qanmi yachanki kuyasqayta, nispa. Chaymi Jesús nirqa: Chaynaqa, ovejaykunatayá michiy, nispa.

¹⁶Huktawanmi tapurqa: Juanpa churin Simón ¿kuyawankichu? nispa. Pedroñataqmi nirqa: Arí Señor, qanmi yachanki kuyasqayta, nispa. Chaymi Jesús nirqa: Chaynaqa, ovejaykunatayá nanachikuy, nispa.

¹⁷Kimsakamaña tapuspanmi nirqa: Juanpa churin Simón ¿kuyawankichum? nispa. Pedroñataqmi llakikururqa kimsa kutikamaña “Kuyawankichu” nispa tapusqanwan, chaymi nirqa: Señor, qamqa tukuy imatam yachanki, yachankim kuyasqaytapas. Chaymi Jesús nirqa: Chaynaqa, ovejaykunatayá michiy.

¹⁸Cheqaptapunim niki, mozoraq kaspaykiqa weqawnikita watakuykuspam munasqaykiman riq kanki, yuyaqña kaptikim ichaqa hukña watasunki rikraykita hoqariptiki hinaspam pusasunki mana riy munasqaykikunaman.

¹⁹Chaynata nispanmi Jesús entiendechirqa cruzpi wañuspa Pedroqa Diosta alabananmanta, paytam nirqa: Qatiway, nispa.

²⁰Pedrom qepanta qawarispan rikururqa Jesuspa kuyasqan discipulon qatimuchkaqta. Paymi Pascuapi cenaptinku waqtanpi kaspa tapurqa: “Señorlláy ¿mayqantaq traicionasunki?” nispa.

²¹Payta rikuruspanmi Jesusta Pedro tapurqa: Señor, paytaqa ¿imataq pasanqa? nispa.

²²Chaymi Jesusñataq nirqa: Munaptiyqa payqa kawsanmanmi kutimunaykamapas ¿imataq qamtaqa qokusunki? Qatiway, nispa.

²³Chaymi iñiqkuna ukupi noticia karqa: “Chay discipuloqa manas wañunqachu” nispanku. Jesusqa nichkarqa manam mana wañunanmantachu, payqa nirqa: “Munaptiyqa payqa kawsanmanmi kutimunaykamapas ¿imataq qamtaqa qokusunki?” nispam.

²⁴Hina kay discipulonmi kaykunata willakuchkan hinaspam qellqachkan. Chaymi yachanchik tukuy nisqanqa cheqap kasqanta.

²⁵Achkallañam kachkan Jesuspa tukuy ima ruwasqankunaqa, sichum sapakamamanta qellqaptinkuqa piensasqayman hinaqa manachá kay pachapas haypanmanchu llapa libro waqaychanapaqqa.