Read Biblia Revisión Chuya Qellqa 1992 – Chuya Qellqa 1992 Juan 7 Bible Online

Juan 7 - Biblia Revisión Chuya Qellqa 1992 – Chuya Qellqa 1992 bible

Juan 7

¹Chaykunapa qepantam Jesús purirqa tukuy Galilea lawkunapi. Judea lawkunapim ichaqa mana purirqachu, llapa judiokuna wañurachiyta munasqankurayku.

²Ichaqa judiokunapa Ramada fiestanku hichpamuptinmi,

³wawqenkuna nirqaku: Kaymanta lloqsispa Judea lawkunaman riy, chaynapi imam ruwasqaykikunata qawanankupaq.

⁴Reqsichikuyta munaspaqa, manam pipas pakasqallapiqa imatapas ruwanchu. Kaykunata ruwachkaspaykiqa lliw runakunawanyá reqsichikamuy, nispanku.

⁵Chaynataqa nirqaku Jesuspi mana creesqankuraykum.

⁶Chaymi Jesusñataq nirqa: Manaraqmi tiempoy chayamunraqchu, qamkunapaqmi ichaqa ima tiempopas allin.

⁷Qamkunataqa runakunapas manam cheqnisunkichikchu, ñoqatam ichaqa cheqniwanku tukuy mana allinkuna ruwasqankuta qawachisqayrayku.

⁸Qamkunallayá fiestamanqa riychik, ñoqaqa manam risaqchu, manaraqmi tiempoy chayamunraqchu, nispa.

⁹Chaynata nispanmi hina Galilea lawllapi qeparurqa.

¹⁰Wawqenkuna pasaptinkum Jesuspas fiestaman rirqa mana piwanpas rikuchikuspalla.

¹¹Judiokunañataqmi fiestapi maskaspanku ninakurqaku: ¿Maypitaq chay runaqa kachkan? nispanku.

¹²Anchatam Jesusmanta runakuna rimarqaku. Wakiqninmi nirqaku: Allin runam payqa, nispanku. Wakinñataqmi nirqaku: Manam payqa allinchu, runakunatam engañan, nispanku.

¹³Ichaqa manam pipas libretaqa rimarqachu judiokunata manchakusqankurayku.

¹⁴Chawpi fiesta kachkaptinñam temploman Jesús yaykuspan yachachiyta qallaykurqa.

¹⁵Chaymi judiokuna admirakuspa nirqaku: ¿Imaynataq kay runaqa tukuy imata yachan mana estudiachkaspaqa? nispanku.

¹⁶Hinaptinmi Jesusñataq nirqa: Kay yachachisqayqa manam ñoqapachu aswanqa kachamuwaqniypam.

¹⁷Pipas Diospa munasqanta ruway munaqqa yachanqam kay yachachisqayqa Diosmanta kasqanta otaq kikillaymanta rimasqaytapas.

¹⁸Pipas kikillanmanta rimaqqa kikin alabasqa kayllatam maskan, pipas kachamuqnin alabasqa kananta maskaqmi ichaqa cheqapta riman, paypiqa manam pantayqa kanchu.

¹⁹¿Manachum leytaqa Moisés qosurqankichik? Chaytaqa manam mayqannikichikpas cumplinkichikchu. Chaynaqa, ¿imanasqataq wañuchiwaypi richkankichik? nispa.

²⁰Chaymi runakunañataq nirqaku: Qamqa demonioyuqmi kanki. ¿Pitaq wañuchiyta munasuchkanki? nispanku.

²¹Jesusñataqmi nirqa: Huk milagrotam ruwarqani, chaywanmi admirasqallaña karqankichik.

²²Moisesmi kamachikuyta qosurqankichik qari-kaynikichikta señalachikunaykichikpaq. Kaykunaqa karqa ñawpaq taytaykichikmantaraqmi, manam Moisesllamantachu, chaymi samana punchaw kachkaptinpas runata señalankichik.

²³Moisespa kamachikuyninta cumplinaykichikrayku samana punchawpipas runata señalaspaykichikchu ¿ñoqapaqñataq huk onqoqta samana punchawpi sanoyarachisqanmanta piñakunkichik?

²⁴Amayá qawasqaykichikman hinallachu juzgaychikqa, aswanqa ama pimanpas sayapakuspayá allin arreglota ruwaychik, nispa.

²⁵Jerusalenpi yachaqkunamantam wakiqnin nirqaku: ¿Manachum payqa wañuchinankupaq maskasqanku runa?

²⁶Waqaya kunanqa lliwpa qawasqantaña rimachkan, maytaq pipas imatapas ninñachu. Kamachikuqkunapas Cristo kasqantachá yacharunkuña.

²⁷Ñoqanchikmi ichaqa yachanchik maylaw runam kasqantapas, Cristo hamuptinmi ichaqa maymantam kasqantapas mana yachasunchu, nispanku.

²⁸Chayraykum Jesusqa templopi yachachichkaspan qaparispan nirqa: Ñoqataqa reqsiwankichikmi, maylawmantam kasqaytapas yachankichikmi, ñoqaqa manam kikillaymantachu hamurqani, mana reqsisqaykichik kachamuwaqniymi ichaqa cheqap.

²⁹Ñoqam ichaqa paymanta hamusqayrayku reqsini. Paymi ñoqataqa kachamuwarqa.

³⁰Chaynakunata niptinmi presocharuyta munarqaku, ichaqa manaraq tiempon chayamusqanraykum mana presocharurqakuchu.

³¹Chaywanpas achka runakunam paypi iñirqaku, hinaspam nirqaku: ¿Yaqachu Cristo hamuspan paymanta aswan milagrokunataraq ruwanman? nispanku.

³²Llapa fariseokunam Jesusmanta runakunapa rimasqanta yacharuspanku sacerdotekunapa kamachiqninkunapiwan tanteanakuruspanku guardiakunata kacharqaku Jesusta presochamunankupaq.

³³Jesusñataqmi nirqa: Pisi tiempollañam qamkunawan kasaq, ñam kutikusaqña kachamuwaqniyman.

³⁴Maskawaspapas manam tariwankichikchu, ñoqapa kasqaymanqa manam chayayta atiwaqchikchu, nispa.

³⁵Hinaptinmi judiokuna kikinkupura tapunakurqaku: Mana tariy atinapaqqa ¿maymantaq kay runaqa rinqa? ¿Icha griegokunapa kasqanpi cheqesqa judiokunamanchu rinqa griegokunata yachachimunanpaq?

³⁶¿Ima ninantataq niwachkanchik: “Maskawaspapas manam tariwankichikchu, ñoqapa kasqaymanqa manam chayayta atiwaqchikchu”, nispaqa?

³⁷Fiestapa tukupaynin punchawqa hatun punchawmi karqa. Chaypim Jesús sayaykuspan kaynata qaparirqa: Pipas yakunayachikuqqa ñoqaman hamuspa tomachun.

³⁸Pipas ñoqapi iñiqmantaqa Qellqapa nisqanpi hinam ukunmanta kawsay qokuq mayu kallpanqa, nispa.

³⁹Chaywanqa nichkarqa haykam paypi iñiqkuna Chuya Espirituta chaskinanmantam. Chuya Espirituqa manaraqmi hamurqaraqchu, hanaq pachaman Jesús manaraq kutisqanrayku.

⁴⁰Runakunamantam Jesuspa rimasqanta uyarispanku wakiqnin nirqaku: Cheqaptapunim kay runaqa suyasqanchik profeta, nispanku.

⁴¹Wakiqninñataqmi nirqaku: Payqa Cristom, nispanku. Wakinñataqmi nirqaku: ¿Imaynataqsi Galileamanta Cristo hamunman?

⁴²¿Manachum Qellqaqa nichkan: “Davidpa mirayninmantam Cristoqa hamunqa, hinaspam Belén llaqtapi nacenqa”, nispan?

⁴³Chaynakunata nispankum Jesuspa causanpi llapa runakuna rakinakururqaku.

⁴⁴Wakiqninmi Jesusta presochayta munarqaku, ichaqa manam pipas almitirqachu.

⁴⁵Guardiakunam sacerdotekunapa kamachiqninkunapa chaynataq fariseokunapa kasqanman kutirurqaku, hinaptinmi paykunata tapurqaku: ¿Imanasqataq mana pusamurqankichikchu? nispanku.

⁴⁶Chaymi guardiakunañataq nirqaku: Manam pipas pay hinaqa rimarqachu, nispanku.

⁴⁷Fariseokunañataqmi nirqaku: ¿Qamkunapas engañarachikunkichikñachu?

⁴⁸¿Yaqachu fariseokunamanta hinaspa kamachikuqkunamanta mayqanninkupas chay runapi iñirqaku?

⁴⁹Kay runakunaqa Diospa leyninta mana yachasqankuraykum ñakasqa kachkanku, nispanku.

⁵⁰Fariseokunamanta kaq Nicodemom Jesuswan rimaq tutallan rirqa. Chay Nicodemom paykunata nirqa:

⁵¹Leyninchikman hinaqa manam pitapas cargochachwanchu, puntata imam nisqanta manaraq uyarichkaspaqa nitaq imam ruwasqanta manaraq yachachkaspaqa, nispa.

⁵²Chaymi paykunañataq nirqaku: ¿Qampas Galilea llaqtayuqchu kanki? Qellqata qatipaspayá yachay, Galilea lawmantaqa manam ima profetapas hatarirqachu, nispanku.

⁵³Chaymantam sapakama wasinkuman ripukurqaku.