Read Biblia Revisión Chuya Qellqa 1992 – Chuya Qellqa 1992 Hechos 1 Bible Online

Hechos 1 - Biblia Revisión Chuya Qellqa 1992 – Chuya Qellqa 1992 bible

Hechos 1

¹Teófilo, punta kaq libroypim qellqamurqayki qallarisqanmantapuni hanaq pachaman ripukunankama Jesuspa tukuy ima ruwasqanmantawan yachachisqanmanta. Manaraq ripukuchkaspam akllasqan apostolninkunata Chuya Espiritupa atiyninwan kamachirqa imam ruwanankumanta.

³Jesusmi kawsarimuspan tawa chunka punchawpuni rikurirqa apostolninkunaman hinaspam Diospa munaychakusqanmanta yachachirqa. Achka-achka kutipi sutillata rikurisqanraykum apostolkuna yacharqaku cheqaptapuni Jesuspa kawsarimusqanta.

⁴Lliw apostolninkunawan kachkaspanraqmi paykunata Jesús nirqa: Jerusalén llaqtamantaqa amaraqyá lloqsiychikraqchu, uyariwasqaykichikman hinayá Taytaypa promesan cumplikunanta suyaychik.

⁵Cheqaptam Juanqa yakuwan bautizarqa, ichaqa kay-kay punchawkunallapim Chuya Espirituwan bautizasqa kankichik.

⁶Huñunasqa kachkaptinkum apostolninkuna Jesusta tapurqaku: Señorllayku ¿kunanpunichu Israel nacionta musoqmanta hatarichinki? nispanku.

⁷Paymi nirqa: Manam yachanaykichikchu imay tiempom otaq ima punchawmi kaykuna kanantaqa, Dios Taytallam atiyniyuq chay tiempota akllananpaqqa.

⁸Ichaqa Chuya Espíritu qamkunaman hamuptinmi atiyta chaskinkichik. Chaymi ñoqamanta willakunkichik Jerusalén llaqtapi, lliw Judea lawpi, Samaria lawpi hinaspa kay pachapa patankunakama.

⁹Kaykunata niruptinñataqmi apostolninkuna qawachkaptinku Jesusqa hanaq pachaman hoqarisqa karqa. Puyu ukuman Jesús chinkaykuptinmi apostolninkunaqa manaña rikurqakuchu.

¹⁰Cieloman hoqarikusqanta qawachkaptinkuñataqmi paykunapa hichpanpi yuraq pachayuq iskay runakuna rikuriykurqa,

¹¹hinaspa paykunata nirqaku: Galileamanta kaq runakuna ¿imanasqataq cielota qawachkankichik? Jesusmi chawpikichikmanta hanaq pachaman hoqarikuchkan, imaynam wak qawasqaykichik hinallam kutimunqapas, nispanku.

¹²Apostolkunam Olivos moqomanta kutirqaku Jerusalén llaqtaman, chay moqoqa Jerusalenpa hichpallanpi kasqanraykum yaqa huk kilómetro puriylla karqa.

¹³Llaqtaman chayaramuspankum samasqanku wasipa altosninman seqarqaku. Paykunam karqaku: Pedro, Jacobo, Juan, Andrés, Felipe, Tomás, Bartolomé, Mateo, Alfeopa churin Jacobo, Zelote cananista partidomanta Simón hinaspa Jacobopa churin Judas.

¹⁴Paykunam llapanku huñunakuqku huk sonqolla Diosta mañakunankupaq. Chaypitaqmi kachkarqa Jesuspa wawqenkunapas, maman Mariapas chaynataq wakin warmikunapas.

¹⁵Huk punchaw yaqa pachak iskay chunka iñiqkuna huñunasqa kachkaptinmi sayariykuspa Pedro nirqa:

¹⁶Wawqe-panillaykuna, Chuya Espiritum Davidnintakama Judasmanta rimarqaña. Chay Judasmi soldadokunata pusaspan Jesusta presocharachirqa.

¹⁷Judaspas ñoqanchikpa hukninchikmi karqa, hinaspam llamkayninchikpipas llamkarqa.

¹⁸Mana allin ruwasqanmanta qollqe chaskisqanwanmi chakrata rantirurqa. Chaypi umanpa wichiykuptinmi wiksan llikiruptin llapa chunchulninpas taqtakururqa.

¹⁹Jerusalenpi yachaq runakuna chayta yacharuspañataqmi chay chakrata suticharqaku Aceldamawan, paykunapa rimayninpiqa “yawar chakra” ninanmi.

²⁰Judasmantam Salmos libropi kaynata nin: “Wasinpas paypaqa chunniruchunyá, amataqyá pipas chaypiqa yachachunchu”, nispa. Chaypiqa nichkantaqmi: “Llamkayninpipas hukñayá llamkachun”, nispa.

²¹Kaypim ñoqanchikwan kachkan Jesucristowan kuska puriqmasinchik runakuna.

²²Paykunam Juanpa bautizay qallarisqanmantapuni ñoqanchikwan karqaku hanaq pachaman Jesús ripukunankama. Chaymi paykunamanta hukkaqninta akllananchik, Jesucristopa kawsarimusqanmanta ñoqanchikwan kuska willakunanpaq.

²³Pedro chaynata rimaruptinmi iskay runata akllarqaku. Hukninmi karqa José Barsabás, paypa huknin sutinmi karqa Justo, hukninñataqmi karqa Matías.

²⁴Chaymi Diosta mañakuspanku nirqaku: Señorllayku, qamllam reqsinki lliw runapa sonqontaqa. Reqsiykachiwaykuyá kay iskayninmanta mayqantam akllasqaykita.

²⁵Chaynapi Judaspa rantinpi ñoqaykuwan apóstol kananpaq. Judasqa apóstol kayninta wischupakuspanmi maymi kananman ripukun.

²⁶Hinaptinmi sorteaptinku Matiasman suerte tuparurqa, chaymi chunka hukniyuq apostolkunaman yapasqa karqa.