Read Biblia Revisión Chuya Qellqa 1992 – Chuya Qellqa 1992 Hechos 10 Bible Online

Hechos 10 - Biblia Revisión Chuya Qellqa 1992 – Chuya Qellqa 1992 bible

Hechos 10

¹Cesarea llaqtapim Cornelio yacharqa. Paymi karqa Italiano sutiyuq tropakunapa capitannin.

²Cornelioqa wasinpi llapallan kaqkunapiwanmi Diosta kasukuspa serviqku, wakcha judiokunatapas achka qollqewanmi yanapaq, hinaspanmi Diosta tukuy tiempo mañakuq.

³Huk punchawmi yaqa kimsa hora tardeykuyta visionpi rikururqa, Diospa angelnin paypa kasqanman yaykuspa: ¡Cornelio! nisqanta.

⁴Chaymi Cornelioqa angelta rikuykuspan llumpay mancharisqallaña tapurqa: ¿Imata Señor? nispa. Hinaptinmi chay ángel nirqa: Mañakusqaykitawan wakchakuna yanapasqaykitam Dios chaskiykun.

⁵Kunanyá runakunata Jope llaqtaman kachay Pedrowan sutichasqa Simonta pusamunankupaq.

⁶Paymi samapakuchkan lamar qochapa patanpi yachaq suela ruwaq Simonpa wasinpi, nispa.

⁷Chay rimapayaqnin ángel lloqsiruptillanmi, Cornelio qayarqa iskay serviqninkunatawan huk soldadonta. Chay soldadoqa karqa Dios yupaychaq, hinaspa Corneliopa confianzanmi.

⁸Paykunatam chay angelpa lliw nisqanta willaspan Jope llaqtaman kacharqa.

⁹Paqarinnintin punchaw, Corneliopa runankuna Jope llaqtaman yaqaña chayachkaptinkum, Pedroñataq yaqa chawpi punchawta wasipa altonman qespirqa Diosta chaypi mañakunanpaq.

¹⁰Llumpayta yarqarachikuspanmi mikuyta munarqa. Ichaqa mikuyta yanupunankukamam visionta rikururqa.

¹¹Paymi hanaq pacha kicharikuykuptin rikurqa tawan puntanmanta warkusqa uraykamuchkaq sabanasta.

¹²Chay sabanaspim kasqa tawa chakiyuq animalkuna, qasqonpa puriq urukuna hinaspa alton pawaq urpikuna.

¹³Hinaptinmi Pedro uyarirurqa: Pedro hatariy, wañuchispayki kaykunata mikuy, nimuqta.

¹⁴Pedroñataqmi nirqa: Manapunim mikuymanchu Señor. ¡Ñoqaqa manam haykapipas mana mikuna kaqkunataqa mikurqanichu! nispa.

¹⁵Chaymi huktawan nimurqa: Diospa chuyanchasqantaqa amayá “millakuypaqmi” niychu.

¹⁶Chaynallam kimsa kutikama pasakurqa, chaymantam chay sabanasqa hanaq pachaman hoqarisqa karqa.

¹⁷“Ima ninantaq kayqa” nispa Pedro piensachkaptinmi, Corneliopa kachamusqankunam tapukachakustin, Simonpa samapakusqan wasipa punkuman chayarurqaku.

¹⁸Hinaspam hatunmanta qaparispa tapukurqaku: ¿Kaypichu Pedrowan sutichasqa Simón samapakuchkan? nispanku.

¹⁹Pedroñataqmi chay visión rikusqanmanta hinalla yuyaymanachkarqa, hinachkaptinmi Chuya Espíritu payta nirqa: Qawariy, kimsa runakunam maskasuchkanki.

²⁰Utqayman uraykuspayki ama iskayrayaspa paykunawan riy, ñoqam paykunataqa kachamurqani, nispa.

²¹Chaymi Corneliopa runankunaman uraykuspan Pedro nirqa: Ñoqam kani maskasqaykichikqa. ¿Imamantaq hamurqankichik? nispa.

²²Hinaptinmi paykunañataq nirqaku: Ñoqaykutaqa Capitán Corneliom kachamuwanku. Payqa Diosta manchakuq justo runam, paytaqa llapa judiokunapas allin runapaqmi reqsinku. Diospa angelninmi payta kamachirqa wasinman qayachisuspayki qampa nisqaykikunata uyarinanpaq, nispanku.

²³Hinaptinmi Pedroñataq chay wasiman paykunata yaykuykachispan samachirqa, hinaspanmi paqarinnintin punchaw paykunawan pasarqa, Jope llaqtapi yachaq wakin iñiqkunapas riysirqakum.

²⁴Lloqsisqankumanta paqarinnintinmi Cesarea llaqtaman chayarurqaku. Cornelioñataqmi ayllunkunapiwan kuyasqan amistadninkunapiwan huñunakuruspanku Pedrota suyachkasqaku.

²⁵Corneliopa wasinman Pedro chayaruptinmi Cornelioñataq, chaskiqnin lloqsimuspan Pedropa ñawpaqninpi qonqorakuykurqaku hatunchanankupaq.

²⁶Ichaqa Pedrom sayarichispan kaynata nirqa: ¡Sayariy! Ñoqapas qam hina runallam kani, nispan.

²⁷Pedroñataqmi Corneliowan rimastin yaykuspan, achkallaña huñunasqa runakunata wasi ukupi tariykurqa.

²⁸Chaymi paykunata Pedro nirqa: Qamkunaqa yachankichikmi judiokunaqa mana judío kaqkunawanqa manam hukllawakuymankuchu, manataqmi wasinmanpas yaykuymankuchu leyniyku harkawasqankurayku. Ichaqa Diosmi qawaykachiwan amaña pitapas “kayqa millakuypaqmi otaq huchasapa runam” nispa ninaypaq.

²⁹Chayraykum qayarachimuwaptikichik mana iskayrayaspay chaypunilla pasamurqani. Chaynaqa, yachaykuytam munani ¿imapaqtaq qayachimuwarqankichik? nispa.

³⁰Chaymi Cornelioñataq nirqa: Tawa punchaw qepatam, kunan hina yaqa kimsa hora tardeykuyta kay wasiypi Diosta mañakuchkaptiy, suma-sumaq kancharichkaq pachayuq runa rikuriykuwarqa.

³¹Hinaspam niwarqa: “Cornelio, mañakusqaykikunatawan wakchakuna yanapasqaykitam Dios chaskiykun.

³²Kunanyá runakunata Jope llaqtaman kachay, Pedrowan sutichasqa Simonta pusamunankupaq. Paymi samapakuchkan lamar qochapa patanpi yachaq suela ruwaq Simonpa wasinpi”, nispa.

³³Hinaptinmi chaypunilla kachamurqani maskamusunaykipaq. Allinpaqmi hamurunkiqa. Kunanmi Diospa qayllanpi lliwchayku huñunasqa kachkaniku, Señorpa tukuy kamachimususqaykitam uyariyta munaniku, nispa.

³⁴Pedroñataqmi kaynata nirqa: Kunanmi chayraq yachaykuni, Diospa qayllanpiqa hina chaynakamallam kasqanchikta,

³⁵payqa may nacionmanta kaptinpas chaskinmi kasukuspa allin ruwaq runakunataqa.

³⁶Diosmi Israelpa mirayninkunaman allin noticiata willachirqa, Jesucristontakama Dioswan allinyanakunankupaq; Jesucristoqa llapallanchikpa Señorninchikmi.

³⁷Qamkunaqa yachankichikmi, bautizasqa kanankupaq Juanpa yachachisqanmanta qepaman, Galilea lawmanta qallaykuspa lliw Judea lawkunapipas imam pasakusqantaqa,

³⁸hinaspa imaynam Nazaretmanta kaq Jesucristota Chuya Espiritupa atiyninwan Dios huntaykusqantaqa; paymi purirqa allinkunata ruwastin chaynataq Satanaspa ñakarichisqan runakunata sanoyachistin, tukuy chaykunataqa ruwarqa paywan Dios kasqanraykum.

³⁹Judea lawpi hinaspa Jerusalén llaqtapi Jesucristopa ima ruwasqanmantaqa ñoqaykum testigo kaniku. Paytam cruzpi chakataruspanku wañurachirqaku.

⁴⁰Ichaqa Diosmi payta kimsa punchaw wañusqanmanta kawsarichispan, ñoqaykuman rikuriykachiwarqaku.

⁴¹Manam llapallan runakunamanchu rikurirqaqa, aswanqa ñoqallaykumanmi, Jesusmanta willakunaykupaq ñawpaqmantaraq Diospa akllasqan kasqaykurayku. Kawsariramuptinmi Jesuswan kuska mikurqaniku hinaspa tomarqaniku.

⁴²Paymi kamachiwarqaku llapa runakunaman paymanta willakunaykupaq, Jesucristotam Dios churarun wañuqkunatapas hinaspa kawsaqkunatapas juzgananpaq.

⁴³Llapa profetakunapas Jesusmantam kaynata nirqaku: “Payman llapallan iñiqtaqa Diosmi huchanmanta pampachanqa”, nispanku.

⁴⁴Chaynata Pedro rimachkaptinraqmi lliw uyariqninkunaman Chuya Espíritu huntaykurqa.

⁴⁵Hinaptinmi Pedrowan hamuq iñiq judiokuna llumpayta admirakurqaku, mana judío kachkaptinkupas Chuya Espiritupa atiynin huntaykusqanmanta.

⁴⁶Paykunatam uyarirqaku mana yachasqanku rimaykunapi rimaqta, hinaspa Dios yupaychaqta.

⁴⁷Hinaptinmi Pedro nirqa: Ñoqanchik hina paykunapas Chuya Espirituta chaskichkaptinkuqa ¿yaqachum pipas harkakunman bautizasqa kanankuta? nispa.

⁴⁸Chaymi Pedro kamachirqa Jesucristopa sutinpi bautizakunankupaq. Chaymantam Pedrota ruegarqaku iskay-kimsa punchawllapas paykunawan qeparinanpaq.