Read Biblia Revisión Chuya Qellqa 1992 – Chuya Qellqa 1992 Hechos 13 Bible Online

Hechos 13 - Biblia Revisión Chuya Qellqa 1992 – Chuya Qellqa 1992 bible

Hechos 13

¹Antioquiapi iñiqkunawanmi kachkarqa profetakunawan yachachiqkuna. Paykunam karqa Bernabé, Nigerwan sutichasqanku Simón, Cirenemanta kaq Lucio, Herodeswan kuska uywasqa Manaén, hinaspa Saulo.

²Huk punchawmi, ayunaspanku Señorta yupaychachkaptinku, Chuya Espíritu nirqa: Bernabeytawan Saulota sapaqchapuwaychik, paykunataqa qayarqani kamachisqayta ruwanankupaqmi, nispa.

³Ayunaruspankum Diosta mañakurqaku, hinaspam makinkuta paykunapa hawanman churaykuspanku aviarurqaku.

⁴Chuya Espiritupa kamachisqanmi Bernabeywan Saulo chayarurqaku Seleuciaman, chaymantañataqmi Chipre islaman barcopi rirqaku.

⁵Salamina llaqtaman chayaruspankum Diospa palabranta judiokunapa sinagogankunapi willakurqaku. Paykunawantaqmi Juanpas rirqa yanapananpaq.

⁶Chay lliw islanta puriruspankum Pafos llaqtaman chayarurqaku. Chaypim judiokunamanta kaq Barjesús sutiyuq brujota tarirurqaku. Payqa pantachikuq profeta tukuqmi karqa.

⁷Chay brujom yanapaq allin yachayniyuq gobernador Sergio Paulota. Chay gobernadormi Diospa palabranta uyariyta munaspan Bernabeytawan Saulota qayachimurqa.

⁸Ichaqa Elimaswan sutichasqa brujom paykunapa contranpi karqa gobernador Sergio Paulo mana iñikunanta munaspan.

⁹Aswanqa Chuya Espiritupa huntasqan Pablowan sutichasqanku Saulom chay brujota chayay-chayayta qawaykuspan nirqa:

¹⁰¡Llullakuypa hinaspa tukuy mana allinta ruwaspa allin kaqkunapa contranpi sayariq supaypa churin runa! ¿Imanasqataq mana samaspa Señorpa cheqap ñanninkunapi kay munaqkunata pantachichkanki?

¹¹Kunanmi Señor castigasunki, ñawsayaruspaykim unay punchawkuna intipa kanchaynintapas mana rikunkichu, nispa. Hinaptinmi chayllapuni tutayaypi rikurirurqa, chaymi manaña rikukuspan, tampikachaspan pipas makinmanta pusaqninta maskarqa.

¹²Kaykunata Gobernador rikuspanmi Señormanta Pablopa yachachisqanta uyarispan llumpayta admirakurqa, hinaspam iñikuykurqa.

¹³Pablom riqmasinkunapiwan Pafosmanta barcopi lloqsispanku Panfilia lawpi Perge llaqtaman chayarurqaku. Juanñataqmi paykunamanta rakikuruspan Jerusalenman kutikurqa.

¹⁴Chaymantam Pablowan Bernabé, Pergemanta Pisidia lawpi Antioquía llaqtaman chayarurqaku. Samana punchawpiñataqmi sinagoganman yaykuruspanku tiyaykurqaku.

¹⁵Diospa leynintawan profetakunapa qellqasqanta leeruspankum, sinagogapi kamachikuqkuna, Pablotawan Bernabeyta nirqaku: Wawqekuna, kay runakunata imallawanpas kallpanchanaykichikpaq kaptinqa kunanyá rimariykuychik, nispanku.

¹⁶Hinaptinmi Pabloqa sayarispan upallanankupaq makinwan señaschaspan nirqa: Israelpa mirayninkuna, chaynataq Diosta manchakuqkuna, uyariychik:

¹⁷ Israel runakunapa Diosninmi ñawpaq taytanchikkunata akllarqa, hinaspanmi Egipto nacionpi huklaw llaqtayuq hina yachachkaptinku achka-achkaman mirachirqa, chay nacionmantam paykunata atiyninwan hurqomurqa.

¹⁸Yaqa tawa chunka watam mana kasukuchkaptinkupas chunniqpi paykunata Dios aguantarqa.

¹⁹Canaán allpapi qanchis nacionkunata chinkachispam chay allpata ñawpaq taytanchikkunaman qorqa.

²⁰ Yaqa tawa pachak pichqa chunka watam juezkunata churarqa profeta Samuelpa tiemponkama.

²¹ Chaymantam reyta mañakuptinku, Dios qorqa Benjamín ayllumanta kaq Saulta, tawa chunka wata paykunata kamachinanpaq.

²²Saulta rey kayninmanta wischuruspanñataqmi Davidta akllarqa, paymantam Dios nirqa: “Isaipa churin Davidtam tariruni, payqa sonqoyman tupaqmi, paymi tukuy ima munasqayta ruwanqa”, nispa.

²³Davidpa mirayninmantam Jesús nacemurqa. Paytam Dios Tayta kachamurqa Israelpa llapallan mirayninkunata salvananpaq, ñawpaq taytanchikkunaman prometesqanman hina.

²⁴Manaraq Jesús hamuchkaptinmi Juan willakurqa: “Israelpa mirayninkuna, huchaykichikmanta wanakuspa bautizakuychik”, nispa.

²⁵ Wañukunanpaq hichpallaña kachkaptinmi Juan nirqa: “Manam ñoqaqa kani qamkunapa tanteasqaykichikchu, ichaqa ñoqamanta qepatam huk hamuchkan, paypataqa usutallantapas manam paskanaypaq hinachu kani”, nispa.

²⁶Abrahampa mirayninmanta kaq wawqellaykuna hinaspa Diosta kuyaspa kasukuqkuna, kay allin noticiakunatam Dios apamuwarqanchik salvakunanchikpaq.

²⁷Jerusalenpi yachaqkunam llapa kamachiqninkunapiwan, Jesús pim kasqanta mana yachasqankurayku wañunanpaq sentenciarurqaku, chaynapim profetakunapa nisqankuna cumplikurqa. Sapa samana punchawpi leechkaspankupas manam entienderqakuchu.

²⁸Wañunanpaq hina mana huchayuqta tarichkaspankupas Pilatotam mañakurqaku Jesusta wañuchinanpaq.

²⁹Paymanta Qellqapa tukuy nisqankuna cumplikuruptinmi, cruzmanta uraykachispa pamparurqaku.

³⁰Ichaqa Diosmi wañuqkunapa kasqanmanta kawsarirachimurqa.

³¹Chaymi achka punchaw rikurirqa Galileamanta Jerusalenman riqmasinkunaman. Paykunam Israelpa mirayninkunaman Jesusmanta willakunku.

³²Chaynapim ñoqaykupas qamkunaman kay allin noticiata willachkaykiku, chaytam ñawpaq taytanchikkunaman Dios prometerqa.

³³Ñoqanchik paykunapa miraynin kaptinchikmi prometewasqanchikman hina Jesusta Dios kawsarirachimurqa, iskay kaq Salmopipas kaynam qellqasqa kachkan: “Qamqa Churiymi kanki, ñoqam churyaqniki kani”, niq.

³⁴Diosmi Jesuspa cuerponta mana ismurunanpaq kawsarichimunanmanta nirqaña. “Qamkunamanmi qosqaykichik Davidman prometesqay cheqap kuyakuyniykunata”, nispa.

³⁵Huk Salmopipas kaynatam nichkan: “Sapaqchasqaykipa cuerpontaqa manataqmi ismurachinkichu”, nispa.

³⁶Cheqaptam Davidqa Diospa munasqanman hina wiñaymasinkunata yanaparqa, ichaqa ñawpaq taytankunapa hinam wañuruptinqa cuerpon ismururqa.

³⁷Diospa kawsarichisqan Jesuspa cuerponmi ichaqa mana ismurqachu.

³⁸Chaynaqa, wawqellaykuna yachaychikyá, Jesucristoman iñiptillaykichikmi huchaykichiktaqa Dios pampachanqa.

³⁹Moisespa leynintakama mana pampachasqa kasqaykichiktam, Jesucristopi haykam iñiqkunaqa pampachasqaña kankichik.

⁴⁰Cuidakuychikyá profetakunapa nisqankuna qamkunaman ama chayamusunaykichikpaq, paykunam nirqaku:

⁴¹“Diospa nisqanmanta asikuqkuna, uyariychik, admirakuspa chinkaychik. Mana creenaykichikpaq kaqkunatam kay punchawkunapi ruwasaq, pipas chaykunamanta willasuptikichikqa manam creewaqchikchu”, nispa.

⁴²Chaykunata rimaruspan Pablowan riqmasinkuna sinagogamanta lloqsiramuptinkum, llapa runakuna payta mañakurqaku: Huknin samana punchawtawanyá kaykunamanta willaykuwayku, nispanku.

⁴³Chay huñunakuyninku tukuruptinmi, achka judiokunawan judiokunapa religionninman iñikuqkuna, Pablotawan Bernabeyta qatirqaku, hinaptinmi paykunañataq Diospa kuyakuyninmanta ama karunchakunankupaq yachachirqaku.

⁴⁴Huknin samana punchawtam, Diospa palabranta uyarinankupaq, llaqtapi yaqa lliw runakuna huñunakururqaku.

⁴⁵Achka-achka runata rikuruspankum llapa judiokunañataq envidiakuspanku Pablopa yachachisqanpa contranpi rimaspanku insultaspa ñakarqaku.

⁴⁶Pablowan Bernabeyñataqmi mana manchakuspa nirqaku: Diospa palabrantaqa qamkunamanmi puntataqa willanayku karqa, ichaqa mana chaskiyta munaspaykichik, chaynataq wiñay kawsaytapas mana chaskispa wischupakusqaykichikraykum, mana judiokunamanña willakamusaqku.

⁴⁷Señorqa kaynatam kamachiwarqaku: “Diosta mana reqsiqkunapaqmi achkiyta hina churaruyki, chaynapi tukuy hinastinpi kaqkunaman salvaq kasqaymanta willakunaykipaq”, nispa.

⁴⁸Mana judío kaqkunañataqmi chaykunata uyarispa kusikurqaku, hinaspam Señorta palabranmanta yupaycharqaku, chaymi wiñay kawsanankupaq akllasqa kaqkuna Jesucristoman lliw iñikurqaku.

⁴⁹Chaynapim Señorpa palabran mirarqa tukuy chay llaqtakunapi.

⁵⁰Ichaqa llapa judiokunam Diosta yupaychaq hinaspa ancha reqsisqa warmikunatawan autoridadkunata umachaspanku, Pablopa hinaspa Bernabeypa contranpi hatarirachirqaku, hinaspam llaqtankumanta qarqorurqaku.

⁵¹Chaymi Pablowan Bernabeyqa qarqosqa kasqankuta qawachikunankupaq usutankupi allpata taspirqaku, hinaspankum Iconio llaqtaman pasakurqaku.

⁵²Paykuna pasakuptinpas Antioquía llaqtapi iñiqkunaqa Chuya Espiritupa huntasqanmi kusisqallaña qeparqaku.