Read Biblia Revisión Chuya Qellqa 1992 – Chuya Qellqa 1992 Hechos 22 Bible Online

Hechos 22 - Biblia Revisión Chuya Qellqa 1992 – Chuya Qellqa 1992 bible

Hechos 22

¹“Taytakuna, wawqellaykuna, defiendekunaypaq rimarisqaytayá uyariykuwaychik”, nispa.

²Chaymi hebreo rimayninkupi rimaqta uyariruspanku aswanraq upallarurqaku. Hinaptinmi Pablo nirqa:

³Ñoqaqa Cilicia law Tarso llaqtapi naceq judiom kani, ichaqa kay Jerusalenpim wiñarqani, yachachiqniypas Gamalielmi karqa, paymi ñawpaq taytanchikkunapa leyninta allinta yachachiwarqa. Diosninchiktam tukuy sonqoywan servini imaynam qamkunapas kunan servisqaykichikta hina.

⁴Ñawpaqtaqa Jesucristopi iñiqkunatam wañuchinaypaq qatikacharqani, warmitapas qaritapas presochaspaymi carcelman aparqani.

⁵Tukuy chaykunataqa sumo sacerdotewan kamachiqninkunapas allintam yachanku. Paykunam Damasco llaqtapi judiomasinchikkunapaq cartakunata qowarqaku, chaynapim iñiqkunata kay Jerusalenman presota apamuspay castigachinaypaq rirqani.

⁶Ichaqa Damasco llaqtaman chayaykuchkaptiymi, yaqa chawpi punchaw nisqata, cielomanta llumpay achkiy qonqayllamanta kanchaykamuwarqa.

⁷Hinaptinmi pampaman wichiykuspay uyarirqani “¡Saulo, Saulo! ¿Imanasqataq qatikachawanki?” niqta.

⁸Chaymi tapurqani: “¿Pitaq kanki Señor?” nispay. Hinaptinmi nimuwarqa: “Ñoqaqa qatikachasqayki Nazaretmanta kaq Jesusmi kani”, nispan.

⁹Riqmasiykunapas chay achkiytaqa rikurqakum, ichaqa manam entienderqakuchu chay rimapayawaqniypa nisqantaqa.

¹⁰Hinaptinmi tapurqani: “¿Señor, imatataq ruwasaq?” nispay. Payñataqmi niwarqa: “Hatarispayki Damasco llaqtaman yaykuy, chaypim imam ruwanaykita nisunki”, nispa.

¹¹Chay sinchi achkiy ñawsayarachiwaptinmi, riqmasiykuna makiymanta pusawaspanku Damasco llaqtaman chayachiwarqaku.

¹²Chaypim yacharqa Ananías sutiyuq runa. Payqa karqa Moisespa leynin kasukuqmi. Chayraykum Damascopi yachaq lliw judiokunapas paytaqa respetaqku.

¹³Paymi qawaqniy hamuspa niwarqa: “Wawqey Saulo, musoqmanta qawarikuy”, nispa. Chay ratollapi qawarikuruspaymi Ananiasta rikururqani.

¹⁴Hinaptinmi pay niwarqa: “Ñawpaq taytanchikkunapa Diosninmi akllasurqanki paypa munasqanta yachanaykipaq, hinaspa justo kaq Jesusta rikuruspayki kikinpa vozninta uyarinaykipaq.

¹⁵Qanmi tukuy hinastinpi runakunaman Jesusmanta rikusqaykitawan uyarisqaykita willakunki.

¹⁶Kunanqa ¿imataraqtaq suyachkanki? Hatarispayá bautizakuy, hinaspa Señorpa sutinta qayakuy huchaykikuna pampachasqa kananpaq”, nispa.

¹⁷Jerusalén llaqtaman kutiramuspaymi temploman Diosta mañakuq rirqani, chaypim visionta chaskispay

¹⁸Señorta rikururqani, paymi niwarqa: “Kay runakunaqa manam creenqakuchu ñoqamanta rimasqaykitaqa, chaynaqa kay Jerusalén llaqtamanta utqayman lloqsiy”, nispa.

¹⁹Hinaptinmi ñoqañataq nirqani: “Señor, paykunaqa yachankum lliw iñiqnikikunapa contranpi imakunam ruwasqaykunataqa, yachankutaqmi sinagogakunaman rispay qanman iñiqkunata carcelaspay maqasqaytapas”.

²⁰Iñiqniki Estebanta wañuchiptinkupas kikiypunim chaypi kaspay: “Allintam ruwachkankichik” nispay wañuchiqkunapa pachanta waqaycharqani.

²¹Chaynata niptiymi Señorñataq niwarqa: “Qamtaqa karu llaqtapi mana judío kaqkunaman rinaykipaqmi kamachisqayki”, nispa.

²²Pablopa rimasqanta chaykamalla uyariruspankum qaparispanku kaynata nirqaku: ¡Chay runaqa wañuchun! ¡Kay pachamanta chinkachiy! nispanku.

²³Chaynata qayaykachakuspankum pachankutapas wischuspanku allpakunata altoman machqerqaku.

²⁴Chayraykum soldadokunapa kamachiqnin nirqa: Pablota cuartel ukuman apaspaykichik tapumuychik: “¿Imanasqataq kay llapa runakuna kaynataña qampa contraykipi qaparinku?” nispaykichik. Mana rimayta munaptinqa rimanankama azotemuychik, nispa.

²⁵Ichaqa azotenankupaq watasqaña kachkaspanmi chaypi kaq capitanta Pablo nirqa: ¿Kanchu derechoykichik manaraq juzgachkaspa Roma nacionniyuq runata azotenaykichikpaq? nispa.

²⁶Capitanñataqmi chayta uyariruspan kamachiqninman rispan kaynata willamurqa: Kay runataqa ¿Imatataq ruwanki? Payqa Roma nacionniyuqmi kasqa, nispan.

²⁷Hinaptinmi soldadokunapa kamachiqninñataq asuykuspan Pablota tapurqa: Niykuway ¿Roma nacionniyuqchu kanki? nispa. Hinaptinmi Pabloñataq nirqa: Arí, nispan.

²⁸Chaymi soldadokunapa kamachiqninñataq nirqa: Ñoqaqa achka qollqewanmi Roma nacionniyuq kaytaqa rantirqani, nispa. Pabloñataqmi nirqa: Ñoqaqa nacesqaymantapunim Roma nacionniyuq kani, nispa.

²⁹Chaynata niruptinmi Pablota azotenankupaq kaq soldadokunapas chaylla ladonmanta suchurikurqaku. Soldadokunapa kamachiqninpas Pabloqa Roma nacionniyuq kasqanta yachaykuspanmi chaqnasqanmantapas mancharikurqa.

³⁰Soldadokunapa kamachiqninmi cheqaptapuni yachayta munarqa, imamantam llapa judiokuna Pablota acusasqankumanta. Chaymi paqarinnintin punchaw, watachisqan cadenakunata kachaykachispan judío sacerdotekunapa kamachiqninkunatawan cortepi kamachikuqkunata huñuchirqa. Hinaspam Pablota pusaspan paykunapa qayllanpi sayachirqa.