Read Biblia Revisión Chuya Qellqa 1992 – Chuya Qellqa 1992 Hechos 5 Bible Online

Hechos 5 - Biblia Revisión Chuya Qellqa 1992 – Chuya Qellqa 1992 bible

Hechos 5

¹Ananías sutiyuq runam warmin Safirapiwan chakrankuta rantikururqaku.

²Hinaspam warminwan tanteanakuruspanku wakin qollqeta rakikuykuspanku wakiqninta apostolkunaman aparqaku.

³Hinaptinmi Pedro nirqa: Ananías ¿imanasqamá Satanasqa sonqoykita munaychakurun, chaynapi chakra rantikusqayki qollqeta rakikuykuspayki Chuya Espirituta llullakunaykipaqqa?

⁴¿Manachum chakraykiqa qampa karqa? Ña rantikuruptikiqa ¿manachum makillaykipi chay qollqeqa karqa? Manam runakunatachu llullakurunkiqa, aswanqa Diostam, nispa.

⁵Kayta uyariruspanmi Ananías pampaman wichiykuspa wañururqa. Chaymi llapallan uyariqkuna anchallataña mancharikururqaku.

⁶Cuerpontañataqmi wankuykuspanku pampamunankupaq jovenkuna aparqaku.

⁷Yaqa kimsa hora pasaruptinmi Ananiaspa warmin Safirapas chayaramurqa, payqa manam kay pasakusqanmantaqa imatapas yacharqachu.

⁸Chaymi Pedro tapurqa: ¿Chay precio nisqaykichikpichum chakraykichikta rantikurqankichik? nispa. Hinaptinmi Safira nirqa: Arí, chay preciopim, nispa.

⁹Pedroñataqmi nirqa: ¿Imanasqamá tanteanakururqankichik Señorpa Espiritunta pruebanaykichikpaqqa? Waqaya qosayki pampamuq runakuna kutimuchkankuña, kunanñataqmi qamtapas apasunki, nispa.

¹⁰Chayta niykuptillanmi Safiraqa Pedropa ñawpaqninman wichiykuspan wañururqa. Chaymi jovenkuna yaykuspanku wañusqataña tariykurqaku, hinaspam aparqaku qosanpa waqtanpi pampamunankupaq.

¹¹Chaymi llapa iñiqkunawan chayta yachaqkuna llumpayta mancharikurqaku.

¹²Llapa iñiqkunam huk sonqolla huñunakuqku templopi kaq Salomonpa portalninpi, apostolkunam Diospa atiyninwan admirakuypaq milagrokunata runakunapi ruwaqku.

¹³Wakin runa paykunaman asuykuyta manchakuptinpas runakunapa allin respetasqanmi karqaku.

¹⁴Sapa punchawmi qaripas warmipas Señor Jesucristoman iñikurqaku, chaymi iñiqkuna aswan-aswan mirarqaku.

¹⁵Onqoqkunatam camakunapi chaynataq chakanakunapi callekunaman hurqomuqku: “Ichapas kayninta Pedro pasaspan llantuyllanwanpas sanoyarachinman” nispanku.

¹⁶Chaynallataqmi Jerusalenpa muyuriqninpi llaqtakunamantapas achkaq runakuna hamuspanku apamurqaku onqoqninkuta hinaspa demoniopa ñakarichisqan runakunatapas, hinaptinmi llapallanku sanoyarqaku.

¹⁷Sumo sacerdotem hinaspa saduceokunapa qatiqninkunam llumpayta envidiakurqaku.

¹⁸Hinaspam apostolkunata hapiruspanku carcelman wichqarurqaku.

¹⁹Ichaqa chay tutam Señorpa angelnin hamuspan punkuta kicharurqa. Paykunata hurqoruspanmi nirqa:

²⁰Temploman rispaykichik runakunaman willamuychik, musoq vidamanta tukuy kay yachachikuykunata, nispa.

²¹Chaymi achikyaruptillan temploman rispanku yachachirqaku. Sumo sacerdoteñataqmi paywan kaqkunapiwan, cortepi kaqkunapiwan huñunakunankupaq qayachirqaku Israel castakunapi lliw kamachikuqkunata. Hinaspam apostolkunata carcelmanta hurqomunankupaq kacharqaku.

²²Guardiakunam carcelman chayaruspanku apostolkunataqa manaña tarimurqakuchu chaymi kutirispanku willakurqaku:

²³Carceltam hina wichqasqata tariramuniku, punkupi guardiakunapas hinallam cuidachkanku, kichaykuptiykuñataqmi ukupiqa manaña pipas kasqañachu, nispanku.

²⁴Templopi nanachikuq guardiakunapa kamachiqninwan, sacerdotekunapa kamachiqninkunam chayta uyariruspanku tapunakurqaku: ¿Imaraqchá pasakunqapas? nispanku.

²⁵Chayllamanmi huk runa hamuspan nirqa: Chay carcelpi wichqasqaykichik runakunaqa templopiñam yachachichkanku, nispa.

²⁶Hinaptinmi guardiakuna kamachiqninkupiwan rispanku, runakuna rumiwan choqaparunankumanta manchakuspanku mana imanaspalla pusamurqaku.

²⁷Chay autoridadkunapa kasqanman pusaramuptinkum sacerdotekunapa kamachiqnin nirqa:

²⁸Ñoqaykuqa chunkay-chunkaytam kamachirqaykikuña chay Jesusmantaqa amaña yachachinaykichikpaq. Ichaqa Jerusalenpi lliw runakunaman yachachispaykichikmi, Jesuspa wañusqanmanta ñoqaykuta tumpawankiku.

²⁹Hinaptinmi Pedrowan wakin apostolkuna nirqaku: Runakunamanta puntataqa Diostam kasukunayku.

³⁰Qamkunam Jesusta chakataruspaykichik wañurachirqankichik, ichaqa ñawpaq taytaykichikkunapa Diosninmi kawsarirachimurqa.

³¹Paytam hatunchaspan alleq lawninman Dios churarqa, chaynapi munaychakuq hinaspa salvaqninchik kananpaq chaynataq Israelpa mirayninkuna huchankumanta wanakuspa pampachasqa kanankupaq.

³²Kaykunamantaqa ñoqaykum testigo kaniku, testigotaqmi kasukuqninkunaman Diospa qosqan Chuya Espiritupas.

³³Chaymi kamachikuqkuna kaykunata uyariruspanku llumpayta piñakururqaku, hinaspam wañurachinankupaq rimanakurqaku.

³⁴Hina chay kamachikuqkunawanmi huk fariseo Gamaliel sutiyuq kachkarqa. Paymi karqa Diospa leyninmanta yachachikuq. Paytam llapa runakuna llumpayta respetaqku. Paymi sayarispan kamachirqa apostolkuna hawaman lloqsiykunankupaq,

³⁵hinaspam llapa kamachikuqkunata nirqa: Israelpa mirayninkuna, kay runakunawan imam ruwanaykichiktaqa allinta tanteaychik.

³⁶Ñawpaq punchawkunapim Teudas hatarirurqa allin hatun reqsisqapaq hapikuspan. Paytam qatirqaku yaqa tawa pachak runakuna ichaqa wañurachiptinkum qatiqninkunapas lliw cheqerurqaku, chaynapim yanqapaq karqa.

³⁷Chaynallataqmi Galilea lawmanta kaq Judaspas censo punchawkunapi llapa runakunata hatarirachirqa, ichaqa paytapas wañurachirqakum, hinaptinmi qatiqninkunapas tukuy hinastinman cheqerurqaku.

³⁸Chaymi nikichik, ama imanaychikchu kay runakunataqa, paykunataqa hawkallatayá saqeykuychik. Sichum yachachisqanku otaq imam ruwasqanku runakunallamanta kaspanqa chinkarunqam.

³⁹Diosmanta kaptinmi ichaqa imayna chinkarachiytapas mana atiwaqchikchu. Chaynaqa, cuidakuychikyá, yanqañataq Diospa contranpi peleachkawaqchik, nispa.

⁴⁰Chaymi lliwchanku paypa nisqanta kasuspanku apostolkunata qayaykuspa azoterqaku, hinaspam Jesuspa sutinmanta amaña rimanankupaq kamachispalla kachaykurqaku.

⁴¹Chaymi apostolkuna llumpay kusisqallaña juzgaqninkunapa qayllanmanta lloqsirqaku, Jesucristorayku ñakarinankupaq Diospa akllasqa kasqankumanta.

⁴²Mana samaykuspankum templopipas, wasikunapipas sapa punchaw, Jesucristomanta willakuspa yachachiqku.