Read Biblia Revisión Chuya Qellqa 1992 – Chuya Qellqa 1992 Romanos 10 Bible Online

Romanos 10 - Biblia Revisión Chuya Qellqa 1992 – Chuya Qellqa 1992 bible

Romanos 10

¹Wawqe-panillaykuna, tukuy sonqoywanmi judiokuna salvakunankupaq Diosninchikta mañakuchkani.

²Reqsisqayman hina paykunaqa tukuy sonqonkuwanmi Dios serviyta munanku, aswanqa manam cheqap yachayman hinachu.

³Paykunaqa manataqmi yachankuchu imaynanpim runakunata mana huchayuqpaqña Dios chaskisqantapas, hinaspam kikinkupa ruwasqallanwan Diospa chaskisqan kayta munaspanku Diospa munasqanta mana kasukurqakuchu.

⁴Kamachikuykunapa tukupayninqa Cristom, chaynapi haykam payman iñiqkunaqa mana huchayuqpaqña chaskisqa kanankupaq.

⁵Leyninta mana huchayuqpaqña Diospa chaskisqan kananchikmantaqa Moisespas ñam kaynata nirqaña: Pipas leyninta cumpliqqa, chaywanmi kawsanqa, nispa.

⁶Aswanqa iñikuspallanchik mana huchayuqpaqña Diospa chaskisqan kananchikmantapas kaynatam nin: Amayá sonqoykipi niychu: ¿Pitaq hanaq pachaman wicharinqa? (Kayqa Cristota uraykachimunanpaqmi) nispaykiqa.

⁷Amataq niychu: ¿Pitaq uku pachaman rinqa? (Wañusqakunamanta Cristota kawsarichimunanpaq) nispapas.

⁸Ichaqa ¿Imanintaq? Diospa palabranqa hichpallaykipiña, simillaykipiña hinaspa sonqollaykipiñam kachkan, nispa. Kaymi iñiymanta willakusqayku palabraqa:

⁹Sichum simikiwan willakunki Jesusqa Señor kasqanta chaynataq tukuy sonqoykiwan Diospa kawsarichimusqanta creespaykiqa salvasqam kanki.

¹⁰Sonqonchikwanmi iñinchik mana huchayuqpaqña chaskisqa kananchikpaq, siminchikwanñataqmi Jesucristomanta willakunchik salvasqa kananchikpaq.

¹¹Chuya Qellqapim kaynata nin: Pipas paypi iñiqqa manam penqaypichu kanqa, nispa.

¹²Chaynaqa, judiokunawan mana judío kaqkunapas chay hinallam kanku. Señorninchikqa lliwchanchikpaqmi chullalla. Payqa haykam mañakuqkunamanmi chaninninpi qon.

¹³Chaynaqa, haykam Señorpa sutinta qayakuqkunaqa, salvom kanqa, nispa.

¹⁴¿Imaynatamá mañakunqaku payman mana iñichkaspankuqa? ¿Imaynataqmá iñinqaku paymanta mana uyarichkaspankuqa? ¿Imaynataq uyarinqaku pipas paykunaman mana willachkaptinqa?

¹⁵¿Imaynatataq willakunqaku mana pipas kachachkaptinqa? Chuya Qellqapim kaynata nin: ¡Mayna sumaqmi allin noticia willakuqkunapa puriyninqa! nispa.

¹⁶Aswanqa manam llapallankuchu allin noticiata kasukunku. Isaiasmi nirqa: Señorlláy, ¿Pitaq willakusqaykutaqa creerqa? nispa.

¹⁷Iñiyqa uyariptinchikmi hamun, uyariyñataqmi Cristopa palabranmanta hamun.

¹⁸Ichaqa ñoqam tapukuni: ¿Manachu willakuytaqa uyarirqaku? ¡Paykunaqa uyarirqakupunim! Chuya Qellqapim kaynata nin: “Lliw kay pachamanmi willakuyninkuqa chayarqa, palabrankunañataqmi kay pachapa patankama chayarqa”, nispa.

¹⁹Huktawanmi tapukuni: ¿Manachum judiokunaqa yacharqaku? Ñawpaqmantaraqmi Moisés kaynata nirqa: “Mana valeq huklaw llaqtakunawanmi sientirachisqaykichik, mana yuyayniyuq llaqtakunawanmi piñarachisqaykichik”, nispa.

²⁰Isaiaspas mana manchakuspanmi Diospa nisqanta kaynata nirqa: “Mana maskaqniykunam tariruwarqaku, mana ñoqamanta tapukuqkunamanmi rikuriykurqani” nispa.

²¹Israelpa llapa mirayninmantapas Isaiasqa kaynatam nirqa: Tukuy punchawmi makiyta haywarayarqani mana kasukuq kutipawaqniy runakunaman, nispa.