Read Biblia Revisión Chuya Qellqa 1992 – Chuya Qellqa 1992 Romanos 2 Bible Online

Romanos 2 - Biblia Revisión Chuya Qellqa 1992 – Chuya Qellqa 1992 bible

Romanos 2

¹Chaynaqa, manam imananchu pim kasqaykipas, sichum runamasikita juzgaspaqa, paykuna hina huchallikusqaykiraykum kikillayki sentenciakuchkanki; chayraykum mana imayna librakuyta atiwaqchu.

²Yachasqanchikpi hinapas, mana allin ruwaqkunataqa Diosmi cheqap kaqwan juzganqa.

³Chaynaqa, runamasikita juzgachkaspa qampas paykuna hina ruwachkaspaqa ¿piensankichum Diospa juicionmanta lluptiruyta?

⁴¿Icha Diospa hatu-hatun kuyakuynintawan pacienciantachu wischupakunki? ¿Manachu yachanki paypa kuyakuyninqa wanakuyman pusasusqaykita?

⁵Ichaqa rumi sonqo kaspayki hinaspa mana wanakuyta munaspaykim, juicio punchawpi castigasqa kanaykipaq Diospa piñakuyninta kikillayki huñukuchkanki. Chay punchawpim cheqap kaqman hina juzgasqanta Dios qawaykachikunqa.

⁶Paymi sapakamaman imam ruwasqankuman hina pagapunqa.

⁷Haykam allin ruwaypi takyaspa alabasqa kayta, hatunchasqa kayta hinaspa mana haykapipas wañuyta maskaqkunamanmi wiñay kawsayta qonqa.

⁸Kikillanpaq munaqkunatawan cheqap kaqkunata mana kasukuspa mana allinllapi puriqkunatam ichaqa piñakuywan castiganqa.

⁹Llapallan mana allin ruwaqkunapaqqa ñakariywan sasachakuymi kanqa, puntataqa kanqa judiokunapaqmi chaynataq mana judiokunapaqpas.

¹⁰Llapallan allin kaqkuna ruwaqkunamanmi ichaqa Dios qonqa hatunchasqa kayta, reqsisqa kayta hinaspa hawkayayta, puntataqa judiokunaman chaynataq mana judiokunamanpas.

¹¹Diosqa manam pimanpas sayapakunchu.

¹²Moisespa leyninta mana yachachkaspa huchallikuqkunaqa, manam chay leyman hinachu juzgasqa kanqaku; leyta yachachkaspanku huchallikuqkunam ichaqa chay leyman hina juzgasqa kanqaku.

¹³Diosqa manam chay ley uyariqtachu mana huchayuqpaqqa hapin, aswanqa kasukuqkunatam.

¹⁴Sichum mana judío kaqkuna leyta mana yachachkaspankupas leypa nisqanta ruwanqaku hinaspaqa, mana leyniyuq kachkaspankupas kikinkuñam ley hina kikinkupaq rikurirunku.

¹⁵Paykunaqa imapas ruwasqankuwanmi, sonqonkupi Diospa leynin qellqasqa kasqanta qawachikunku. Kikinkupa concienciankuwan yuyaymanayninkum acusanqa huchayuq otaq mana huchayuq kasqankutapas.

¹⁶Chaynataqa ruwanqa Jesucristontakama llapallan runakunata Dios juzganan punchawpim. Chay punchawpim runapa sonqonpi pakasqa kaqkunatapas Dios juzganqa, imaynam kay allin noticia willakusqayman hina.

¹⁷Qanmi “judiom kani” ninki, Moisespa leyninpim hapipakunki, hinaspam Diosmanta alabakunki;

¹⁸reqsinkim Diospa munakuynintapas, leymi yachachisunki allinnin kaqta akllakunaykipaq.

¹⁹Qanmi ñawsakuna pusaqpaq hapikunki, tutayaypi kaqkunapaqpas “achkiymi kani” ninkim.

²⁰Mana yachayniyuqkunata hinaspa warmakunatapas allinta yachachiqpaqmi hapikunki. Chaynataqa piensanki Diospa leyninpi cheqap kaqkunata yachasqaykiraykum.

²¹Chaynaqa, wakinkunata yachachichkaspaykiqa ¿imanasqataq kikikitaqa mana yachachikunkichu?. “Amam suwakunkichu” nichkaspaykiqa ¿imanasqataq suwakunki?

²²“Amam waqllikunkichu” nispa yachachichkaspaykiqa ¿imanasqataq waqllikunki?. Idolokunata cheqnichkaspaykiqa ¿imanasqataq templonpi kaqkunataqa suwakunki?

²³Qanmi leykunamanta alabakunki ¿hinachkaspachum chay leyta mana kasukuspa Diosta penqayman churanki?.

²⁴Chuya Qellqaqa allintam nin: “Qamkunapa huchaykichikmantam mana judío kaqkuna Diosta kaminku”, nispa.

²⁵Moisespa leyninkunata mana kasukuptikiqa yanqapaqmi qari-kaynikipi señalachikusqaykipas. Leypa nisqanta mana kasukuspaykiqa mana señalasqa hinam kanki.

²⁶Sichum pipas mana señalasqa kachkaspan leyman hina kasukuspanqa, mana señalasqa kachkaspapas señalasqapaq hapisqam kanqa.

²⁷Cuerponpi mana señalasqa kachkaspan leyta kasukuqqa, cuerponpi señalasqa kachkaspan chaynataq leyta yachachkaspan mana kasukuqtam juzganqa.

²⁸Judío kayqa manam hawallamantachu, nitaqmi aychapi señalarachikuyllachu.

²⁹Cheqap judío kayqa ukumantam, señalachikuypas sonqopim, chayqa Espirituman hinam, manam letraman hinachu. Chayna ruwaqtaqa manam runachu alaban aswanqa Diosllam.