Read Biblia Revisión Chuya Qellqa 1992 – Chuya Qellqa 1992 1 Corintios 14 Bible Online

1 Corintios 14 - Biblia Revisión Chuya Qellqa 1992 – Chuya Qellqa 1992 bible

1 Corintios 14

¹Kuyakuyniyuq kayta maskaychik, Chuya Espiritupa atiyninkunata maskaychik, chaykunamanta aswan mastaqa profetizayta munaychik.

²Pipas mana yachasqa rimaykunapi rimaqqa manam runakunamanchu riman, aswanqa Diosllamanmi, ichaqa manam pipas entiendenchu, pakasqa kaqkunata Espiritupi rimachkaptinpas.

³Profetizaqñataqmi runakunaman rimapayan iñiyninpi wiñananpaq, kallpanchakunanpaq hinaspa consuelasqa kananpaq.

⁴Mana yachasqa rimaykunapi rimaqqa kikillanmi espiritunpi wiñan, profetizaqñataqmi iñiqkunata wiñachin.

⁵Ñoqaqa munaymanmi mana yachasqaykichik rimaykunata llapallaykichik rimanaykichikta, ichaqa mastaqa munani profetizanaykichiktam, profetizaymi aswan allinqa mana yachasqanchik rimaykunapi rimaymantaqa. Mana yachasqanchik rimaykunata rimaspaqa imam nisqantam interpretana chaynapi iglesia wiñananpaq.

⁶Wawqe-panikuna, qamkunaman watukamuspay mana yachasqaykichik rimaykunapi rimapayaykichikman, ichaqa mana Diospa qawachiwasqantapas willaykichikmanchu, manataq imatapas reqsichikichikmanchu, nitaq qamkunaman profetizaymanchu hinaspa manataq imatapas yachachikichikmanchu chayqa, ¿ima allintaq qamkunapaq kanman?

⁷Sichum tocanakunamanta qenapa, arpapa waqayninku huk tonolla kaptinqa, ¿imaynatataq yachachwan arpa kasqanta otaq qena kasqantapas?

⁸Guerrapaq hina trompetata mana tocamuptinqa manam pipas alistakunmanchu guerraman rinanpaq.

⁹Chaynam kanman qamkunapipas, mana yachasqaykichik rimaykunapi rimaptikichikqa ¿imaynatataq yachanmanku ima nisqaykichiktapas? ¡Yanqachiki rimawaqchik!

¹⁰Kay pachapiqa achka rimaykunam kachkan ichaqa llapallanmi entiendenapaq.

¹¹Pipas huk rimaypi rimapayawasqanta mana entiendespayqa chay runapaqmi huklaw nacionniyuq hina kani, ñoqapaqpas chay runaqa huklaw nacionniyuq hinam.

¹²Chaynaqa, qamkunapas Diospa atiyninta aswan más chaskiyta munaspaqa, llapanmanta llalliqtaqa iñiqkuna wiñachiytayá maskaychik.

¹³Chaynaqa, pipas mana yachasqan rimayta rimaspanqa Diostayá mañakuchun chay rimasqanta uyariqninkunaman interpretananpaq.

¹⁴Sichum mana yachasqay rimaypi Diosta mañakuptiyqa espiritullaymi mañakun, ichaqa manam imam nisqaytapas yachanichu.

¹⁵Hinaptinqa ¿imatataq ruwayman? Diostaqa mañakusaqmi espirituywanpas chaynataq yuyayniywanpas. Takisaqtaqmi espirituywanpas chaynataq yuyayniywanpas.

¹⁶Sichum espirituman hina mana yachasqayki rimaypi Diosta yupaychaptikiqa mana entiendeq runaqa manam atinmanchu qanwan kuska gracias qoyta, imam nisqaykita mana entiendesqanrayku.

¹⁷Cheqaptam qamqa allinta Diosman graciasta qonki, huknikim ichaqa mana wiñanchu.

¹⁸Diosmanmi graciasta qoni qamkunamantapas aswan masta huk rimaykuna rimasqaymanta,

¹⁹iglesiapa huñunakuyninpim ichaqa munani pichqa palabrallatapas entiendenankupaq hina rimayta, chaynapi wakinkunamanpas yachachinankupaq, mana yachasqanku rimaypi chunka waranqa palabrakuna rimanaymantaqa.

²⁰Wawqekuna, amayá wawakuna hinaqa piensaychikchu, wawakuna hinaqa kaychik mana allinkunapaqyá, aswanqa yuyayniyuq runakuna hinañayá piensaychik.

²¹Kamachikuy Qellqapim kaynata nin: Mana reqsisqa rimaykunapim kay runakunaman rimapayasaq, chaywanpas manam kasuwanqakuchu, ninmi Señor, nispa.

²²Chaynaqa, mana yachasqanchik rimaykunapi rimayqa huk señal hinam mana iñiqkunapaq, manam iñiqkunapaqchu, profetizaymi ichaqa llapa iñiqkunapaq huk señal hina.

²³Iglesia huñunasqa kachkaptin mana yachasqanku rimaykunapi rimaptinkuqa ¿manachu manaraq yachaqqa otaq manaraq iñikusqa runa yaykuramuspan: “Kaykunaqa locoyarusqakum”, ninqa?

²⁴Sichum llapallanku profetizachkaptinku manaraq iñikusqa runa otaq manaraq yachaq runa yaykuramuptinqa, llapallankum chay runapa huchanta qawachispa convencechinqaku.

²⁵Chaynapim sonqonpi pakasqakunapas yachasqa kanqa, hinaptinmi qonqorakuykuspan Diosta yupaychanqa: Cheqaptapunim Diosqa qamkunawan kasqa, nispan.

²⁶Chaynaqa, wawqe-panillaykuna, huñunakuptikichikqa wakinmi takinmanku, wakinñataq yachachinmanku, wakinñataq Diospa revelasqanta willakunmanku, wakinñataq mana yachasqa rimayta rimanmanku, wakinñataq chay rimasqanta interpretanmanku. Tukuy kaykunatayá ruwaychik llapa iñiqkuna wiñananpaq.

²⁷Mana yachasqan rimaypi hukkaqnin rimaptinqa iskay-kimsallayá huk-hukmanta muyuyninpi rimachunku hukñataqyá imam nisqanta interpretachun.

²⁸Iglesiapa huñunakuyninpi mana interpretaq kaptinqa amayá pipas mana yachasqan rimaypiqa rimachunchu, rimaspaqa-rimachunku kikinkupaqyá hinaspa Diosllapaqyá.

²⁹Chaynataqyá profetakunapas iskay otaq kimsalla rimachunku wakinkunañataq allinta uyarispanku imam ninanta juzgachunku.

³⁰Sichum chaypi tiyaqkunamanta hukkaqnin revelacionta Diosmanta chaskiruptinqa punta rimaqqa upallachunñayá.

³¹Chaynapim llapallaykichik profetizaspaqa sapakama rimankichik uyariqkuna yachanankupaq hinaspa kallpanchakunankupaq.

³²Profetakunapa atiy chaskisqanqa profetakunamanmi sujetakunan.

³³Diosqa manam pantachikuq Dioschu, aswanqa hawkayay qokuqmi. Imaynam iglesiakunapa ruwasqankuman hina.

³⁴Warmikunaqa manam rimanankuchu huñunakuypiqa upallallam kananku, Diospa leyninpi kamachikusqanman hinam kasukunanku.

³⁵Imatapas yachayta munaspaqa wasipiñayá qosanta tapuchun, iglesiapiqa warmipa rimayninqa penqakuypaqmi.

³⁶Yachanaykichikmi, Diospa palabranqa manam qamkunawanchu qallarirqa, manataqmi qamkunallataqchu chaskirqankichikpas.

³⁷Pipas profetapaq otaq Chuya Espiritupa yachachisqanpaq hapikuspanqa yachachunyá qamkunaman kay qellqamusqayqa Señorpa kamachikuynin kasqanta.

³⁸Kay kamachikuyta mana chaskiqqa, manam Diospa chaskisqanchu kanqa.

³⁹Wawqe-panikuna, profetizaytayá aswanqa munaychik, amataqyá mana yachasqa rimaykunapi rimanankutaqa harkakuychikchu.

⁴⁰Ichaqa imatapas ruwaspaqa respetowan hinaspa ordenninpiyá ruwaychik.