Read Biblia Revisión Chuya Qellqa 1992 – Chuya Qellqa 1992 1 Corintios 7 Bible Online

1 Corintios 7 - Biblia Revisión Chuya Qellqa 1992 – Chuya Qellqa 1992 bible

1 Corintios 7

¹Kay tapumuwasqaykichiktam contestamuykichik, allinchá kanman runapa mana casarakuyninqa.

²Ichaqa mana huchaman wichinanpaqmi sapakama warmiyuq otaq qosayuqpas kananku.

³Qosaqa imam debernintam warminwan cumplinan, chaynataqmi warmipas imam debernintam qosanwan cumplinan.

⁴Warmipa cuerponqa manam kikinpañachu aswanqa qosanpañam, qosapa cuerponpas manataqmi kikinpañachu aswanqa warminpañam.

⁵Warmikichikwan otaq qosaykichikwan kaytaqa ama neganakuychikchu, negaspaqa neganakuychik as punchawkunallapaq iskaynikichik tanteanakuspa, chaynapi Diosta mañakunaykichikpaq tiempoykichik kananpaq, chaymantaqa kaqllayá kakuychik, yanqañataqmi mana aguantayta atiptikichik Satanás huchaman wichiykachisunkichikman.

⁶Kaykunataqa nikichik consejaspaymi, manam kamachikuyta hinachu.

⁷Ñoqaqa munaymanmi llapallankupas ñoqa hina kanankuta, ichaqa Diosmi sapakamaman atiyta qon, wakinmanmi qon casado kananpaq, wakinmanñataq soltero kananpaq.

⁸Solterokunapaqwan viudakunapaqmi ichaqa allin kanman mana casarakuspa ñoqa hina kayninku.

⁹Sichum mana aguantayta atispaqa casarakuchunyá, huknin-huknin munapayaymantaqa casarakuymi aswan allinqa.

¹⁰Casado kaqkunatam ichaqa kamachini, warmiqa amayá qosanmantaqa rakikuchunchu. Kay kamachikuyqa manam ñoqapachu aswanqa Señorpam.

¹¹Rakikuruspanqa amataqyá hukwanqa casarakuchunchu, mana chayqa qosanwan amistachun. Qosanpas amataqyá warmintaqa saqechunchu.

¹²Wakinkunatam ichaqa ñoqa nini, manam Señorchu, hukkaq wawqepa warmin Diospi mana iñiq kanqa, ichaqa paywan hawka yachakunqa, hinaptinqa amayá saqechunchu.

¹³Chaynataq hukkaq warmipa qosan Diospi mana iñiq kanqa, ichaqa paywan hawka kawsakunqa, hinaptinqa amayá saqechunchu.

¹⁴Diospi mana iñiq qosaqa, Diospi iñiq warminraykum Diospaq sapaqchasqa, chaynataqmi Diospi mana iñiq warmipas Diospi iñiq qosanrayku Diospaq sapaqchasqa. Mana chayna kaptinqa wawa-churinkunachá Diospi mana iñiqkunapa churinkuna hina kanman, chaynapim Diospaq sapaqchasqaña kachkanku.

¹⁵Diospi mana iñiq qari otaq warmi rakikuyta munaspaqa rakikuchunyá, chaynapiqa wawqepas panipas libreñam. Diosqa qayawarqanchik hawkayaymanmi.

¹⁶Yaw warmi, ¿yaqachu qosaykita salvaruwaq? Yaw qari, ¿yaqachu warmikita salvaruwaq?.

¹⁷Imayna kaspapas sapakamam Señorpa qosqanman hina kawsanan hinaspa sapakamata Diospa qayasqanman hina, chaynatam llapa iñiqkunaman kamachini.

¹⁸Pitapas judío hina qari kayninkupi señalasqata Dios qayaptinqa amayá chaywanqa hukmanyachunchu, mana señalasqata qayaptinqa amataqyá señalachikuchunchu.

¹⁹Manam imananchu señalasqa otaq mana señalasqa kayninchikpas, Diospa kamachikuynin kasukuymi allinqa.

²⁰Dios qayaptin imaynam kasqankuman hinallayá sapakama kachunku.

²¹Esclavo kachkaspallaraq qayasqa kaptikiqa manam imananchu, librakuyta atispaqa librakuchunyá.

²²Pipas esclavo kachkaspan Señorpa qayasqan kaspaqa libreñam Señorta servinanpaq, chaynataqmi libre kachkaptin Señor qayaptinqa Cristopa esclavonñam rikurirun.

²³Diosmi preciowan rantisurqankichik, chaynaqa amayá runapa esclavonqa kaychikchu.

²⁴Chaynaqa, wawqe-panikuna, imaynam qayasqa kasqaykichikman hinayá Diospa qayllanpi sapakama takyaychik.

²⁵Solterakunamantaqa manam Señorpa kamachikuynin kanchu, ichaqa Señorpa kuyapayawasqanman hina confianza kasqanraykum consejoyta qoni.

²⁶Mana allin tiempokunapi kasqanchikrayku, ñoqamantaqa allinmi kanman solterolla kayninku.

²⁷Casado kaspaqa amayá warmikimantaqa rakikuychu. Sapallayki kaspaqa amaraqyá warmita maskaychu.

²⁸Chaywanpas casarakuspaykiqa manam huchallikuchkankichu, soltera warmi casarakuspanpas manataqmi huchallikuchkanchu, casarakuqkunam ichaqa kawsayninkupi sasachakuypi kanqaku. Ñoqaqa munaymanmi mana sasachakuyniyuq kanaykichikta.

²⁹Wawqe-panikuna, kaytam niyta munaykichik, manañam tiempo kanñachu, chaymi kunanmantaqa casadokunapas mana warmiyuqpas kanman hinaña kawsananku.

³⁰Llakisqa kaqkunapas mana llakiyuq hinam kananku, kusisqa kaqkunapas mana kusikuyniyuq hinam kananku, chaynataqmi rantiqkunapas mana kapuqniyuq hinaña kananku.

³¹Kay pachapi allin kaqkunawan servichikuqkunapas allin kaqkunawan mana servichikuq hinam kananku, kay pacha qawasqanchikqa tukuruqllam.

³²Manam munaymanchu llakisqa kanaykichikta. Soltero qariqa Señorpa kaqninkunallapim ocupakun, paypa munasqanta ruwananpaq.

³³Casado qarikunañataqmi ocupakunku kay pachapi kaqkunamanta chaynapi warminta agradananpaq.

³⁴Casada warmiqa manam soltera warmi hinachu, soltera warmiqa Señorpa kaqninkunapim ocupakun cuerponpiwan espiritunpi Diospaq sapaqchasqa kananpaq. Casada warmiñataqmi ocupakun kay pachapi kaqkunamanta chaynapi qosanta agradananpaq.

³⁵Kaytaqa nikichik allinnikichikpaqmi, manam harkakuspaychu aswanqa allinta kawsaspa mana hukmanyaspa Señorta servinaykichikpaqmi.

³⁶Ichapas soltera churinmanta pipas piensanman: Harkakusqayraykum payayarunman, nispa. Chaynata piensaspan casarachiyta munaptinqa allinmi, casarachichunyá, manam chayqa huchachu.

³⁷Sichum pipas mana obligasqa kachkaspa, libre kasqanman hina munanman warmi churinqa solteralla kananta, hinaspaqa allintam ruwan.

³⁸Chaynaqa, casarachispaqa allintam ruwan, mana casarachispanñataqmi aswan allintaraq ruwan.

³⁹Casada warmiqa leyman hinaqa qosanmanmi hukllawasqa kachkan qosan kawsachkaptinqa, qosan wañukuptinmi ichaqa libreña piwanpas munasqanwan casarakunanpaq, ichaqa Señorpi iñiqwan.

⁴⁰Ichaqa tanteasqayman hinaqa kusikuyniyuqmi kanman mana huktawan casarakuspanqa. Ñoqaqa creenim Diospa Espiritunqa ñoqapi kasqanta, chaynapim kaynata rimapayaykichik.