Read Biblia Revisión Chuya Qellqa 1992 – Chuya Qellqa 1992 2 Corintios 11 Bible Online

2 Corintios 11 - Biblia Revisión Chuya Qellqa 1992 – Chuya Qellqa 1992 bible

2 Corintios 11

¹Loco hina rimasqaykunatayá aguantaykuwankichik. ¡Arí, aguantaykuwaychikyá!

²Diospa sientisqanman hinam qamkunamanta sientikichik. Chullalla qariwan casarakuq mana qari reqsiq sipasta hinam Cristoman presentanaypaq prometekurqaykichik.

³Ichaqa engañasqa kanaykichikmantam manchakuchkani, maqta urum sakrillaña kasqanrayku Evata engañarurqa, chaynam qamkunapas Cristoman chuya sonqo kasqaykichikmanta pantachisqa kawaqchik.

⁴Ichapas hukkaqnin hamuspan willasunkichikman mana ñoqaykupa willasqayku Jesusmanta otaq mana chaskisqaykichik espiritumanta otaq hukpa sutinpi salvakuymanta hinaptinqa qamkunaqa chayllachusmi chaskikuykuwaqchik.

⁵Chay qepay hamuq hatu-hatun apostolkunamantaqa manam menoschu kani.

⁶Nanay simi kaptiypas yachayniyqa manam chaynachu, chaytaqa tukuy ima ruwasqaykuwanmi qawachirqaykichik.

⁷¿Mana imallapaq allin noticiata qamkunaman willaspayqa huchallikurqanichu? chaynata ruwaspayqa humillakurqani qamkuna hatunchasqa kanaykichikpaqmi.

⁸Wakin iglesiakunatam wakchayachirqani, paykunamanta pagoyta chaskispay qamkunata servinaypaq.

⁹Qamkunawan kachkaptiy qollqey tukuruptinpas manam mañakurqaykichikchu, aswanqa Macedonia lawpi kaq wawqe-panikunam apachimuwarqaku. Manam qamkunamantaqa imatapas mañakurqaykichikchu nitaqmi mañakusqaykichikpaschu.

¹⁰Ñoqapi kaq Cristopa cheqap palabranraykum nikichik: Acaya lawpipas kay alabakusqaymantaqa manam upallachiwanqakuchu.

¹¹¿Imanasqataq kaynataqa rimachkani? ¿Qamkunata mana kuyaspaychu? Diosmi yachan qamkuna kuyasqaytaqa.

¹²Kay ruwasqaytaqa aswanraqmi ruwasaq, chaynapi ñoqaykuta qatipakuspa alabakuqkuna ama hatunchakunankupaq.

¹³Paykunaqa llulla apostolkunam, engañowan llamkaspam Cristopa apostolnin tukunku.

¹⁴Kayqa manam admirakunapaqchu, Satanaspas kancharichkaq angelmanmi tikrakun.

¹⁵Chaynam Satanaspa serviqninkunapas, allin servikuqkunamanraq tikrakunku, ichaqa huk punchawmi imam ruwasqankuman hina castigasqa kanqaku.

¹⁶Yapatawanmi nikichik: Amayá locopaqqa hapiwaychikchu, chaynapaqña hapiwaspaykichikpas chaskiykuwaychikyá, chaynapi ñoqapas tumpatallatapas alabakunaypaq.

¹⁷Alabakuspayqa manam Señorpa munasqanman hinachu rimani, aswanqa loco hinam rimani.

¹⁸Achkaqmi aychaman hina alabakunku chaynaqa ñoqapas alabakusaqyá.

¹⁹Qamkunaqa yachayniyuq kachkaspam kusikuywanraq locokunata uyarinkichik.

²⁰Qamkunaqa hawkaraqmi kakunkichik: Servichikusuptikichikpas, engañasuptikichikpas, tukuy imaykichikta qechusuptikichikpas, hatun tukuptinkupas hinaspa uyapi laqechusuptikichikpas.

²¹Penqakuywanraqmi nini: Ñoqaykuqa manam chaypaq hinachu karqaniku. Pipas imamantapas alabakuptinqa, ñoqapas loco hinam aswanraq alabakusaq.

²²¿Hebreo castachu kanku? Ñoqapas chay castam kani. ¿Israelpa mirayninchu kanku? Ñoqapas chay miraymi kani. ¿Abrahampa mirayninkunachu kanku? Ñoqapas paypa mirayninmi kani.

²³¿Cristopa serviqninkunachu kanku? Loco hinam nichkaykichik, ñoqaqa aswanraqmi Cristotaqa servichkani, paykunamantaqa mastam llamkarqani, mastam azotetapas chaskirqani, carcelkunapim karqani, achka kutitataqmi wañuymantapas ayqerqani.

²⁴Pichqa kutitam judiokuna azotewarqa, kimsa chunka isqonniyuq makitam azotewarqaku.

²⁵Kimsa kutitam kaspiwan waqtapawarqaku, huk kutipiñataqmi rumiwan choqaparuwarqaku. Illasqaykunapim kimsa kutikama barco yakuman tikrakuykurqa. Huk punchaw huk tutanñataqmi lamar qochapi karqani.

²⁶Achka kutitam illarqani hinaspam sinchi sasachakuypim karqani: Mayu aparuwananmanta, suwamanta, castaykuna hinaspa mana judío kaqkuna wañurachiwananmantapas. Chaynataq llaqtakunapipas, chunniqkunapipas, lamar qochapipas hinaspa wawqe-pani tukuqkunamantapas.

²⁷Llumpaytam llamkarqani, sasachakuyllapim karqani. Achka kutipim karqani: Yarqaymanta, yakumanta chaynataq mana puñusqa, mana mikusqa, chiripi hinaspa pachaymantapas ususqa.

²⁸Tukuy kaykuna pasawachkaptinpas sapa punchawmi iñiqkunamanta llakikuy intuykuwarqa.

²⁹Pipas onqoptinqa ¿manachu ñoqapas onqoni? Pipas huchaman urmaptinqa ¿manachu ñoqapas penqakuywan kani?.

³⁰Alabakunay kaptinqa mana kallpayuq kasqaymantam alabakusaq.

³¹Señor Jesuspa Taytan wiñaypaq hatunchana Diosmi mana llullakusqayta yachan.

³²Damasco llaqtapi kachkaptiymi rey Aretasta serviq prefecto, presochawananpaq chay llaqtapa punkunta cuidachirqa,

³³hinaptinmi chay llaqtapa murallanpa ventananta canastapi warkuruwarqaku, chaynapim prefectopa makinmanta hinaña lluptikurqani.