Read Biblia Revisión Chuya Qellqa 1992 – Chuya Qellqa 1992 2 Corintios 4 Bible Online

2 Corintios 4 - Biblia Revisión Chuya Qellqa 1992 – Chuya Qellqa 1992 bible

2 Corintios 4

¹Chaynaqa, manam hukmanyanikuchu, Diosmi kuyakuyninman hina kay llamkaytaqa qowarqaku.

²Saqerunikuñam pakasqallapi penqaypaq ruwaykunataqa, manataqmi pitapas engañastinchu nitaqmi Diospa palabrantapas qewi-qewirispachu purichkaniku, aswanqa cheqapllatam willakuniku, Diospa qayllanpim recomendakuniku llapa runakunapa concienciaman.

³Sichum kay allin noticia willakusqayku velowan tapasqa hina kachkan, chaynaqa kachkan chinkasqa kaqkunallapaqmi.

⁴Mana iñisqankuraykum, kay pachapi dios yuyaymanayninkuta tutayarachin, chaynapi Cristopa achkirichkaq allin noticianta mana entiendenankupaq. Cristoqa Diospa rikchayninmi.

⁵Manam kikiykumantachu willakunikuqa, aswanqa Jesucristo Señor kasqanmantam, kikiykumantañataqmi Jesusta kuyasqaykurayku sirvientekichik kasqaykuta willakuniku.

⁶Tutayaypi kancharinanpaq kamachiq Diosllam sonqonchiktapas achkiyninwan kancharichirqa, chaynapi Jesucristopa uyanpi kanchariq Diospa achkiyninta reqsichinanchikpaq.

⁷Chay achkiymi qori hina ñoqanchikpi kapuwachkanchik, allpa manka hinalla kachkaptinchikpas. Chay hatu-hatun atiyqa manam ñoqanchikmantachu, aswanqa Diosmantam hamun.

⁸Sasachakuykuna hamuptinpas manam vencerachikunikuchu, iskayrayaykunawanpas manam pasaypaqchu hukmanyaruniku,

⁹qatikachasqa kaspaykupas, ichaqa manam sapallaykuchu kachkaniku, tuñichisqa kaspaykupas, ichaqa manam chinkachisqachu kaniku.

¹⁰Maytaña rispaykupas cuerpoykupi ñakarispam Jesuspa wañusqanta apaniku, chaynapi Jesuspa kawsasqanqa cuerpoykupi qawachikusqa kananpaq.

¹¹Kawsanaykukamaqa Jesusraykum wañuypa patanpi sapa punchaw kachkaniku, chaynapi kay wañuq cuerpoykupi Jesuspa kawsasqan qawasqa kananpaq.

¹²Ñoqaykum wañunayachkanikuña, qamkunañataqmi aswanraq kawsarichkankichik.

¹³Chuya Qellqapim kaynata nin: Iñirqanim, chayraykum rimarqanipas, nispa. Chaynam ñoqaykupas iñispa confianzawan rimaniku.

¹⁴Imaynam Señor Jesusta wañusqanmanta Dios Tayta kawsarichirqa chaynam ñoqanchiktapas paywan kuskata wañusqamanta kawsarichiwaspanchik qayllanman pusawasunchik.

¹⁵Tukuy chaykunataqa ñakarirqaniku allinnikichikpaqmi, chaynapi achkallaña runakuna Diospa kuyakuyninta chaskispa aswan-aswan Diosman graciasta qospa hatunchanankupaq.

¹⁶Chaymi mana hukmanyanikuchu, cuerpoyku machuyaptinpas espirituykuqa aswanmi sapa punchaw musoqyachkan.

¹⁷Ñakariykunaqa pisillam hinaspa pasaruqllam, chaymantañam chaskisunchik mana imawanpas tupachiy atina wiña-wiñaypaq hatun kaqkunata.

¹⁸Suyachkanchikqa manam qawasqanchik kaqkunallatachu, aswanqa mana rikusqanchik kaqkunatam. Qawasqanchik kaqkunaqa tukuruqllam, mana rikusqanchik kaqkunam ichaqa wiña-wiñaypaq.