Read Biblia Revisión Chuya Qellqa 1992 – Chuya Qellqa 1992 Gálatas 1 Bible Online

Gálatas 1 - Biblia Revisión Chuya Qellqa 1992 – Chuya Qellqa 1992 bible

Gálatas 1

¹Ñoqa apóstol Pablom, apóstol kayniyqa manam runapa akllawasqanman hinachu, aswanqa kikin Jesucristom hinaspa Dios Taytam akllawarqa, paymi Jesucristota wañusqanmanta kawsarichimurqa.

²Ñoqa Pablom, kaypi kaq iñiqkunapiwan Galaciapi kaq llapallan iglesiakunaman rimaykamuykiku.

³Dios Taytanchikwan Señorninchik Jesucristoyá hawkayaynintawan kuyakuyninta qamkunaman chaqchurimusunkichik.

⁴Dios Taytanchikpa munasqanman hinam kikin Señorninchik Jesucristo ñoqanchikpa huchanchikmanta wañupuwarqanchik, chaynapi millay huchamanta librawananchikpaq.

⁵Dios Taytayá wiña-wiñaypaq qapaqchasqa kachun. Amén.

⁶Admirasqallañam kachkani, Jesucristopa kuyakuyninraykum Dios qayasurqankichik, hinaptinqa ¿imanasqamá manapas unaypiqa Diosmantaqa karunchakurunkichik huk rikchaq evangeliotaña qatinaykichikpaqqa?

⁷Cheqaptaqa huk allin evangelioqa manam kanchu. Wakin runakunam Jesucristomanta cheqap evangeliota qewiyta munaspanku qamkunatapas iskayrayachisunkichik.

⁸Chaynaqa, ñoqaykumantaña kaptinpas otaq hanaq pachamanta hamuq angelña kaptinpas, allin noticia willasqaykumanta huk rikchaq willakuyta yachachisuptikichikqa Diospa ñakasqanyá kachun.

⁹Ñam nirqaykichikña, chaywanpas huktawanraqmi nimuykichik: Sichum pipas willasqayku evangeliomanta huk rikchaq evangeliota apamusuqnikichikqa Diospa ñakasqanyá kachun.

¹⁰Kaynata nispayqa ¿runakunapa allinpaq hapisqan kaytachu maskani, icha Diospa allinpaq hapiwanantachu? Sichum runakunapa allin hapiwanallanta munayman, hinaspayqa manañam Jesucristopa sirvientenchu kayman.

¹¹Wawqe-panillaykuna yachaychikyá, ñoqapa kay allin noticia willakusqayqa manam runakunapa rikurichimusqanchu.

¹²Chaytaqa manam runamantachu chaskirqani nitaq yacharqanipas, kikin Jesucristom ñoqamanqa yachachiwarqa.

¹³Qamkunaqa uyarirqankichikchá judiokunapa yachachikuyninta kasukuspay ñawpaqta imaynam kawsasqayta. Chaynataq Diospa iglesiankunata imaynam qatikachaspay chinkachiy munasqaytapas.

¹⁴Judiokunapa yachachikuyninkunata kasukuspaymi wiñaymasiykunatapas llalliriqraq kani. Allinpaq hapispaymi ñawpaq taytaykunapa costumbrenkunata cumpliq kani.

¹⁵Aswanqa manaraq nacechkaptiymi munasqanman hina Dios sapaqchawarqa hinaspam llumpay kuyakuyninwan qayaykuwarqa.

¹⁶Churin Jesucristotam reqsiykachiwarqa mana judío kaqkunamanpas allin noticiata willakamunaypaq. Jesucristomanta yachanaypaqqa manam ima runatapas tapurqanichu,

¹⁷manataqmi Jerusalentapas ñoqamanta punta kaq apostolkuna tapukuqpas rirqanichu. Aswanqa Arabia lawman pasakuspaymi unaymantaña Damasco llaqtaman kutimurqani.

¹⁸Kimsa watamantañam Jerusalén llaqtaman rirqani, Pedrowan reqsinakamunaypaq, chaymi chunka pichqayuq punchaw paywan karqani.

¹⁹Wakin apostolkunawanmi ichaqa mana tuparqanichu, aswanqa Jesuspa wawqen Jacobollawanmi.

²⁰Kay qellqamusqaypa cheqap kasqantaqa Diosmi yachan, manam llullakunichu.

²¹Jerusalenmanta lloqsispayñataqmi Siria lawman hinaspa Cilicia lawman pasakurqani.

²²Judea lawpi Cristoman iñiqkunaqa manam kikiytapuniqa reqsiwarqakuchu.

²³Paykunaqa ñoqamanta uyarispam nirqaku: “Ñawpaq qatikachawaqninchik Pablom kunanqa Jesucristomanta yachachispaña purichkan, paymi ñawpaqta chinkachiyta munawarqanchik”, nispanku.

²⁴Chayta yacharuspankum, ñoqamanta Diosta hatuncharqaku.