Read Biblia Revisión Chuya Qellqa 1992 – Chuya Qellqa 1992 Efesios 4 Bible Online

Efesios 4 - Biblia Revisión Chuya Qellqa 1992 – Chuya Qellqa 1992 bible

Efesios 4

¹Ñoqaqa Señorta servisqayraykum preso kachkani, chaynaqa ruegakamuykichikmi Diospa akllasqankuna hina allinta kawsanaykichikpaq.

²Chaynaqa, uchuychakuspayá llampu sonqolla hinaspa pacienciakuq kaychik, imamanta pantanakuruspapas kuyakuywanyá aguantanakuychik.

³Chuya Espiritupa yanapakuyninwanyá huk sonqolla kaychik, tukuy tiempopi hawkalla kawsanaykichikpaq.

⁴Cuerpoqa hukllam, hukllataqmi Espiritupas, Diosqa huk sonqolla suyanaykichikpaqmi qayasurqankichik.

⁵Hukllam Señorqa, hukllam iñiypas, hukllataqmi bautismopas.

⁶Hukllam Diosqa, payqa lliwpa Taytanmi, payqa llapallanpi munaychakuqmi, llapallantakamam tukuy imatapas ruwan, llapallanpintaqmi kachkanpas.

⁷Ichaqa sapakamamanmi munasqanman hina Jesucristoqa atiyta qowarqanchik.

⁸Chaymi Qellqa kaynata nin: “Altoman wicharispanmi, presokunata aparikurqa, runakunamanmi atiyta qorqa”, nispa.

⁹“Wicharirqam” nisqanqa, ¿ima ninantaq? Kaywanqa niwachkanchik puntataqa kay pachamanta aswan ukumanraq uraykusqantam.

¹⁰Hina payllataqmi tukuy imaman huntariykunanpaqpas cielokunapa altonkamaraq wicharirqa.

¹¹Paypunitaqmi atiytapas qorqa, wakinman: Apóstol kananpaq, profeta kananpaq, evangelista kananpaq, michiq kananpaq hinaspa yachachikuq kananpaq.

¹²Paykunatam churarqa iñiqkunata allinta yachachispa Diospa obranpi llamkanankupaq, chaynapi Cristopa cuerpon wiñachisqa kananpaq.

¹³Chaynapim iñisqanchikpipas chaynataq Diospa Churin reqsisqanchikpipas llapallanchik wiñaspa hukllaña kasunchik, chaynapi yuyayniyuq runa hinaña kaspa mana imapapas pisisqan Cristo hinaña kasunchik,

¹⁴manam kasunqa warmakuna hinañachu, warmakunaqa hukta-hukta creeruspankum wayrawan apachikuchkaq hina runakunapa yachachisqanwan apachikunku, paykunataqa sakri runakunam sumaqllataña rimaspa pantachin.

¹⁵Aswanqa kuyanakuspayá cheqap kaqta qatispa aswan-aswan Cristoman rikchakuq kananchikkama wiñasun, Cristoqa llapallan iñiqkunapa umanmi.

¹⁶Cristom llapallan iñiqkunata huk cuerpollata ruwawanchik, chaynataqa ruwawanchik cuerpopa partenkuna yanapanakunanpaq ankukunawan tinkinachkaq hinam, chaynapim sapakama ima ruwananchikta allinta ruwaspa kuyakuywan kallpanchakuspa wiñasunchik.

¹⁷Señorninchikpa sutinpim nikichik: Amañayá Dios mana reqsiq runakuna hinaqa kawsaychikchu, paykunaqa mana allin piensasqankuman hinallam kawsachkanku.

¹⁸Paykunaqa yuyayninku tutayasqa kaptinmi mana entiendenkuchu, Diospa qosqan musoq kawsaymantaqa karupim kachkanku, sonqonku rumiyasqa kasqanraykum mana yachayniyuq kachkanku.

¹⁹Paykunaqa manaña penqakuq rikuriruspankum tukuy imaymana qanra kawsayllapi purikuchkanku, millakuypaq kaqkunata ruwaspankum aswan-aswanraq chayna kawsayta munachkanku.

²⁰Qamkunam ichaqa mana chaynatachu Cristomanta yacharqankichik,

²¹sichum cheqaptapuni paymanta yachachikuyta uyarirqankichik hinaspa Jesuspi cheqap kasqanman hina chaskispaqa.

²²Huchaman aysaqnikichikmanta karunchakuspayá amaña ñawpaq kawsaynikichikpi hinañachu puriychik, chayna kawsayqa pantachisuspaykichikmi mana allinllata munachisunkichik.

²³Yuyaymanaynikichiktayá musoqyachiychik.

²⁴Hinaspayá musoq runawan pachakuychik, Diosman rikchakuq kanaykichikpaq, chayna runatam Diosqa unancharqa cheqaptapuni mana huchallikuq justo kananpaq.

²⁵Chaynaqa, amaña llullakuspa cheqaptapuni runamasikichikwan rimaychik, llapanchikmi huk cuerpopa partellan kanchik.

²⁶Piñakuspaqa amataqyá huchallikuychikchu, amayá inti seqaykunankamaqa piñakuruychikchu.

²⁷Huchaman diablo urmachisunaykichiktaqa amayá saqekuychikchu.

²⁸Pipas suwakuqqa amañayá suwakuchunchu, aswanqa imatapas allinta ruwaspayá llamkachun, chaynapi mana imayuqkunata imallawanpas yanapaykunanpaq.

²⁹Rimaspaykichikqa amayá qacha simichu kaychik, aswanqa allin kaqkunallatayá rimaychik, chaynapi uyariqnikichikkunapa allinninpaq kaptin iñiyninkupi aswan-aswan wiñanankupaq.

³⁰Amayá Diospa Chuya Espirituntaqa llakichiychikchu. Paywanmi sellowan hina sellasurqankichik, chaynapi hamuq punchawpi librasunaykichikpaq.

³¹Qamkunamantayá kaykunata wischuychik: Piñakuyta, rabiakuyta, cheqnikuyta, qaqchakuyta, insultanakuyta chaynataq tukuy mana allin ruwaytapas.

³²Aswanqa sumaq sonqo kaspa kuyanakuychik, imaynam Diospas Cristorayku pampachasurqankichik, chaynayá qamkunapas pampachanakuychik.