Read Biblia Revisión Chuya Qellqa 1992 – Chuya Qellqa 1992 Filipenses 2 Bible Online

Filipenses 2 - Biblia Revisión Chuya Qellqa 1992 – Chuya Qellqa 1992 bible

Filipenses 2

¹Sichum Cristopuni kallpanchasuptikichikqa, sichum kuyasuspaykichik sonqoykichikta tiyaykachiptinqa, sichum Espiritupas qamkunawan kachkaptinqa chaynataq qamkunapas llakipayarikuspa kuyakuqllaña kaspaykichikqa

²lliwchaykichikyá kusichiwaychik: Huk pensamientoyuqlla, huk kuyakuyniyuqlla, huk sonqolla hinaspa huk sientiqlla kaspaykichik.

³Amayá cheqnikuspaqa nitaq hatun tukuspaqa imatapas ruwaychikchu, aswanqa uchuychakuspayá kikikichikmantapas aswan allinpaqraq wakinkunata hapiychik.

⁴Amayá kikillaykichikpa allinnikichiktachu maskaychikqa, aswanqa wakiqnikichikpa allinnintawanyá.

⁵Jesucristopa piensasqanman hinayá qamkunapas piensaychik.

⁶Payqa Dios kachkaspapas manam Diospaq hinachu hapikurqa,

⁷aswanqa runaman hina tikrakuykuspam sirviente hinaña kananpaq churakuykurqa.

⁸Runaman tikrakuruspanmi uchuychakuykurqa, uchuychakurqaqa Diosta kasukuspan penqaypaq cruzpi wañunankamam.

⁹Chayraykum llumpayta Dios hatuncharqa hinaspam llapallanmanta suma-sumaq sutiwan sutichaykurqa,

¹⁰chaynapi Jesuspa sutinpi hanaq pachapi kaqkunapas, kay pachapi kaqkunapas chaynataq uku pachapi kaqkunapas qonqorakunankupaq.

¹¹Llapallan runakunapas “Jesucristoqa Señormi” nispam ninqaku, chaynataqa ninqaku Dios Tayta hatunchasqa kananpaqmi.

¹²Kuyasqay wawqe-panillaykuna, qamkunawan kaptiymi tukuy tiempo kasuwarqankichik, ichaqa manam qamkunawan kaptillaychu, chaynaqa karupi kaptiypas aswanraqyá kasuwaychik. Manchakuywan hinaspa respetowanyá salvasqa kasqaykichikta allinta waqaychaychik,

¹³Diosmi munasqanman hina allin munayta hinaspa allin ruwayta qamkunapi hatarichin.

¹⁴Lliwtayá ruwaychik ama kaminakuspa nitaq kutipanakuspa,

¹⁵chaynapim mana culpayuq hinaspa mana huchayuq kaspaykichik Diospa churin chuya sonqo kankichik millakuypaq huchallikuq runakunapa chawpinpi. Qamkunaqa tutapi kanchaq chaska hinam sutilla lliwpa reqsisqan kachkankichik.

¹⁶Qamkunaqa wiñaypaq kawsay qokuq palabratam hatallichkankichik. Chaymi Cristopa kutimunan punchawpiqa qamkunamanta kusikusaq kallpanchakuspay yachachisqayqa mana yanqapaq kasqanmanta.

¹⁷Diospi iñisqaykichikwanmi ofrenda hina ofrecekurqankichik, chay ofrendaman completanaypaq wañunay kaptinpas, chaytaqa kusikuywanmi ruwasaq, hinaspam llapallaykichikwan kusikusaq.

¹⁸Chaynaqa, qamkunapas ñoqawan kuskayá kusikuychik.

¹⁹Señorninchik Jesús munaptinqa chayllam Timoteota kachamusaq watukamusunaykichikpaq, chaynapi imayna kasqaykichikta yachaykuspa kusikunaypaq.

²⁰Manam pipas Timoteo hinaqa kanchu, ñoqa hina qamkunamanta llumpayta preocupakuqqa,

²¹lliwpas paykunaqa kikillankupa allinninkuta maskaspam purinku, Jesucristopa munasqanta mana maskaspanku.

²²Qamkunam ichaqa yachankichikña Timoteoqa tukuy imapi allin kasqanta, payqa imaynam huk churi taytanta yanapan, chaynam Cristomanta allin noticia willakuypi yanapawarqa.

²³Chaynaqa, imapas asuntoymanta yachaykuspaymi chaypunilla kachamusqaykichik watukamusunaykichikpaq.

²⁴Ñoqapas Señorninchikpim confiakuchkani kikiypuni qawaqnikichik chaylla hamurunaypaq.

²⁵Wawqenchik Epafroditotam qamkunaman kachamuyta piensarqani, paytam kachamuwarqankichik tukuy imapi yanapawananpaq. Kuskaykum soldado hina yanapanakurqaniku.

²⁶Paymi llumpayta munachkan llapallaykichikwan tupaykuyta, llakisqam kachkan onqorusqanmanta yacharusqaykichikrayku.

²⁷Cheqaptapunim onqoruspan yaqalla wañukurqa, ichaqa Diosninchikmi paymanta llakipayarikurqa, llakipayarikurqataqmi ñoqamantapas chaynapi wañukuptin aswanraq llakiyuq kanaymanta.

²⁸Chayllam kachamuchkani huktawan tupaykuspa kusikunaykichikpaq chaynapi ñoqapas manaña ancha llakisqa kanaypaq.

²⁹Hatun kusikuywanyá chaskiykuychik Señorninchikman graciasta qostin, pay hina kaqkunataqa respetaychikyá.

³⁰Cristo servisqanpim yaqalla wañukurqa, payqa wañuytapas mana manchakuspam qamkunapa rantikichikpi yanapawarqa.