Read Biblia Revisión Chuya Qellqa 1992 – Chuya Qellqa 1992 Colosenses 4 Bible Online

Colosenses 4 - Biblia Revisión Chuya Qellqa 1992 – Chuya Qellqa 1992 bible

Colosenses 4

¹Patronkuna, qamkunapas esclavoykichikmanyá imam kaqta qopuychik, yachasqaykichikpi hinapas qamkunapapas hanaq pachapim kamachiqnikichik kachkan.

²Ama pisipaspayá Diosta mañakuychik, rikchan-rikchanlla kaspayá graciasta qoychik.

³Mañakuychiktaqyá ñoqaykupaqpas, punkuta Señorninchik kichananpaq, chaynapi Cristomanta pakasqa allin noticianta willakamunaykupaq, chayraykum ñoqapas preso kachkani.

⁴Chaynataqyá Diosta mañakuychik imam kaqta paymanta willakunaypaq.

⁵Mana iñiq runakunapa qayllanpipas yachaywanyá kawsaychik, tiempoykichiktapas ama usuchispa.

⁶Rimasqaykichikpas kachiwan kachichasqa hinayá kachun, chaynapim yachankichik sapakamaman imaynam contestayta.

⁷Kuyasqanchik wawqenchik Tiquicom willasunkichik imaynam ñoqa kasqaymanta, paymi mana saqewaspa yanapawarqa, hinaspam ñoqawan kuska Señorninchikta servirqa.

⁸Chaymi imaynam kasqaykumanta willasunaykichikpaq qamkunaman kachamuni hinaspa qamkunata kallpanchasunaykichikpaq.

⁹Paywantaqmi hamuchkan Señorpi allin takyaq kuyasqanchik wawqenchik Onesimopas, payqa llaqtamasikichikmi. Paykunam willasunkichik kaypi tukuy ima pasakusqanmanta.

¹⁰ Carcelpi presomasiy Aristarcom rimaykamusunkichik, rimaykamusunkichiktaqmi Bernabeypa primon Marcospas. Qamkunam paymanta kamachisqayta chaskirqankichik, sichum watukamusuptikichikqa allinllatayá chaskiykuychik.

¹¹Rimaykamusunkichiktaqmi Jesuspas, paypa huknin sutinqa Justom. Paykunallam iñiqkunamanta judío ayllumantaqa yanapaykuwarqaku Diosninchikpa munaychakusqanmanta willakuptiy, paykunam ñoqataqa kallpanchawarqa.

¹²Rimaykamusunkichiktaqmi Señorninchik serviq llaqtamasikichik Epafraspas, paymi tukuy tiempo qamkunapaq tukuy sonqonwan Diosta mañakuchkan, Diospa munasqanman hina allinta sayanaykichikpaq, chaynapi ima kaqpipas Diosman hapipakunaykichikpaq.

¹³Ñoqam yachani imaynam Epafrasqa qamkunamanta llumpayta llakikusqanta, yachanitaqmi Laodicea llaqtapi kaqkunapaqpas hinaspa Hierápolis llaqtapi kaqkunapaqpas llamkasqanmanta.

¹⁴Rimaykamusunkichiktaqmi kuyasqanchik doctor Lucaspas chaynataq wawqenchik Demaspas.

¹⁵Ñoqapa parteymantapas rimaykapuwaychikyá Laodiceapi kaq wawqe-paninchikkunata. Rimaykuychiktaqyá Ninfastawan wasinpi huñunakuqkunatapas.

¹⁶Kay cartata leeykuspaykichikyá Laodiceapi kaq wawqe-panikunaman apachiychik, paykunapas leenankupaq.

¹⁷Wawqenchik Arquipotapas niychiktaqyá Señorninchik Jesucristopa kamachisqanta paypa sutinpi ruwayman churananpaq.

¹⁸Ñoqa Pablom makiywanpuni kay rimakuykuyta qellqamuykichik. Yuyariychikyá carcelpi kasqayta. Diosninchikyá kuyakuyninta qamkunaman chaqchurimuchun. Amén.