Read Biblia Revisión Chuya Qellqa 1992 – Chuya Qellqa 1992 Josué 1 Bible Online

Josué 1 - Biblia Revisión Chuya Qellqa 1992 – Chuya Qellqa 1992 bible

Josué 1

¹Tayta Diospa serviqnin Moisés wañukuptinmi, Moisespa yanapaqnin Nunpa churin Josueyta Tayta Dios nirqa:

²Serviqniy Moisesmi wañukun. Chaynaqa, llapa runakunawan kay Jordán mayuta chimpay, chaynapi Israelpa mirayninkunaman qosqay allpaman yaykunaykichikpaq.

³Moisesman prometesqayman hinam lliw sarusqaykichik allpata qoykichik.

⁴Allpaykichikmi kanqa sur lawpi chunniqmanta qallarispa norte lawman Líbano lawpi orqonkunakama, intipa qespimunan lawpi hatun Eufrates mayumanta qallarispa intipa seqaykunan lawpi Mediterráneo lamar qochakama. Qoykichiktaqmi Het castakunapa allpantapas.

⁵ Kawsanayki punchawkamaqa manam pipas venceyta atisunkichu. Moisesta yanapasqayta hinam qamtapas yanapasqayki, manam saqesqaykichu nitaqmi qonqasqaykichu.

⁶Qarinchakuspayá kallpanchakuy. Qanmi ñawpaq taytankuman prometesqay allpata kay runakunaman herencianku kananpaq partenki.

⁷Kallpanchakuspaykiyá qarinchakuy, chaynapi serviqniy Moisespa kamachisusqayki yachachikuykunaman hina ruwanaykipaq. Amam chaymanta ichoqmanpas nitaq alleqmanpas rakikunkichu, chaynapi tukuy ima ruwasqaykipas allin lloqsinanpaq.

⁸Kay libropi kamachikuykunatam rimanki, hinaspam tuta punchaw yuyaymananki, waqaychaspayki kay libropa nisqanman hina ruwaspa kasukunaykipaq. Hinaspaqa imatapas allintam ruwanki, ima ruwasqaykipas allinmi lloqsinqa.

⁹Ñoqam kamachiki kallpanchakunaykipaq chaynataq qarinchakunaykipaq. Amayá manchakuychu nitaq hukmanyaychu, ñoqa Señorniki Tayta Diosmi mayta riptikipas qanwan kasaq, nispa.

¹⁰Chaymi llaqta kamachiqkunata Josué kaynata kamachirqa:

¹¹Campamentoman rispa runakunata kamachimuychik qoqawninkuta ruwanankupaq. Kaymanta kimsa punchawmanmi Jordán mayuta chimpasunchik, Señorninchik Tayta Diospa qowasqanchik allpaman yaykuspa hapikunaykichikpaq, nispa.

¹²Rubenpa, Gadpa chaynataq Manasespa wakin ayllutapas kaynatam Josué nirqa:

¹³Tayta Diospa serviqnin Moisespa kamachisusqaykichiktayá yuyariychik, paymi nisurqankichik: Diosnikichikmi hawkayayta kay allpapi qoykusunkichik.

¹⁴Warmikichikpas, churikichikkunapas animalnikichikkunapas Jordán mayupa kaylaw chimpanpiyá Moisespa qosusqaykichik allpapi qepachunku. Qamkunamanta guerrapaq kaq qarikunañataqmi armaykichikta apaspa wawqekichikkunata yanapamunaykichikpaq chimpankichik,

¹⁵chaynapi imaynam qamkunaman qosusqaykichikta hina paykunamanpas hawkayayta Tayta Dios qoptin, Diospa qosqan allpata hapinankupaq. Chayñam Jordán mayupa kaylawninpi, intipa qespimunan lawpi allpaykichikman kutimuspa munaychakunkichik. Chay allpatam Tayta Diospa serviqnin Moisés qosurqankichik, nispa.

¹⁶Hinaptinmi Josueyta paykuna nirqaku: Ñoqaykuqa niwasqaykikuman hina ruwaspam maymanpas kamachiwasqaykikuman risaqku.

¹⁷Imaynam Moisesta tukuy imapipas kasurqaniku chaynam qamtapas kasusqaykiku. Ichaqa Tayta Diosyá qanwan kachun imaynam Moiseswan kasqanta hina.

¹⁸Pipas kamachisqaykita mana kasukuspa nisqaykikunata mana ruwaqqa wañuchisqa kachun. Qamyá ichaqa qarinchakuy hinaspa kallpanchakuy, nispanku.