Read Biblia Revisión Chuya Qellqa 1992 – Chuya Qellqa 1992 Josué 14 Bible Online

Josué 14 - Biblia Revisión Chuya Qellqa 1992 – Chuya Qellqa 1992 bible

Josué 14

¹Canaán allpatam Israelpa mirayninkunaman paykunapaña kananpaq, sacerdote Eleazarwan Nunpa churin Josué chaynallataq Israelpa mirayninkunapa kamachiqninkuna qorqaku.

²Sorteaspankum tupaqninman hina isqonnintin ayllukunaman chaynataq Manasespa wakin ayllumanpas qorqaku, Moisesman Tayta Diospa kamachisqanman hina.

³Rubén ayllumanwan Gad aylluman hinaspa Manasespa wakin ayllumanqa Jordán mayupa waklaw chimpanpi allpatam Moisés qorqa. Leví ayllumanmi ichaqa mana qorqachu.

⁴Joseypa mirayninkunam karqa iskay ayllukuna, Manaseswan Efraín. Leví castakunamanqa manam herenciankupaq allpata qorqakuchu, aswanqa llaqtakunatam yachanankupaq qorqa, animalninkupaqpas echaderokunatam qorqa.

⁵Moisesman Tayta Diospa kamachisqanman hinallam Israelpa mirayninkunaqa allpata rakinakurqaku.

⁶Judapa mirayninkunam rirqaku Josueywan rimanankupaq Gilgal lawpi kachkaptin, chaymi Josueyta Cenez casta Jefonepa churin Caleb nirqa: Qamqa yachankim ñoqamantawan qanmanta Cades-barnea lawpi kachkaptinchik serviqnin Moisesman Tayta Diospa imam nisqantaqa.

⁷Ñoqaqa tawa chunka watayuqmi karqani Tayta Diospa serviqnin Moisés, Cades-barnea lawmanta Canaán allpa wateqaq kachawaptinqa. Chaymanta kutimuspayqa imam kaqtam willakurqani.

⁸Riqmasiykunam ichaqa llapa runakunata hukmanyarachirqaku, ñoqam ichaqa yupaychasqanchik Tayta Diosman hapipakurqani.

⁹Chay punchawmi Moisés juraspan niwarqa: “Cheqaptapunipas sarumusqayki allpaqa qampa chaynataq miraynikikunapa herencianmi kanqa, yupaychasqanchik Tayta Diosman hapipakusqaykirayku”, nispa.

¹⁰Kayqaya nisqanpi hina Tayta Diosqa kawsachiwachkanraq, Israelpa mirayninkunata chunniqpi purichkaptinku Moisesman Tayta Dios kay palabrakunata nisqanmantapunim tawa chunka pichqayuq wataña pasarun, kunanqa pusaq chunka pichqayuq wataypiñam kachkani.

¹¹Allpata qawamunaypaq Moisespa kachawasqanpi hinaraqmi ñoqaqa imata ruwanaypaqpas kachkani. Guerraman rinaypaqpas kallpaypiraqmi kachkani.

¹²Chay punchawpi Tayta Diospa nisqanman hinayá chay orqokunata kunan qoykuway. Yachankim chay orqokunapiqa ñawpaqmantaraq Anacpa mirayninkuna yachasqankutaqa, llaqtankunapas murallasqakama hatun llaqtakuna kasqanta. Tayta Dios yanapawaptinqa, paypa nisqanpi hinam qarqorusaq, nispa.

¹³Chaymi Josueyqa, Jefonepa churin Calebpaq Tayta Diospa bendicionninta mañakuspan Hebrón allpata herencianpaq qoykurqa.

¹⁴Chaynapim Hebrón llaqtaqa cenezeo Jefonepa churin Calebpa herencianña kunankamapas kachkan, Israelpa yupaychasqan Tayta Diosman hapipakusqanrayku.

¹⁵Hebrón llaqtapa ñawpaq sutinqa karqa Quiriat-arbam. Arbaqa karqa hatunkaray Anacpa castanmi. Chay punchawkunamantam chay allpapiqa manaña guerra karqachu.