Read Biblia Revisión Chuya Qellqa 1992 – Chuya Qellqa 1992 2 Timoteo 3 Bible Online

2 Timoteo 3 - Biblia Revisión Chuya Qellqa 1992 – Chuya Qellqa 1992 bible

2 Timoteo 3

¹Kaytapas yachaytaqyá tukupay punchawkunapiqa sasallaña tiempokunam hamunqa.

²Runakunam kanqaku kikillanpaq munaqkuna, qollqella kuyaqkuna, hatun tukuqkuna, Dios insultaqkuna, mama-taytanku mana kasukuqkuna, mana reqsikuqkuna, huchallapi purikuqkuna,

³mana kuyakuqkuna, mana pampachakuy munaqkuna, runakunapa contranpi rimaqkuna, mana controlakuqkuna, mana llakipayakuqkuna, allin kaqta cheqnikuqkuna,

⁴runamasin traicionaqkuna, loco hina ruwaqkuna, añañankakuna hinaspa Diosta maskananku kachkaptinpas aychankupa munasqallan maskaqkuna,

⁵yanqallam Diosta serviq tukunqaku, paykunaqa ruwayninkuwanmi cheqap kaqpa atiyninta wischupakunqaku. Chayna runakunawanqa ama hukllawakuychu.

⁶Chayna runakunaqa wasin-wasin purispam huchasapa warmikunata engañanku, chay warmikunaqa tukuy rikchaq munapayaykunapa intusqanmi kachkanku.

⁷Paykunaqa musoq yachachikuykunata yachayta munaspapas cheqap yachachikuytaqa manam entiendenkuchu.

⁸Imaynam Janeswan Jambrespas Moisespa contranpi karqaku, chaynam kay runakunapas cheqap yachachikuykunapa contranpi kachkanku. Mana allin yuyaymanayniyuq kaspankum Jesucristoman mana iñisqankurayku Diospa mana chaskisqan kachkanku.

⁹Paykunaqa manam imapipas puntamanqa rinqakuchu, lliwmi mana yuyayniyuq kasqankuta yacharunqaku, chaynam pasakurqa Moisespa contranpi hatariq Janeswan Jambreswanpas.

¹⁰Qanmi ichaqa yachachisqayman hapipakuspayki qatiwarqanki, imaynam kawsasqayta, imam munasqayta, iñiyniyta, pacienciakuq kasqayta, kuyakuq kasqayta, upallalla ñakarisqayta,

¹¹qatikachasqa kasqayta hinaspa ñakarisqayta. Yachankitaqmi Antioquía llaqtapi, Iconio llaqtapi hinaspa Listra llaqtapi runakunapa qatikachasqan kaspay ñakarisqaytapas, aswanqa Señormi tukuy chaykunamanta libraykuwarqa.

¹²Cheqaptaqa Cristo Jesuspa munasqanman hina kawsayta munaqqa qatikachasqam kanqa.

¹³Mana allin runakuna hinaspa engañakuq runakunam ichaqa aswan-aswanraq mana allinman chayanqaku, pantachispankum paykunapas pantachisqa kanqaku.

¹⁴Qamyá ichaqa qaqa hina sayaspa yachasqaykikunata umaykipi waqaychay, qamqa yachankim pikunam yachachisusqaykitapas.

¹⁵Qamqa warma kasqaykimantaraqmi Chuya Qellqapi yachachikuykunata yacharqanki, chaykunaqa yachaytam qosunki Cristo Jesuspi iñispa salvakunaykipaq.

¹⁶Chuya Qellqaqa llapallanmi Diospa yuyay qosqanman hina qellqasqa, allinmi yachachinapaq, pantaypi kasqanta qawachinapaq, pantaypi puriqta allin ñanman kutichinapaq chaynataq allin kawsakuyta yachachinapaq.

¹⁷Chaynapi Diospa runankunaqa yachayniyuq kaspa tukuy allinkunata ruwanankupaq.