Read Biblia Revisión Chuya Qellqa 1992 – Chuya Qellqa 1992 Tito 2 Bible Online

Tito 2 - Biblia Revisión Chuya Qellqa 1992 – Chuya Qellqa 1992 bible

Tito 2

¹Qamqa cheqap yachachikuyman hinayá yachachiy.

²Mayor señorkunaqa kananku: Allin yachayniyuqmi, respetachikuqmi, allin yuyaymanayniyuqmi, allin iñiyniyuqmi, kuyakuyniyuqmi hinaspa pacienciakuqmi.

³Chaynallataq mayor señorakunapas, allin kawsakuyta yachachunku, amayá cuento qepichu kachunku, nitaq tomaymanqa qokuruchunkuchu, aswanqa allin ejemployá kachunku.

⁴Sipas warmikunatayá yachachichunku imaynam qosanku kuyayta, wawanku kuyayta,

⁵allin yuyaymanayniyuq kayta, chuya sonqo kayta, wasinkupi imapas allin ruwakuyta, allin runa kayta hinaspa qosanku kasukuyta, chaynapi ama pipas Diospa palabranpa contranpi rimanankupaq.

⁶Jovenkunatapas allin yuyayniyuq kanankupaq rimapayay.

⁷Tukuy ima ruwasqaykipipas qamraqyá ejemploqa kay. Yachachispaykiqa cheqapman hina respetowan yachachiy,

⁸imam kaqta willakuy, contraykipi kaqpas penqakunanpa, chaynapi ñoqanchikmanta mana imatapas rimanankupaq.

⁹Esclavokunatapas rimapayay patronninkuta tukuy imapi kasukuspa kuyachikuq hinaspa mana kutipakuq kanankupaq,

¹⁰ama imantapas suwakuspayá confianza runakuna kachunku chaynata ruwaspam salvaqninchik Diospa yachachikuyninkunata vidankuwan tukuy imapi sumaqllataña qawachinqaku.

¹¹Diosmi kuyakuyninta qawachiwarqanchik llapallan runakuna salvasqa kanankupaq.

¹²Diospa kuyakuyninmi yachachiwanchik, mana allinkunata saqespa hinaspa aychapa munayninta saqespa, chaynapi allin yuyaymanaywan, allin ruwaywan hinaspa Diospa munasqanman hinaña kay pachapi kawsananchikpaq.

¹³Chaynataqa kawsananchik ancha munayniyuq Dios salvaqninchik Jesucristopa sumaqllaña kancharichkaq kutimunanta kusikuywan hinaspa confianzawan suyaspanchikmi.

¹⁴Paymi ñoqanchikrayku wañupuwarqanchik, tukuy mana allinkunamanta librawananchikpaq chaynataq huchanchikmanta chuyanchaykuwaspanchik llaqtantaña ruwaykuwananchikpaq, chaynapi allin kaqkunallataña ruway munaq kananchikpaq.

¹⁵Tukuy kaykunatam yachachinayki, kallpanchaspa, mana kasukuqkunata atiywan anyaspa. Amayá piwanpas penqaypiqa kaychu.