Read Biblia Revisión Chuya Qellqa 1992 – Chuya Qellqa 1992 Tito 3 Bible Online

Tito 3 - Biblia Revisión Chuya Qellqa 1992 – Chuya Qellqa 1992 bible

Tito 3

¹Iñiqkunatayá yuyarichiy, kamachikuqkunaman, autoridadkunaman sujetakunankupaq, kasukuqyá kachunku, allinkuna ruwayta chaylla ruwachunku.

²Amayá pimantapas mana allintaqa rimachunkuchu, hawkalla kawsakuspa kuyapayakuq kachunku, llampu sonqo kasqankuta lliw runakunaman ima ruwasqankupi qawachikuchunku.

³Ñawpaqtaqa ñoqanchikpas karqanchik, mana yuyayniyuqmi hinaspa mana kasukuqmi, pantaypi kaspam aychapa munayninkunapi chaynataq tukuy imaymana viciokunapa apasqan karqanchik, mana allinllapi yuyaymanaspam envidiakuspa kawsarqanchik, cheqnichikuspam kikinchikpurapas cheqninakurqanchik.

⁴Aswanqa salvaqninchik Diosmi sumaq sonqo kaynintawan kuyakuyninta runakunaman reqsichiwarqanchik.

⁵Payqa salvawarqanchik manam allinkuna ruwasqanchikraykuchu, aswanqa llakipayawaspanchikmi Chuya Espirituntakama, huchanchikmanta mayllaykuwaspanchik musoqmanta nacechiwarqanchik hinaspam musoq runataña ruwaykuwarqanchik.

⁶Salvaqninchik Diosninchikmi Jesucristontakama Chuya Espiritunta chaqchurimuwarqanchik.

⁷Kuyawaspanchikmi payqa mana huchayuqtaña chaskiykuwanchik, chaynapi confianzawan suyasqanchik wiñay kawsayta chaskinanchikpaq.

⁸Kay palabraqa cheqapmi, chayraykum aswanraq yachachinaykita munani, chaynapi Diosman iñiqkuna imapas allin ruwaykunapi kanankupaq. Kayqa mayna sumaqmi hinaspa runakunapa allinninpaqmi.

⁹Ichaqa yanqa atipanakuykunamanta karunchakuy, ñawpaq taytakunapa sutin yachaymanta hinaspa Moisespa leyninmanta atipanakuspa piñanakuykunamanta, chaykunaqa mana imapaq valeqmi nitaqmi ima allintapas apamuwanchikchu.

¹⁰Iñiqkunata umachaspa rakinakuyman apaq runataqa iskay-kimsa kutikama anyaptiki mana uyarikuptinqa qarqoruy.

¹¹Chay runaqa pantayman urmaykuspanmi huchallikuchkan, payqa yachakuchkanmi castiganapaqña kasqanta.

¹²Artemasta otaq Tiquicota qanman kachamuptiyqa Nicópolis llaqtapi tupananchikpaqmi utqayman hamunki. Chaypim poqoy tiempo pasayta munachkani.

¹³Abogado Zenastawan Apolostayá tukuy atisqaykiwan yanapaykuy, chaynapi illasqankupi mana imankupas pisinanpaq.

¹⁴Iñiqmasinchikkunapas allinkunata ruwaspa mana imayuqkunaman yanapaykuyta yachachunku, chaynapi ruwasqankuwan allin ruruchkaq hina kanankupaq.

¹⁵Llapallan ñoqawan kaqkunam rimaykamusunkichik. Rimaykapuwayá kuyaqninchik iñiqmasinchikkunatapas. Diosninchikyá kuyapayakuyninta qamkunaman chaqchurimusunkichik.