Read Biblia Revisión Chuya Qellqa 1992 – Chuya Qellqa 1992 Hebreos 5 Bible Online

Hebreos 5 - Biblia Revisión Chuya Qellqa 1992 – Chuya Qellqa 1992 bible

Hebreos 5

¹Llapallan Sumo sacerdotekunataqa Diosmi runakunamanta akllan, paykunaqa churasqa kachkanku runakunapa rantinpi Diosman asuykuspa, sacrificiokunatawan ofrendakunata Diosman presentanankupaqmi hinaspa animalkunatapas wañuchispa paypaq kañanankupaqmi.

²Sumo sacerdoteqa Diosta mana kasukuqkunamanta hinaspa huchapi kaq runamasinkunamantam llakipayarikun, paypas runa kayninpi pantaruq kasqanrayku.

³Chaymi Sumo sacerdoteqa kikinpa huchanmanta hinaspa runakunapa huchankumanta animalkunata wañuchispa Diosman sacrificiota ofrecenan.

⁴Manam pipas kikillanmantaqa Sumo sacerdoteqa kanmanchu, aswanqa kanman Aarón hina Diospa qayasqan kaqkunallam.

⁵Cristopas manam kikillanchu Sumo sacerdote kananpaq churakururqa aswanqa Diosmi nirqa: “Qanmi Churiy kanki, kunanmi ñoqa taytayki kani”, nispa.

⁶Huklawpipas kaynatam nichkan: “Qamqa wiñaypaq sacerdotem kanki. Imaynam Melquisedec karqa, chaynam qampas kanki”, nispa.

⁷Cristoqa kay pachapi kawsaspanmi qaparispan hinaspa waqaspan ruegakuyllawanña wañuymanta libray atiqnin Diosta mañakurqa, chaymi Diosqa payman sonqo kasqanrayku uyariykurqa.

⁸Diospa Churin kachkaspapas ñakarisqankunawanmi kasukuyta yacharqa.

⁹Chaykunawan qespichisqa karuspanmi llapallan kasuqnin runakunapaq wiñaypaq salvaqnin rikurirun.

¹⁰Diosñataqmi, imaynam Melquisedec karqa, chayna Sumo sacerdote kananpaq churarun.

¹¹Kaykunamantaqa achkaraqmi nimunay kachkan, ichaqa sasa yachachinam, hinaspapas qamkunaqa anaqtam uyarinkichik.

¹²Qamkunaqa unayña iñisqaykichikrayku hukkunamanpas yachachinaykichikña kachkaptinmi, qallariyninpi Diosmanta yachachikuy kaqkunallataraq huktawan uyariyta munachkankichik. Qamkunaqa wawakuna hinam lechellamantaraq kachkankichik, manaraqmi yuyayniyuq runakunapa mikunantaqa mikuwaqchikchu.

¹³Ñuñuq wawa hina lechellawanraq kawsaqkunaqa manaraqmi entiendenchu mayqanmi allin otaq mana allin yachachikuy kasqantapas.

¹⁴Mikuyqa yuyayniyuqkunapaqmi, paykunaqa entiendeqña kaspankum allin kaqtapas hinaspa mana allin kaqtapas reqsinku.