Read Biblia Revisión Chuya Qellqa 1992 – Chuya Qellqa 1992 Hebreos 6 Bible Online

Hebreos 6 - Biblia Revisión Chuya Qellqa 1992 – Chuya Qellqa 1992 bible

Hebreos 6

¹Chaynaqa, Cristomanta chayllaraq punta yachachikuykunaman amaña kutirispayá yuyayniyuqña kasunchik. Amañayá rimasunchu huchapi wañusqa hina kasqanchikmantapas, wanakuymantapas, Diosman iñiymantapas,

²bautismomantapas, iñiqkunapa hawanman maki churaymantapas, wañuqkuna kawsarimunanmantapas chaynataq wiñaypaq castigomantapas.

³Dios munaptinqa chaynatam ruwasunchik.

⁴Huk kutinpi achkiy chaskiqkunataqa, Diospa atiyninta chaskiqkunataqa, Chuya Espíritu chaskiqkunataqa,

⁵Diospa allin yachachikuynin chaskiqkunataqa hinaspa hamuq punchawkunapi admirakuypaq kaqkuna chaskiqkunataqa,

⁶huktawan huchaman wichiykuptinkuqa manañam pipas Diosman kutiykachiytaqa atinmankuñachu. Paykunaqa Diospa Churinta yapamanta chakataspankum penqayman churachkanku.

⁷Allinta parata chaskiq allpaqa tarpuqninpaqmi allin cosechata qon, chay allpaqa Diospa chaninchasqanmi.

⁸Kichkakunatawan kichkasapa qorakunata wiñachiq allpam ichaqa mana valeq, chayna allpaqa ñakasqa kaspanmi kañasqa kanqa.

⁹Kuyasqay wawqe-panillaykuna, chaynakunata rimachkaspapas ñoqaykuqa manam iskayrayanikuchu, salvakunaykichikpaq allin kaqkuna qamkunapi kasqanmantaqa.

¹⁰Diosqa allin ruwaqmi, paypaq llamkasqaykichiktaqa manam qonqanqachu, manataqmi qonqanqachu payta kuyaspa wawqe-panikunatapas yanapaspa kuyasqaykichiktapas, arí, chaynatam kunanpas servichkankichik.

¹¹Aswanqa munachkanikum kawsanaykichikkamaqa sapakama hina chayna kallpanchakuyllawan kanaykichikta, chaynapi suyasqaykichikta chaskinaykichikpaq.

¹²Amayá qellaqa kaychikchu, aswanqa iñiywan hinaspa pacienciawanyá Diospa promesan chaskiqkunapa ruwasqanta hina ruwaychik.

¹³Diosqa Abrahamman prometespanqa, paymanta aswan munayniyuq mana pipas kaptinmi kikinpa sutinpi jurarqa.

¹⁴Paymi nirqa: Anchallatañam bendecisqayki, chaynataqmi miraynikikunatapas anchallataña mirachisaq, nispa.

¹⁵Chaynapim Abrahamqa pacienciawan suyaspan, Diospa prometesqanta chaskirqa.

¹⁶Runakuna juraspaqa paykunamanta aswan munayniyuqpa sutinpim juranku imam rimasqankuta ruwayman churanankupaq hinaspa ima chaqwatapas upallachinankupaq.

¹⁷Chaynapunim Diospas tanteasqanmanta qepamanqa mana kutinmanchu. Chayraykum prometesqankunataqa herencia qosqan chaskiqkunaman juraspan cheqap kasqanta qawachirqa.

¹⁸Kay iskay rimasqankunaqa manam imaraykupas tikrakunmanchu, manataqmi Diospas llullakunmanchu, haykam Diosman hapipakuqkunaqa kallpanchakuytawan waqaychakuynintam chaskinchik, hinaspam confianza qowasqanchikman hapipakunchik.

¹⁹Lamar qochapa patanpi barca watasqa hinam confianzanchikqa almanchikta takyachin. Hanaq pacha templopi rakinaq telapa qepanpiñam confianzanchikqa Diospi churasqa kachkan.

²⁰Chaymanmi Jesusqa yaykurqa lliwmantapas puntata, ñoqanchikpaq ñanta kichapuwananchikpaq, yaykurqaqa Melquisedecman rikchakuq sacerdotekunapa kamachiqnin wiñaypaq karuspanmi.