Read Biblia Revisión Chuya Qellqa 1992 – Chuya Qellqa 1992 Santiago 2 Bible Online

Santiago 2 - Biblia Revisión Chuya Qellqa 1992 – Chuya Qellqa 1992 bible

Santiago 2

¹Kuyasqay wawqe-panillaykuna, atiyniyuq Señorninchik Jesucristopi iñiq kaspaykichikqa amayá pimanpas sayapakuychikchu.

²Ichapas huñunakusqaykichikman yaykuramunman qori anilloyuq hinaspa sumaqllaña pachayuq runa, yaykuramunmantaq pasaypaq mawka pachayuq wakcha runapas,

³hinaptinñataq qamkuna chay sumaqllaña pachayuq runata allinllataña chaskispa niwaqchik: “Hamuy, kay allin sitiopi tiyaykuy” nispaykichik hinaspa wakcha runatañataq niwaqchik: “Qamqa chayllapi sayay otaq kay pampallapi tiyakuy” nispaykichikqa,

⁴¿manachum hukllanman sayapakuchkankichik? Chaynaqa, mana allin tanteaq juez hinañam rikurirunkichik.

⁵Kuyasqay wawqe-panillaykuna, uyariykuwaychikyá, kay pachapi wakchakunataqa Diosninchikmi akllarqa iñiyninkupi apu kanankupaq hinaspa kuyaqninkunaman prometesqan Diospa munaychakusqanta chaskinankupaq.

⁶Qamkunaqa wakchakunatam usuchirqankichik. ¿Manachum apukunaqa munasqankuta ruwasunkichik hinaspa tribunalkunamanpas aysasunkichik?

⁷¿Manachum paykunaqa Cristopa sumaq sutin rimasqaykichikmanta imaymanata rimanku?

⁸Cheqaptapunipas sichum Qellqapa nisqanman hina: “Kuyankim runamasikita kikikita hina” nisqan cheqap leyta kasukuspaqa allintam ruwachkankichik.

⁹Pimanpas sayapakuspam ichaqa huchallikuchkankichik, Diospa leyninta mana kasuspam huchayuq kachkankichik.

¹⁰Pipas llapallan leyta kasukuchkaspa huknin kamachikuyllapipas pantaruspaqa, llapallan leymantañam huchayuq rikurirun.

¹¹Kikin Diosmi nirqa: “Amam waqllikunkichu” nispa, nirqataqmi: “Amam wañuchinkichu” nispapas. Pipas mana hukwan waqllikuchkaspa runamasinta wañurachispaqa llapallan leyta mana kasukuqñam rikurirun.

¹²Librawaqninchik leypa nisqanman hinam Cristo juzgawasunchik, chaynaqa allintayá rimaychik hinaspa ruwaychikpas.

¹³Pipas runamasin mana llakipayaqtaqa juicio punchawpim paytapas Cristo mana llakipayanqachu, runamasin llakipayaqtam ichaqa llakipayanqa.

¹⁴Wawqe-panillaykuna, pipas iñiyniyuqmi kani nichkaspan, ichaqa manataq allin kaqkunataqa ruwanmanchu hinaptinqa ¿imapaqtaq chay iñiyninqa valenman? ¿Yaqachum chay iñisqallan salvarunman?

¹⁵Sichum wawqe otaq huk panipas mana pachayuqña kanman, ichaqa manataq chay punchawpi mikunanpaqpas imanpas kanmanchu,

¹⁶hinaptinñataq hukkaqnikichik ninman: “Hawkalla rispayki mikumuy hinaspa qonikamuy” nispa. Ichaqa imapas necesitasqanta mana qoykuptinqa ¿imapaq serviqtaq chay nisqanqa kanman?

¹⁷Chaynataqmi pipapas iñiyninqa, sichum ruwaynin mana kaptinqa, wañusqam kachkan.

¹⁸Ichapas hukkaqnin ninman: “Qamqa iñiyniyuqmi kanki, ñoqañataqmi allinkuna ruwaq kani” nispa. ¿Imaynatataq qawachiwankiman iñiynikita allinkunata mana ruwaspaykiqa? Ñoqam ichaqa iñiyniyta qawachisqayki imapas allin ruwasqaywan.

¹⁹Qanmi creenki chullalla Dios kasqanta, allinmi chayqa. Aswanqa demoniokunapas creenmi hinaspam manchakuymanta katkatatanku.

²⁰¡Mana yuyayniyuq runa! Kaytayá yachay, iñiyqa wañusqam kachkan allin kaqkunata mana ruwasqaqa.

²¹Ñawpaq taytanchik Abrahamtapas allinkunata ruwasqanraykum Diosqa mana huchayuqpaqña chaskirqa. Paymi churin Isaacta Diosman ofrecerqa altarpa hawanpi.

²²Qawaychikyá, Abrahamqa iñiynintam ruwayninwan qawachikurqa, hinaptinmi iñiyninqa aswan allin qawasqa karqa ruwayninkunawan.

²³Chaynatam Qellqapa kayna nisqan cumplikurqa: “Abrahamqa Diosman iñisqanraykum mana huchayuqpaqña chaskisqa karqa” nispa. Chaynapim Abrahamqa Diospa amigon nispa sutichasqa karqa.

²⁴Chaynaqa, qawasqaykichikpi hinapas runaqa manam iñiyniyuq kasqallanwanchu mana huchayuqpaqña Diospa chaskisqanqa kachkan, aswanqa allinkuna ruwasqankunapiwanmi.

²⁵Chaynataqmi Rahab sutiyuq chuchumika warmipas llaqtan wateqaq runakunata pakaykurqa, hinaspam ayqekunankupaq yanapaykurqa, chaynapim allin ruwasqanwan mana huchayuqpaqña chaskisqa karqa.

²⁶Cuerponchikpas mana espirituwanqa wañusqam kachkan, chaynam iñiyninchikpas wañusqa kachkan allin kaqkunata mana ruwaptinchikqa.