Read Biblia Revisión Chuya Qellqa 1992 – Chuya Qellqa 1992 Santiago 4 Bible Online

Santiago 4 - Biblia Revisión Chuya Qellqa 1992 – Chuya Qellqa 1992 bible

Santiago 4

¹¿Maymantataq hamun qamkuna ukupi kaq guerrakunawan atipanakuykunaqa? Chaykunaqa hamun ukuykichikmantam, mana allin munasqaykichikmi sonqoykichikpi peleachkan.

²Imata munaruspapas manam haypankichikchu; wañuchinkichikmi, tukuy imata munaspam envidiakunkichik, manam chay munasqaykichiktaqa haypankichikchu, chaymi atipanakuspa peleankichik ichaqa Diosta mana mañakusqaykichikraykum ima munasqaykichiktapas mana chaskinkichikchu.

³Mañakuspapas manam chaskinkichikchu, mana allinta mañakusqaykichikrayku hinaspa aychaykichikpa munasqallanpi yanqachanaykichikpaq mañakusqaykichikrayku.

⁴¡Diosta qepanchakuq runakuna! ¿Manachu yachankichik kay pachapi kaqkunallata kuyaruspaqqa Diospa enemigonña kasqaykichikta? Pipas kay pachapi kaqkunallata kuyaruqqa Diospa enemigonmi rikurirun.

⁵Manam yanqachu Qellqaqa nin: “Ñoqanchikpi kawsaq Diospa Espiritunmi llumpa-llumpayta nanachikuwanchik”, nispa.

⁶Ichaqa Diosninchikmi kuyapayakuyninwan yanapawanchik. Chaymi Qellqapi kaynata nin: “Diosqa hatun tukuqkunapa contranpim kachkan, uchuychakuqkunatam ichaqa yanapan”, nispa.

⁷Chaynaqa, Diostayá kasukuychik. Diablopa contranpi allinta sayaychik, hinaptinqa qamkunamantam ayqekunqa.

⁸Diosmanyá asuykuychik, paypas qamkunamanmi asuykamusunkichik. Huchasapakuna, mana allin ruwasqaykichikmantayá chuyanchakuychik, iskayrayaqkuna sonqoykichiktayá chuyanchaychik.

⁹Llakikuychik, waqakuychik hinaspa qaparkachaychik. Asikuynikichiktapas waqakuymanñayá tikraychik, kusikuynikichiktapas llakikuymanñayá tikraychik.

¹⁰Señorninchikpa qayllanpiyá uchuychakuychik, hinaptinqa paypas hatunchasunkichikmi.

¹¹Wawqe-panillaykuna, huknikichikkunapa qepanpiqa amayá mana allintaqa rimaychikchu. Pipas runamasinpa qepanpi mana allinta rimaspaqa otaq juzgaspaqa, leypa contranpim rimachkan hinaspam leyta juzgachkan. Leyta juzgaspaqa manam leypa nisqantachu kasukuchkanki, aswanqa juezñam rikurirunki.

¹²Diosllam leytaqa qorqa, payllam juezpas, payllataqmi salvawaqninchikpas chaynataq condenawaqninchikpas, hinaptinqa ¿pitaq qamqa kanki runamasiki juzganaykipaqa?

¹³Kayta uyariychik: “Kunanmi otaq paqarinmi risunchik kay llaqtata otaq wak llaqtata hinaspam watantin negociota ruwamuspa qollqeta ganakamusunchik” nispa rimaqkuna.

¹⁴Qamkunaqa manam yachankichikchu paqarin punchaw imam pasarusunaykichiktaqa. Vidaykichikqa hukta rikuriramuspa chinkaruq puyu hinallam.

¹⁵Kaynatam rimananchikqa: “Dios munaptinqa kawsaspachiki kayta-wakta ruwasunchik” nispam.

¹⁶Qamkunam ichaqa hatun tukuspa kikillaykichikmanta alabakunkichik, chayna hatun tukuyqa manam allinchu.

¹⁷Pipas allinkuna ruwayta yachachkaspa mana ruwaqqa huchallikunmi.