Read Biblia Revisión Chuya Qellqa 1992 – Chuya Qellqa 1992 1 Juan 1 Bible Online

1 Juan 1 - Biblia Revisión Chuya Qellqa 1992 – Chuya Qellqa 1992 bible

1 Juan 1

¹Tukuy imapas manaraq unanchasqa kachkaptinqa kawsay qokuq Simiqa karqañam. Paytam ñoqaykupuni uyarirqaniku, rikurqaniku hinaspa makiykuwan llapcharqaniku.

²Kay kawsaymi rikuriykuwarqaku, chaytam rikurqaniku hinaspam rikusqaykumanta testigo kaspa qamkunamanpas wiñay kawsakuymanta willamuykiku. Kay wiñay kawsayqa Dios Taytawanmi karqa hinaspam ñoqaykuman rikuriykuwarqaku.

³Chayna rikusqaykutawan, uyarisqaykutam willakuniku, chaynapi qamkunapas ñoqaykuwan huklla kanaykichikpaq, imaynam ñoqaykupas Dios Taytawan hinaspa Churin Jesucristowan huklla kasqaykuta hina.

⁴Kaykunatam qellqamuykiku kusikuynikichik qespichisqa kanapaq.

⁵Jesucristopa imam yachachiwasqankutam qamkunaman willamuykiku: Diosqa achkiymi, paypiqa manam tutayayqa kanchu.

⁶Sichum, paywanmi huklla kachkani nichkaspa tutayaypiraq kawsaspanchikqa llullakuchkanchikmi, manam cheqapman hinachu ruwachkanchik.

⁷Imaynam Diospas achkiypi kachkan, chaynayá ñoqanchikpas achkiypi kawsasun, kikinchikpurapas hukllayá kasun, hinaptinqa Diospa Churin Jesucristopa yawarninmi lliw huchanchikkunamanta mayllawasun.

⁸Mana huchayuqmi kani nispanchikqa kikillanchiktam engañakuchkanchik, hinaptinqa cheqap kaqqa manam ñoqanchikpiqa kanchu.

⁹Sichum huchanchikkunata willakuptinchikqa, paymi mana engañakuspa allin ruwaq kasqanrayku pampachawasun, hinaspam tukuy mana allin ruwasqanchikmanta mayllawasun.

¹⁰Sichum nisunchik: “Manam huchallikunichu” nispa, hinaspaqa Diostam llullapaq hapichkanchik, chaynapiqa palabranqa manam ñoqanchikpichu kachkan.