Read Biblia Revisión Chuya Qellqa 1992 – Chuya Qellqa 1992 1 Juan 2 Bible Online

1 Juan 2 - Biblia Revisión Chuya Qellqa 1992 – Chuya Qellqa 1992 bible

1 Juan 2

¹Kuyasqay churillaykuna, mana huchallikunaykichikpaqmi kaykunata qellqamuykichik. Sichum pipas huchallikuruptinqa Dios Taytanchikpa qayllanpi rimarinanpaqmi abogadonchik Jesucristo kapuwachkanchik.

²Paymi huchanchikrayku castigasqa kananchikmanta wañurqa, manataqmi ñoqallanchikpaqchu aswanqa kay pachapi llapallan runakunapaqwanmi.

³Kamachikuyninkunata kasukuspam yachanchik Dios reqsisqanchikta.

⁴Pipas: “Ñoqaqa Diosta reqsinim” nichkaspan, kamachikuyninkunata mana kasukuspanqa llullakuchkanmi, paypiqa cheqap kaqqa manam kanchu.

⁵Diospa palabrankunata kasukuspa waqaychaqpiqa Diospa kuyakuyninmi cheqapta qawachikun, chayraykum yachanchik Dioswan huklla kasqanchikta.

⁶“Dioswanmi hukllaña kachkani” niqqa Jesucristopa kawsasqanman hinam purinan.

⁷Kuyasqay wawqe-panillaykuna, manam musoq kamachikuytachu qellqamuchkaykichikqa, aswanqa ñawpaqmantaraq chaskisqaykichik kamachikuykunallatam. Chay ñawpaq kamachikuyqa uyarisqaykichik Diospa palabranmi.

⁸Chaywanpas, kay qellqamusqayqa musoq kamachikuymi, kayqa cheqapmi Cristopipas chaynataq qamkunapipas, tutayaymi pasachkanña cheqap achkiyñataqmi kanchaykamuchkanña.

⁹Sichum pipas ninqa “Achkiypim kachkani” nispa, ichaqa runamasintañataq cheqninqa hinaspaqa tutayaypiraqmi purichkan.

¹⁰Pipas iñiqmasinta kuyaqmi ichaqa achkiypi purichkan, payqa manam iñiqmasintaqa imawanpas huchallichinmanchu.

¹¹Pipas iñiqmasinta cheqniqqa tutayaypiraqmi kawsachkan, payqa manam yachanchu mayman risqantapas, ñawinta tutayay ñawsayarachisqanrayku.

¹²Churillaykuna, qamkunamanmi qellqamuykichik Jesucristopa sutinpi huchaykichikkunata Dios pampachasqanrayku.

¹³Tayta-mamakuna, qamkunamanmi qellqamuykichik qallariyninmanta kaqta reqsisqaykichikrayku. Jovenkuna, qamkunamanmi qellqamuykichik diablota vencerusqaykichikrayku. Churillaykuna, qamkunamanmi qellqamuykichik Dios Taytanchikta reqsisqaykichikrayku.

¹⁴Tayta-mamakuna, qamkunamanmi qellqamuykichik qallariyninmanta kaqta reqsisqaykichikrayku. Jovenkuna, qamkunamanmi qellqamuykichik qaqa hina sayasqaykichikrayku, Diospa palabran sonqoykichikpi takyachisqaykichikrayku hinaspa diablota vencesqaykichikrayku.

¹⁵Amayá kuyaychikchu kay pachapi mana allin ruwaykunataqa nitaq kay pachapi mana allin kaqkunatapas, chaykunata kuyaqqa manam Dios Taytataqa kuyanchu.

¹⁶Kay pachapi kaqkunaqa kaykunam: Aychapa mana allin munapayayninkuna, ñawipa munapayayninkuna hinaspa imapas kapuqniyuq kaspa hatunchakuykuna, kay mana allin ruwaykunaqa manam Dios Taytamantachu hamun, aswanqa kay pachapi kaqkunallamantam.

¹⁷Kay pachapi mana allin ruwaykunawan mana allin munaykunaqa tukuruqllam, Diospa munasqanta ruwaqmi ichaqa wiñaypaq kawsanqa.

¹⁸Kuyasqay churillaykuna, ñam tukupay tiempopiña kachkanchik. Anticristopa hamunanmantaqa ñam uyarirqankichikña, chaymi kunanqa achkallaña anticristokuna rikuriramunku, chaynapim yachanchik tukupay tiempoña kasqanta.

¹⁹Paykunaqa ñoqanchikmantam lloqsirunku, ichaqa manam ñoqanchik partechu karqaku, sichum ñoqanchik parte kaspankuqa ñoqanchikwanchá sayanmanku karqa. Paykunaqa lloqsirunku mana lliwchu iñiqmasinchik kasqanta yachanapaqmi.

²⁰Qamkunamanmi ichaqa Chuya Espirituta Cristo qosurqankichik, chaymi tukuy chaykunata yachankichik.

²¹Qellqamuchkaykichikqa manam cheqap kaqkunata mana yachasqaykichikraykuchu, aswanqa reqsisqaykichikraykum, yachasqanchikpi hinapas llulla kaqkunaqa manam cheqapmantachu hamun.

²²¿Pitaq chay llullaqa? “Jesusqa manam Cristochu” niqmi llullaqa. Payqa anticristom, payqa neganmi Dios Taytatapas chaynataq churin Jesucristotapas.

²³“Jesucristoqa manam Diospa Churinchu” niq runapa sonqonpiqa manam Dios Taytapas kanchu. “Jesucristoqa Diospa Churinmi” niqkunapa sonqonpim ichaqa Dios Taytapas kachkan.

²⁴Chaynaqa, ñawpaqmantaraq uyarisqaykichik Diospa palabrantayá sonqoykichikpi takyachiychik. Sichum ñawpaqmantaraq uyarisqaykichikkunata sonqoykichikpi waqaychaspaqa, Churin Jesucristopipas hinaspa Dios Taytapipas takyankichikmi.

²⁵Cristopa prometewasqanchikqa wiñay kawsaymi.

²⁶Qamkunata pantachiy munaqkunamantam qellqamuchkaykichikqa.

²⁷Qamkunapim kachkan Jesucristopa qosusqaykichik Chuya Espíritu, chaymi mana necesitankichikchu pipas yachachisunaykichiktaqa. Qosusqaykichik Chuya Espiritum tukuy cheqap kaqkunata yachachisunkichik chayqa manam llullachu. Chaynaqa, yachachisusqaykichikman hinayá Cristopi takyaychik.

²⁸Churillaykuna, kunanqa Jesucristopiyá takyaychik chaynapi pay kutimuptin penqakuymanta ama ayqenanchikpaq.

²⁹Jesucristoqa allinkuna ruwaq kasqanta yachaspaykichikqa, qamkunapas yachaychiktaqyá haykam allinkuna ruwaqkunaqa Jesucristomanta nacesqaña kasqankuta.