Read Biblia Revisión Chuya Qellqa 1992 – Chuya Qellqa 1992 1 Juan 3 Bible Online

1 Juan 3 - Biblia Revisión Chuya Qellqa 1992 – Chuya Qellqa 1992 bible

1 Juan 3

¹Qawariychik, mayna-maynatam Dios Taytaqa kuyawanchik, Diospa churinwan sutichasqa kananchikpaq. Chayraykum kay pachapi runakunaqa mana reqsiwanchikchu, Diosta mana reqsisqankurayku.

²Kuyasqay wawqe-panikuna, Diospa churinñam kanchik, aswanqa manaraqmi yachanchikchu imaynam kananchikmantaqa. Yachanchikmi ichaqa Jesucristo rikurimuptin payman rikchakuq kananchikta, paytam rikuykusun imaynam kasqanman hina.

³Pipas paypi confiakuspan suyaqqa huchankunamantam chuyanchakun, imaynam Jesucristopas mana huchayuq kasqanman hina.

⁴Pipas huchallikuqqa leytapas manam kasukunchu, huchaqa ley mana kasukuymi.

⁵Yachasqaykichikpi hinapas Jesucristoqa kay pachamanqa hamurqa huchanchikta qechunanpaqmi, payqa mana huchayuqmi karqa.

⁶Pipas paypi takyaqqa manam huchallikunñachu. Pipas huchallikuqqa manam paytaqa rikunraqchu nitaqmi reqsinraqchu.

⁷Churillaykuna, amayá piwanpas engañachikuychikchu, pipas allin ruwaqqa Jesucristo hina allin ruwaqmi.

⁸Pipas hucha ruwaqqa diablopam, diabloqa qallariyninmantapuni huchallikuqmi. Diospa Churinqa rikurimurqa diablopa ruwasqankunata tuñichinanpaqmi.

⁹Diospaqña musoqmanta naceqkunaqa manañam huchallikunkuñachu Diospa kawsaynin paykunapi kasqanrayku, manañaqa huchallikunkuchu Diospa churinña kasqankuraykum.

¹⁰Suti reqsiyllam Diospa churinkunaqa, suti reqsiyllataqmi diablopa churinkunapas. Allin kaqkunata mana ruwaqqa hinaspa runamasinta mana kuyaqqa, manam Diospa churinchu.

¹¹Ñawpaqmantaraq yachachikuy uyarisqaykichikqa kaymi: Huknikichikmanta huknikichikkamayá kuyanakuychik.

¹²Amayá Caín hinachu kasun, payqa diablopa runanmi karqa, chaymi wawqenta wañurachirqa. ¿Imanasqataq wañurachirqa? Paypa ruwayninkuna mana allin kasqanraykum, Abelpa ruwayninkunañataqmi allin karqa.

¹³Wawqe-panillaykuna, kay pachapi mana allin ruwaqkuna cheqnisuptikichikqa, amayá hukmanyaychikchu.

¹⁴Ñoqanchikqa wañuymantam kawsaymanña pasarunchik, chaytaqa yachanchik iñiqmasinchikkunata kuyasqanchikwanmi. Chayna mana kuyaqqa hinallaraqmi wañusqa kachkan.

¹⁵Pipas iñiqmasinta cheqniqqa runa wañuchiqmi. Yachasqanchikpi hinapas runamasin wañuchiqqa manaraqmi wiñay kawsayniyuqchu.

¹⁶Kaywanmi yachanchik imaynam kuyakuy kasqanta, Jesucristom vidanta qorqa ñoqanchikrayku, chaynam ñoqanchikpas runamasinchikrayku vidanchikta qonanchik.

¹⁷Pipas kapuqniyuq kachkaspan runamasinta imamantapas muchuqta qawakunman hinaspa imallantapas mana qoykuqqa ¿yaqachum Diosta kuyanman?

¹⁸Churillaykuna, amayá simillawanchu kuyanakusunchikqa, aswanqa cheqap ruwaywanyá kuyanakuychik.

¹⁹Kaywanmi yachanchik cheqap kaqpa kasqanchikta, hinaspam paypa ñawpaqninpi confianzallawanña kasunchik.

²⁰Sichum sonqonchik acusawachkaptinchikqa maynataraqcha Diosninchikqa acusawasun, payqa lliwtam yachan.

²¹Kuyasqallaykuna, sonqonchik mana acusawaptinchikqa Diospim confianzanchik kachkan,

²²imatapas mañakuptinchikqa payqa qowasunmi, kamachikuyninkunata kasukusqanchikrayku chaynataq paypa munasqanta ruwasqanchikrayku.

²³Kamachiwanchikqa Churin Jesucristoman iñinanchikpaqmi hinaspa kuyanakunanchikpaqmi.

²⁴Kamachikuyninkunata kasukuq runaqa Diospim takyachkan, Diospas paypitaqmi takyachkan. Qowasqanchik Espiritupa yanapakuyninwanmi yachanchik payqa ñoqanchikpi kasqanta.