Read Biblia Revisión Chuya Qellqa 1992 – Chuya Qellqa 1992 Jueces 1 Bible Online

Jueces 1 - Biblia Revisión Chuya Qellqa 1992 – Chuya Qellqa 1992 bible

Jueces 1

¹Josué wañukuptinmi, Tayta Diosta Israelpa mirayninkuna kaynata tapurqaku: ¿Mayqanniykutaq puntata risaqku cananeokunawan peleamunaykupaq? nispanku.

²Hinaptinmi Tayta Dios nirqa: Judá ayllum puntataqa rinqa, ñoqam chay allpata paykunaman qosaq, nispa.

³Chaymi Judá ayllukuna castamasin Simeón ayllukunata nirqaku: Tupawaqniyku herencia allpaman hakuchik hinaspa cananeokunawan peleamusun, chaynachiki ñoqaykupas tupasuqnikichik allpaman riysisqaykiku, nispa. Hinaptinmi Simeón ayllukunaqa paykunawan rirqaku.

⁴Ceneokunapa chaynataq ferezeokunapa allpanman Judá ayllukuna yaykuruptinkum, Tayta Dios paykunaman cananeokunapa chaynataq ferezeokunapa allpanta qoykurqa, chaynapim chunka waranqa runakunata Bezec lawpi vencerurqaku.

⁵Chaypim rey Adoni-bezecta tarirurqaku, hinaspam paypa contranpi peleaspanku cananeokunatawan ferezeokunata vencerurqaku.

⁶Rey Adoni-bezecñataqmi lluptikururqa; ichaqa Israel castakunam hapiruspanku makinkunapa hinaspa chakinkunapa maman dedonkunata qorururqaku.

⁷Chaymi rey Adoni-bezec nirqa: Qanchis chunka reykunapa makinkunapa hinaspa chakinkunapa maman dedonkunatam qoruchirqani, paykunam mesaymanta mikuy wichiqkunata huñuspa mikuqku. Diospas ruwasqayman hinallam pagaykapuwan, nispa. Adoni-bezecta Jerusalén llaqtaman pusamuptinkum chaypi wañukurqa.

⁸Judapa mirayninkunam Jerusalén llaqtapa contranpi peleaspanku vencerurqaku, hinaspam chaypi yachaqkunata espadawan wañurachispanku llaqtankutapas kañaykurqaku;

⁹chaymantam orqokunapi, Neguev lawpi chaynataq waqtakunapi yachaq cananeokunapa contranpi peleaq rirqaku.

¹⁰Ñawpaqta Quiriat-arba nispa sutichasqanku Hebrón llaqtamanpas yaykuruspankum cananeokunapa contranpi peleaspa, Sesaita, Ahimanta hinaspa Talmaita wañurachirqaku.

¹¹Rirqakutaqmi ñawpaqta Quiriat-seferwan sutichasqanku Debir llaqtapi yachaqkunapa contranpi peleaqpas.

¹²Calebmi nirqa: Pipas Quiriat-sefer llaqtaman yaykuspa venceruqtaqa warmi churiy Acsawanmi casarachisaq, nispa.

¹³Hinaptinmi Cenazpa churin Otoniel vencerurqa, Cenazqa karqa Calebpa sullkanmi; chaymi Calebqa warmi churin Acsawan Otonielta casarachirqa.

¹⁴Otonielñataqmi warmin Acsata umacharqa taytan Calebmanta chakrata mañakunanpaq. Chaymi asnonmanta Acsa uraykuptin taytan Caleb tapurqa: ¿Imataq pasasunki? nispa.

¹⁵Acsañataqmi nirqa: Neguev allpata qoykuwachkaspaykiqa ama hina kaspayá pukyukunatapas qoykuway, nispa. Chaymi hanay lawpi pukyukunatawan uray lawpi pukyukunata Caleb qoykurqa.

¹⁶Moisespa suegron ceneopa mirayninkunam Judapa mirayninkunawan Palmeras sutiyuq llaqtamanta Judá lawpi chunniqman rirqaku, chay chunniqqa kachkan Neguev law Arad llaqtapa hichpanpim. Rispankum chaypi runakunawan yacharqaku.

¹⁷Judá ayllukunam castamasin Simeón aylluwan rispanku Sefat llaqtapi yachaq cananeokunata vencerurqaku, chay llaqtatam purmarachispanku Hormawan suticharqaku.

¹⁸Judá ayllukunam Gaza llaqtata Ascalón llaqtata, Ecrón llaqtata chaynataq muyuriqninpi allpakunatapas hapikuykurqaku.

¹⁹Judá ayllukunam Tayta Dios yanapaptin orqokunapi yachaqkunata qarqorurqaku. Qechwapi yachaqkunatam ichaqa mana qarqoyta atirqakuchu, guerrapaq carretanku fierromanta kasqanrayku.

²⁰Moisespa nisqanman hinam, Hebrón llaqtata Calebman qorqaku. Calebñataqmi chay llaqtamanta Anacpa kimsa churinkunata qarqorurqa.

²¹Benjaminpa mirayninkunam ichaqa Jerusalenpi yachaq jebuseokuna qarqoyta mana atirqakuchu, chayraykum jebuseokunaqa Benjaminpa mirayninkunawan Jerusalenpi yacharqaku. Chaypim kunankamapas yachachkanku.

²²José ayllukunapas Tayta Dios yanapaptinmi Bet-el llaqtapa contranpi rirqaku.

²³Paykunam Bet-el llaqtapa contranpi wateqaqkunata churarqaku. Bet-el llaqtatam ñawpaqta Luz nispa suticharqaku.

²⁴Chay wateqaqkunam, huk runata llaqtamanta lloqsimuchkaqta rikuruspanku nirqaku: Sichum imaynam llaqtaman yaykuna kasqanta willaykuwaptikikuqa llakipayaspam mana imanasqaykikuchu, nispanku.

²⁵Chay runam mayninmi yaykunata qawaykachirqa, hinaptinmi chay llaqtapi llapa runakunata espadawan wañurachirqaku; llaqtaman mayninmi yaykuna qawachiq runatam ichaqa llapa aylluntinta mana imanarqakuchu.

²⁶Hinaptinmi chay runaqa heteokunapa allpanman ripukuspan chaypi huk llaqtata hatarichispan Luzwan suticharqa. Chay llaqtapaqa kunankamapas hina chaynam sutin.

²⁷Manasés ayllukunapas manam qarqoyta atirqachu Bet-seán llaqtapi, Taanac llaqtapi, Dor llaqtapi, Ibleam llaqtapi, Meguido llaqtapi hinaspa muyuriqninpi kaq taksa llaqtakunapi yachaq runakunatapas. Chaynapim cananeokunaqa hinalla chay llaqtakunapi yachakurqaku.

²⁸Israelpa mirayninkunam atiyniyuqña rikuriruspanku llapa cananeokunata mana imallapaq llamkachikurqaku, ichaqa manam qarqoyta atirqakuchu.

²⁹Efraín ayllupas manam Gezer llaqtapi yachaq cananeokuna qarqoyta atirqachu, chaymi cananeokunaqa paykunawan kuska Gezer llaqtapi yacharqaku.

³⁰Zabulón ayllupas manam Quitrón llaqtapi chaynataq Naalal llaqtapi yachaqkunata qarqoyta atirqachu, chayraykum cananeokunaqa paykunawan yachaspa mana imallapaq llamkapurqaku.

³¹Aser ayllupas manam Aco llaqtapi, Sidón llaqtapi, Ahlab llaqtapi, Aczib llaqtapi, Helba llaqtapi, Afec llaqtapi hinaspa Rehob llaqtapi yachaqkunataqa qarqoyta atirqachu.

³²Chaynapim Aser aylluqa mana qarqosqankurayku cananeokunawan kuska yacharqa.

³³Neftalí ayllupas manataqmi Bet-semes llaqtapi hinaspa Bet-anat llaqtapi yachaqkunata qarqoyta atirqachu, aswanqa cananeokunapa chawpinpim yacharqa; hinaspam Bet-semes llaqtapi yachaqkunatawan Bet-anat llaqtapi yachaqkunata mana imallapaq llamkachikurqaku.

³⁴Llapa amorreokunam Dan aylluta orqokunaman qatirurqaku, hinaspam qechwaman uraykamunankuta mana munarqakuchu.

³⁵Chaynapim amorreokunaqa Heres orqopi, Ajalón qechwapi hinaspa Saalbim llaqtapi hinalla yacharqaku. Ichaqa José ayllukunam atiyniyuq rikuriruspanku paykunata mana imallapaq llamkachikurqaku.

³⁶Amorreokunapa allpanqa, Acrabim qasamanta qallaykuspam Sela llaqtanta hanayman rirqa.