Read Biblia Revisión Chuya Qellqa 1992 – Chuya Qellqa 1992 Jueces 12 Bible Online

Jueces 12 - Biblia Revisión Chuya Qellqa 1992 – Chuya Qellqa 1992 bible

Jueces 12

¹Efraín ayllumanta kaq qarikunam huñunakuruspanku Jordán mayuta chimparuspa Zafón lawman rispanku Jefteyta nirqaku: Amonitakunapa contranpi peleaq richkaspaqa ¿imanasqataq mana qayamuwarqankikuchu qamkunawan rinaykupaq? kunanmi wasikita, qamtawan kuskata kañaykusqaykiku, nispanku.

²Hinaptinmi Jefté nirqa: Ñoqam runaykunapiwan Amonpa mirayninkunawan hatun peleopi karqaniku, hinaspam qayamurqaykiku, ichaqa manam yanapaykuwarqankikuchu.

³Mana yanapawasqaykikuta qawaspaymi vidayta wañuyman churaspay llapa amonitakunawan peleamurqani, hinaptinmi Tayta Dios makiyman churaykurqa. Chaynaqa, ¿imanasqamá kunanqa ñoqapa contraypi peleanaykichikpaqqa hamurunkichik? nispa.

⁴Chaymi Jefteyqa, Galaad lawpi llapallan runakunata huñuruspan Efraín ayllupa tropankunawan pelearqa, hinaptinmi Galaad lawmanta kaqkuna Efraín castakunata vencerurqaku. Efraín castakunam nirqaku: Galaad lawpi yachaqkuna, qamkunaqa Efraín ayllumanta hinaspa Manasés ayllumanta lluptimuqkunam kankichik, nispanku.

⁵Hinaptinmi Galaad lawmanta kaqkuna, Efraín castakuna mana chimpanankupaq Jordán mayupa vadonkunapi churakururqaku. Efraín castamanta lluptiqkuna “pasaytam munaniku” niptinkupas, Galaad lawmanta kaqkunam tapuqku: “¿Efraín ayllumantachu kankichik?” nispanku. “Manam” niptinkuqa,

⁶kaynatam niqku: Chaynaqa, “Shibolet” nispayá niychik, nispanku. Chaymi: “Shibolet” niyta mana atiptinkuqa hapiruspa Jordán mayupa vadonpi wañuchiqku. Chaynapim Efraín ayllumanta kaqkuna tawa chunka iskayniyuq waranqa wañururqaku.

⁷Jefteymi soqta wata Israel nacionpi kamachikurqa. Galaad lawmanta kaq Jefté wañukuptinmi, maymi nacesqan llaqtapi pamparurqaku.

⁸Jefté wañukuptinmi Israel castakunata Belén llaqtamanta kaq Ibzán sutiyuq runaña kamachirqa.

⁹Paypam karqa kimsa chunka qari churinkunawan kimsa chunka warmi churinkuna, llapallantam mana ayllunmanta kaqkunawan casarachirqa. Ibzanmi qanchis wata Israel nacionpi kamachikurqa.

¹⁰Ibzán wañukuptinmi Belén llaqtapi pamparurqaku.

¹¹Ibzanpa qepantam Israel nacionpi kamachikurqa Zabulón ayllumanta kaq Elonña, paymi chunka wata Israel nacionpi kamachikurqa.

¹²Zabulón ayllumanta kaq Elón wañukuptinmi Zabulón ayllupa allpan Ajalón llaqtapi pamparurqaku.

¹³Elonpa qepantam Piratón lawmanta kaq Hilelpa churin Abdonña Israel nacionpi kamachikurqa.

¹⁴Abdonpam karqa tawa chunka churinkuna hinaspa kimsa chunka willkankuna; paykunam qanchis chunka asnokunapi sillakuqku. Abdonmi pusaq wata Israel nacionpi kamachikurqa.

¹⁵Piratón lawmanta kaq Hilelpa churin Abdón wañukuptinmi Piratón lawpi pamparurqaku. Piratonqa Amalec law orqokunapi otaq Efraín ayllupa allpanpim tarikun.