Read Biblia Revisión Chuya Qellqa 1992 – Chuya Qellqa 1992 Jueces 16 Bible Online

Jueces 16 - Biblia Revisión Chuya Qellqa 1992 – Chuya Qellqa 1992 bible

Jueces 16

¹Gaza llaqtaman Sansón rispanmi, huk chuchumika warmita rikururqa, hinaspam paywan puñurqa.

²Gaza llaqtayuqkunañataqmi, Sansonpa hamurusqanta yacharuspanku, llaqtapa muyuriqninpi churakuruspankum punkunkunatapas upallalla tukuy tuta wateqarqaku, “achikyaruptinñam wañurachisunchik” nispanku.

³Sansonmi ichaqa chawpi tutakamalla puñururqa. Chaylla hatariruspanmi, llaqtapa punkunta, pilarnintinta hinaspa cerrojontinta hombrorikuspan Hebronpa chimpan moqopa puntankama aparurqa.

⁴Chaymantam Sansonqa, Sorec wayqopi yachaq Dalila sutiyuq warmitaña kuyarurqa.

⁵Dalilapa wasinman rispankum, filisteokunapa kamachiqninkuna nirqaku: Imaynanpim kallpasapa kasqantawan imaynatam vencerunaykumanta llullallawan Sansonta tapuruy, chaynapi chaqnaruspa presocharunaykupaq; ruwasqaykimantaqa sapakamam chunka kimsayuq kilo qollqeta qosqaykiku, nispanku.

⁶Chaymi Sansonta Dalila nirqa: Ama hina kaspaykiyá imaynanpim kallpasapa kasqaykita willaykuway. ¿Imawantaq chaqnarachikuwaq vencesqa kanaykipaq? nispa.

⁷Hinaptinmi Sansón nirqa: Sichum manaraq chakisqa qanchis waskakunawan chaqnaruwaptinkuqa, kallpay pisiruptinmi wakin runakuna hinallaña rikurirusaq, nispa.

⁸Filisteokunapa kamachiqninkunaman Dalila willaykamuptinmi, manaraq chakisqa qanchis waskakunata aparamurqaku, hinaptinmi Sansonta chaykunawan Dalila chaqnarurqa.

⁹Filisteokuna Dalilapa wasinpi pakakusqa kachkaptinkum Dalila nirqa: ¡Sansón, filisteokuna hawaykipiña! nispa. Chaymi waskakunata Sansón tipirurqa, ninapa rupasqan lino qaytuta hinalla, chayraykum imapim kallpan kasqantapas mana yacharqakuchu.

¹⁰Chaymantam Sansonta Dalila nirqa: Llullakuspam yanqakunallata niwanki, ama hina kaspayá willaykuway imaynatataq chaqnaruykiman, nispa.

¹¹Hinaptinmi Sansón nirqa: Sichum musoq waskakunawan teqoy-teqoyta chaqnaruwaptinkuqa kallpay pisiruptinmi wakin runakuna hinallaña rikurirusaq, nispa.

¹²Chaymi musoq waskakunawan chaqnaruspan Dalila nirqa: ¡Sansón, filisteokuna hawaykipiña! nispa. Filisteokunam Dalilapa wasinpi pakakuspa kachkarqaku, Sansonmi ichaqa chay chaqnachikusqan waskakunata huk qaytuta hinalla tipirurqa.

¹³Hinaptinmi Sansonta Dalila nirqa: Kunanpas yanqakunallata niwaspaykim llullakuruwanki. Kunanyá ichaqa niykuway ¿imawantaq chaqnaruykiman? nispa. Chaymi Sansón nirqa: Sichum chukchayta qanchisman simparuspa telarpi qaytukunawan kuskata simparuspa sumaqta pampaman estacaruptikiqa kallpay pisiruptinmi wakin runakuna hinallaña rikurirusaq, nispa. Chaymi Sansonta Dalila puñurachispa qanchisman simpasqa chukchankunata telarpi qaytukunawan kuskata simparurqa,

¹⁴hinaspam pampaman estacaruspan nirqa: ¡Sansón, filisteokunam hawaykipiña! nispan. Sansonmi ichaqa puñusqanmanta rikchariruspan estacata telarnintinta chutarurqa.

¹⁵Chaymi Dalila nirqa: ¡Yaw llulla! ¿Imanasqataq mana kuyawachkaspaykiqa “kuyaykim” niwanki? Ñam kimsa kutikamaña engañaruwanki, ¿imanasqataq kallpasapa kasqaykita mana willawankichu? nispa.

¹⁶Dalilam sapa punchaw chayllataña tapupayaspan Sansonta piñachirqa, chayraykum wañukuytaña munaspan

¹⁷chay secretonta willaykurqa: Manam haykapipas chukchayta rutuwarqakuchu, ñoqaqa mamaypa wiksanmantapunim Diospaq sapaqchasqa kani. Sichum chukchayta ruturuwaptinkuqa kallpaymi ñoqamanta chinkarunman, kallpay chinkaruptinqa wakin runakuna hinallañam rikuriruyman, nispa.

¹⁸Sansonpa tukuy secretonta Dalila yacharuspanmi filisteokunapa kamachiqninkunata qayarachimuspan nirqa: Kunanqa hamuychikña, payqa tukuy secretontam willaykuwanña, nispa. Chaymi filisteokunapa kamachiqninkuna qollqeta aparikuspanku hamurqaku.

¹⁹Dalilam Sansonta moqonkunapa hawanpi puñurachirqa, hinaspam huk qarita qayaykuspan qanchisman simpasqa chukchanta ruturachirqa. Kallpan chinkaruptinmi burlakuyta qallaykuspan

²⁰nirqa: ¡Sansón, filisteokuna hawaykipiña! nispa. Sansonñataqmi puñusqanmanta rikchariruspan yuyaymanarqa: Kunanpas wakin kutipi hinam librakurusaq, nispa. Manam yacharqachu paymanta Tayta Dios karunchakurusqantaqa.

²¹Filisteokunañataqmi Sansonta hapiruspanku ñawinkunata hurqorurqaku, hinaspam Gaza llaqtaman aparqaku, chaypim broncemanta cadenawan wataruspanku carcelpi kaq molinopi kutachirqaku.

²²Ichaqa rutusqa chukchanmi kasqallan wiñayta qallaykurqa.

²³Filisteokunapa kamachiqninkunam huñunakururqaku Dagón sutiyuq idolonkuta yupaychaspa animalkunata wañuchipunankupaq, paykunam kusikuspa nirqaku: Diosninchikmi Sansonta qoykuwanchik. Enemigonchik runatam qoykuwanchik, nispanku.

²⁴Wakin runakunapas Sansonta qawaykuspankum diosninkuta kaynata yupaycharqaku: Diosninchikmi Sansonta qoykuwanchik, enemigonchik runatam qoykuwanchik, chakranchikkuna purmachiqtam qoykuwanchik, ayllunchikkuna wañuchiqtam makinchikman churaykun, nispanku.

²⁵Llumpay kusisqa kaspankum nirqaku: Asichiwananchikpaq Sansonta pusamuychik, nispanku. Sansonta carcelmanta pusaramuptinkum paykunapa qayllanpi asichiqninku karqa. Chaymantam Sansonta pilarkunapa chawpinman sayaykachirqaku.

²⁶Chaymi pusaqnin warmata Sansón nirqa: Tawnapakuykunaypaq templo takyachiq pilarkunaman asuykachiway, nispan.

²⁷Chay templopiqa qaripas warmipas achka-achkam kachkarqaku. Filisteokunapa llapallan kamachiqninkunapas chaypim tarikurqaku, templopa altosninpipas qarikuna warmikunam yaqa kimsa waranqa kachkarqaku, Sansonta burlakuspa asikusqankuta qawaspanku.

²⁸Hinaptinmi Tayta Diosta mañakuspan Sansón nirqa: Dios Taytalláy, kunanllañayá yuyariykullaway. Diosnilláy kallpanchaykullaway ñawiykunamanta filisteokunata vengakurunaypaq, nispa.

²⁹Chaymantam templopa iskaynin pilarninkunaman hapipakuykurqa, hinaspam tanqayta qallarispan

³⁰qaparirqa: ¡Filisteokunawan kuska wañusaq! nispa. Chaynata qaparispanmi templo takyachiq pilarkunata llapallan kallpanwan tanqaykurqa, hinaptinmi kamachikuqkunapa hawanman chaynataq llapa runakunapa hawanman templo wichiykamurqa. Wañuyninpiraqmi Sansonqa kawsayninpi wañuchisqanmantapas masta wañurachirqa.

³¹Hinaptinmi Sansonpa wawqenkuna taytanpa llapallan ayllunkunapiwan hamuruspanku Sansonpa ayanta aparqaku, hinaspam Zoramanta Estaolman rinapi, taytan Manoapa sepulturanpi pamparurqaku. Sansonqa iskay chunka watam Israel miraykunata kamachirqa.