Read Biblia Revisión Chuya Qellqa 1992 – Chuya Qellqa 1992 Jueces 4 Bible Online

Jueces 4 - Biblia Revisión Chuya Qellqa 1992 – Chuya Qellqa 1992 bible

Jueces 4

¹Aod wañukuptinmi, Israelpa mirayninkuna kasqallan Tayta Diospa qayllanpi mana allinkunata ruwarqaku,

²chaymi paykunata cananeokunapa reynin Jabinpa makinman Tayta Dios qoykurqa. Jabinqa Hazor llaqtapim munaychakurqa, Sisarañataqmi tropankunapa kamachiqnin karqa, payqa Haroset-goim llaqtapim yacharqa.

³Chaymi Israelpa mirayninkuna qaparispa Tayta Diosta mañakurqaku. Jabinpam isqon pachak fierromanta guerrapaq carretankuna karqa. Iskay chunka watam Israelpa mirayninkunata llumpayta ñakarichirqa.

⁴Chay tiempopim Israel miraykunata Lapidotpa warmin Débora kamachirqa, payqa profetisam karqa.

⁵Sapa punchawmi Deboraqa palmera sachapa sikinpi tiyaq, Efraín law orqokunapi Ramá llaqtamanta Bet-el llaqtaman riq ñanpi; Israel miraykunañataqmi sasachakuyninkuta allichananpaq Deboraman riqku. Chayraykum chay palmerata Deborapa palmeranwan suticharqaku.

⁶Neftalí law Cedes llaqtayuq Abinoampa churin Baracta qayarachimuspanmi Débora nirqa: Israelpa Diosninmi kamachisunki, Tabor orqoman rispayki Neftaliypa chaynataq Zabulonpa mirayninkunamanta chunka waranqa runakunata huñumunaykipaq.

⁷Ñoqam Cisón mayuman, rey Jabinpa tropankunapa kamachiqnin Sisarata, carretankunata hinaspa tropankunata pusamusaq, chaypim makikiman churasaq, nispa.

⁸Hinaptinmi Deborata Barac nirqa: Qam riptikiqa risaqmi, mana chayqa manam risaqchu, nispa.

⁹Deborañataqmi nirqa: Qanwanmi risaq, ichaqa manam qamchu hatunchasqa kanki, Sisarataqa warmipa makinmanmi Tayta Dios churaykunqa, nispa. Chaymi Deboraqa hatarispan Cedes llaqtaman Baracpiwan rirqaku.

¹⁰Baracmi Cedes llaqtaman Zabulón ayllumanta hinaspa Neftalí ayllumanta chunka waranqa runakunata huñurachirqa. Deborapas paywanmi rirqa.

¹¹Moisespa suegron Hobabpa mirayninmanta kaq Hebermi, llapa ceneokunamanta rakikuruspan, Zaanaim pampapi encina sachapa hichpanpi carpanta sayarachirqa, chayqa Cedes llaqtapa hichpanpim karqa.

¹²Abinoampa churin Baracpa Tabor moqoman seqarusqantam Sisaraman willaykurqaku.

¹³Sisarañataqmi guerrapaq fierromanta isqon pachaknintin carretankunata chaynataq llapallan tropankunata huñuruspan Haroset-goim llaqtamanta Cisón wayqoman rirqa.

¹⁴Hinaptinmi Baracta Débora nirqa: Kunan punchawmi Sisarata makikiman Tayta Dios churaykun, kikin Tayta Diosmi ñawpaqnikita richkan, nispa. Chaymi Baracñataq chunka waranqa runakunawan Tabor moqomanta uraykamurqa.

¹⁵Barac peleayta qallaykuptinmi, Sisarata chaynataq carretankunatawan llapallan tropankunatapas Tayta Dios cheqerachirqa; Sisarapas carretanmanta uraykuspam mancharisqallaña lluptirurqa.

¹⁶Baracñataqmi Sisarapa carretankunatawan tropankunata Haroset-goim llaqtakama qatirqa, hinaspam llapallan tropankunata espadawan wañurachirqa, manam chullallatapas puchurqachu.

¹⁷Chaymi Sisaraqa chakillawan lluptiruspa Heberpa warmin Jaelpa carpanman chayarurqa. Chaymanqa ayqerqa Hazor llaqtapa reynin Jabinwan ceneo Heber hawkalla kasqankuraykum.

¹⁸Sisarata chaskinanpaq Jael lloqsiruspanmi nirqa: Taytay, ama manchakuychu, yaykukamuy, nispa. Chaymi carpanman yaykuruptin Jaelñataq huk qatawan qataykurqa.

¹⁹Hinaptinmi Sísara nirqa: Yakunayawachkanmi, ama hina kaspa yakullaykita qoykuway, nispa. Hinaptinmi Jaelñataq odrepi lecheta tomananpaq qoykurqa, hinaspam kasqallan qataykurqa.

²⁰Chaymi Sísara nirqa: Hawallapi kamuy, pipas hamuspa tapusuptikiqa “manam pipas kaypiqa kanchu”, nispam ninki.

²¹Sisarañataqmi sinchi pisipasqa kasqanrayku miskita puñururqa, chaymi Heberpa warmin Jaelñataq mazotawan carpanpa estacanta hapiykuspan upallalla Sisaraman asuykuruspan estacawan rinri kullunpi takarurqa allpapi plantakunankama, chaynapim wañururqa.

²²Chaymi Sisarata qatispan chayaruptin, Baracta chaskiqnin lloqsiykuspan Jael nirqa: Yaykumuy, maskasqayki runata qawachisqayki, nispa. Chay warmipa kasqanman Barac yaykuruptinmi, Sisaraqa rinri kullunpi estacawan pampakama takasqa wañusqaña kachkasqa.

²³Chay punchawpim cananeokunapa reynin Jabinta, Israelpa mirayninkunapa qayllanpi penqayman Tayta Dios churarqa,

²⁴chaymi Israelpa mirayninkuna astawan kallpanchakururqaku cananeokunapa reynin Jabinta chinkachinankukama.