Read Biblia Revisión Chuya Qellqa 1992 – Chuya Qellqa 1992 3 Juan 1 Bible Online

3 Juan 1 - Biblia Revisión Chuya Qellqa 1992 – Chuya Qellqa 1992 bible

3 Juan 1

¹Tukuy sonqoywan kuyasqay Gayo, cheqaptapuni kuyaqniki ñoqa ancianom rimaykamuyki.

²Kuyasqay wawqey Gayo, ñoqam munani tukuy imapipas chaninchasqa kanaykita, sano kanaykita, imaynam almaykipas allinlla kasqanta hina.

³Cheqap yachachikuykunaman hina kawsasqaykimantam iñiqmasinchikkuna hamuspanku willawarqaku, chaymi llumpayta kusikurqani.

⁴Ñoqaqa iñiypi churiykuna cheqap kaqpi purisqanta uyarisqaywanmi tukuy imamantapas astawanqa kusikuni.

⁵Kuyasqay wawqelláy, allintapunim ruwachkanki iñiqmasinchikkunata yanapaspaykiqa, karu llaqtayuqkunata yanapaspaykiqa aswan allintaraqmi ruwachkanki.

⁶Paykunaqa iglesiakunapa qayllanpim kuyakuynikimanta willakurqaku. Ama hina kaspaykiyá maymi illasqankupi puntaman rinankupaq imapas pisipusqankupi yanapaykuy.

⁷Paykunaqa Jesucristomanta willakuspankum purichkanku, Diospi mana iñiqkunamantaqa ima yanapakuytapas manam chaskiyta munankuchu.

⁸Chayraykum paykunamantaqa ñoqanchik nanachikunanchik, chaynapi cheqap willakuypi llamkaqmasin kananchikpaq.

⁹Apachimurqanim huk cartata chaypi iglesiaman, ichaqa Diotrefesmi kamachikuyniykuta mana kaqpaqpas hapinchu, payña puntapi kayta munasqanrayku.

¹⁰Chaymi rispay paytaqa contraykupi imaymana rimasqanmanta qaqchasaq. Rimasqanwanpas mana sonqon tiyaptinmi watukamusuqnikichik wawqekunatapas mana chaskinchu, hinaspam samaykachiy munaqkunatapas harkakuspan iglesiamanta qarqon.

¹¹Kuyasqay wawqelláy, qamqa amayá mana allin ruwasqantaqa qatipakuychu, aswanqa allin kaqtayá ruway. Allin ruwaqkunaqa Diospam, mana allin ruwaqkunam ichaqa Diosta mana reqsinkuchu.

¹²Lliwmi Demetriomanta allinta rimanku, kikinpa vidanmi Diospa munasqanman hina kawsasqanta qawachikun, chaynataqmi ñoqaykupas paypa allinninpi rimaniku, yachasqaykichikpi hinapas ñoqaykuqa cheqap rimaqmi kaniku.

¹³Achkam qanman imapas nimunay karqa, ichaqa manam cartallawanqa lliwtaqa nimuykimanchu.

¹⁴Chaymi qanwan chaylla tupaykuyta munachkani rimananchikpaq.

¹⁵Qanwanyá hawkayay kachun. Reqsinakusqanchikkunam rimaykamusunki. Ama hina kaspayá sapakama amistadninchikkunata rimaykapullaway.