Read Biblia Revisión Chuya Qellqa 1992 – Chuya Qellqa 1992 Apocalipsis 10 Bible Online

Apocalipsis 10 - Biblia Revisión Chuya Qellqa 1992 – Chuya Qellqa 1992 bible

Apocalipsis 10

¹Rikurqanitaqmi huk atiyniyuq angeltapas hanaq pachamanta uraykamuqta, payqa kasqa puyuwan wankusqam hinaspa umanpi chirapayuqmi. Uyanpas inti hinaraqmi achkirisqa, chakinkunañataqmi kasqa lenwaspa wichayman hoqarikuchkaq nina hinaraq.

²Makinpiñataqmi kasqa kichasqa taksa rollo, alleq chakinwanmi sarupakurqa lamar qochapa hawanpi, ichoq chakinwanñataqmi sarupakurqa allpa pachapi.

³Hinaspam leonpa qaparisqanta hinaraq hatunmanta qaparirqa, chaynata qapariptinmi qanchis rayokuna toqyaramurqa.

⁴Chay qanchis rayokuna toqyaramuptinmi qellqanaypaqña kachkarqani, ichaqa hanaq pachamantam huk qapariyta uyarirqani: “Qanchisnintin rayokunapa nisqantaqa amaraqyá willakuychu nitaq qellqaychu”, niqta.

⁵Lamar qochapiwan allpa pachapi sarupakuspa sayaq angeltañataqmi rikurqani, alleq makinta hanaq pachaman hoqariqta,

⁶hinaspam cielokunapas, kay pachapas, lamar qochapas chaynataq chaykunapi kaq tukuy imapas unanchaq wiña-wiñaypaq kawsaq Diosrayku jurarqa: Manañam unamunqañachu,

⁷aswanqa qanchis kaq angelpa trompeta tocanan tiempo chayaramuptinmi Diospa pakasqa kaqninkuna cumplikunqa, chaynaqa kanqa imaynam serviqnin profetankunapa nisqankuman hinam, nispa.

⁸Hanaq pachamanta uyarisqay qayakuymi huktawan nimuwarqa: Rispaykiyá chay kicharayaq taksa rollota chaskimuy lamar qochapiwan allpapi sarupakuspa sayaq angelpa makinmanta, niqta.

⁹Angelman rispay taksa rollota mañamuptiymi payñataq niwarqa: Chaskiwaspayki mikuy kay taksa rollota, simikipiqa miel hina miskillañam kanqa, wiksaykipiñataqmi qatqellaña kanqa, nispan.

¹⁰Chaymi angelpa makinmanta chay taksa rollota chaskiykuspay mikuruptiy simiypiqa miel hina miskillaña karqa, millpuruptiyñataqmi wiksayta qatqeyarachirqa.

¹¹Chaymantam niwarqa: Huktawanmi profetizamunki achka llaqtakunamanta, nacionkunamanta, tukuy rikchaq rimayniyuqkunamanta hinaspa reykunamanta, nispa.