Read Biblia Revisión Chuya Qellqa 1992 – Chuya Qellqa 1992 Apocalipsis 7 Bible Online

Apocalipsis 7 - Biblia Revisión Chuya Qellqa 1992 – Chuya Qellqa 1992 bible

Apocalipsis 7

¹Chaymantam rikurqani tawa angelkunata kay pachapa tawan lawpi sayachkaqta, paykunam wayrata harkamusqaku kay pachamanpas, lamar qochamanpas chaynataq ima sachamanpas mana wayramunanpaq.

²Rikurqanitaqmi huk angeltapas intipa qespimunan lawmanta hamuchkaqta, paymi kawsaq Diospa señalanan sellonta hapichkasqa, hinaspam kay pachata lamar qochata dañananpaq atiy chaskiq tawa angelkunata hatunmanta qaparispan nirqa:

³Diospa serviqninkunata urkunpi sellowan manaraq marcachkaptiykuqa allpatapas, lamar qochatapas chaynataq sachakunatapas amaraqyá imatapas ruwaychikchu, nispa.

⁴Chaymi uyarirqani llapallan Israel ayllukunamanta sellowan marcasqakunaqa pachak tawa chunka tawayuq waranqa kasqankuta.

⁵Judá ayllumantam karqa chunka iskayniyuq waranqa, Rubén ayllumantam karqa chunka iskayniyuq waranqa, Gad ayllumantam karqa chunka iskayniyuq waranqa,

⁶Aser ayllumantam karqa chunka iskayniyuq waranqa, Neftalí ayllumantam karqa chunka iskayniyuq waranqa, Manasés ayllumantam karqa chunka iskayniyuq waranqa,

⁷Simeón ayllumantam karqa chunka iskayniyuq waranqa, Leví ayllumantam karqa chunka iskayniyuq waranqa, Isacar ayllumantam karqa chunka iskayniyuq waranqa,

⁸Zabulón ayllumantam karqa chunka iskayniyuq waranqa, José ayllumantam karqa chunka iskayniyuq waranqa, chaynataqmi Benjamín ayllumantapas karqa chunka iskayniyuq waranqa.

⁹Chaymantam rikurqani achkallaña runakunata llapallan nacionkunamanta, ayllukunamanta, castakunamanta hinaspa tukuy rikchaq rimayniyuqkunamanta. Paykunaqa yuraq pachayuqkama palmera kallma hapiyniyuqkamam sayachkasqaku hatun tronopi tiyaqpa ñawpaqninpi hinaspa Corderopa qayllanpi. Paykunaqa kasqaku achkallaña mana pipapas yupay atinanmi.

¹⁰Llapallankum hatunmanta qaparispa nirqaku: ¡Tronopi tiyaq Diosmantawan Corderomantam salvacionqa hamun! nispanku.

¹¹Llapallan angelkunam sayachkasqaku Diospa trononpa, ancianokunapa hinaspa tawa kawsaqkunapa muyuriqninpi. Chay angelkunam Diospa trononpa ñawpaqninpi pampakama kumuykuspanku payta yupaycharqaku:

¹²“¡Amén! Hatunchaypas, qapaqchaypas, yachaypas, gracias qoypas, yupaychaypas, atiypas, kallpapas, Diosninchikman wiña-wiñaypaq qosqa kachun. ¡Amén!” nispanku.

¹³Hinaptinmi huknin anciano tapuwarqa: ¿Pikunataq kay yuraq pachayuqkunaqa? ¿Maymantataq hamurqaku? nispa.

¹⁴Ñoqañataqmi nirqani: Señorlláy, qanmi yachanki, nispay. Chaymi payñataq niwarqa: Paykunaqa hatu-hatun ñakariymanta hamuqkunam hinaspa pachankutapas Corderopa yawarninwan taqsaspa yuraqyachiqkunam.

¹⁵Chayraykum paykunaqa Diospa trononpa ñawpaqninpi kachkanku, hinaspam templonpi tuta punchaw payta servichkanku. Tronopi tiyaq Diosñataqmi paykunata waqaychaykunqa.

¹⁶Paykunaqa manañam yarqaymantapas, yakumantapas kanqakuñachu, nitaqmi intipas nitaq ima rupaypas rupanqañachu.

¹⁷Diospa trononpa chawpinpi kaq Corderom paykunataqa michinqa hinaspam kawsay qokuq yakukunapa kasqanman pusanqa. Waqasqanku weqenkutapas Diosñam pichanqa, nispa.