Read Biblia Revisión Chuya Qellqa 1992 – Chuya Qellqa 1992 Rut 3 Bible Online

Rut 3 - Biblia Revisión Chuya Qellqa 1992 – Chuya Qellqa 1992 bible

Rut 3

¹Huk punchawmi llumchuyninta Noemí nirqa: Wawalláy, maskapusqaykiyá hukkaqnin qarita qosaykipaq, chaynapi kusisqa kawsakunaykipaq.

²Kachkanmi ayllunchik Booz, paypa criadankunawan kuskam llamkamurqanki. Kunan tutam payqa cebadata wayrachinqa.

³Chaynaqa, bañakuspayá perfumewan hinakuy, hinaspayá musoq pachaykikunawan churakuykuspa eraman riy. Ichaqa amaraqmi paywanqa reqsichikunkichu, mikuyta tomayta tukunankama.

⁴Qawankim maypim puñusqanta, hinaspam haytananta kichaykuspa chaypi puñuykunki; payñam nisunki imam ruwanaykitapas, nispa.

⁵Chaymi Rut nirqa: Tukuy kamachiwasqaykitam ruwasaq, nispa.

⁶Eraman rispanmi Rutqa suegranpa tukuy kamachisqanman hina ruwarqa.

⁷Mikuytapas tomaytapas tukuruspanmi Boozqa kusisqallaña pasaspan monton cebadapa waqtanpi puñuykurqa. Rutmi upallalla asuykuspan Boozpa haytananta kichaykuspan ustuykurqa.

⁸Yaqa chawpi tutatam qonqaymanta tikraparikuspan Boozqa musyarurqa haytananpi huk warmi puñuchkaqta.

⁹Chaymi Booz tapurqa: ¿Pim kanki? nispa. Rutñataqmi nirqa: Serviqniki Rutmi kani, ñoqapa hawayman qataykipa patanta sawaykamuy, qamqa kanki wañukuq qosaypa ayllunmi, chaynaqa nanachikuwanaykim, nispa.

¹⁰Hinaptinmi Booz nirqa: Diosyá bendecisunki mamay, kunanmi qawaykuni punta sumaq ruwasqaykimantapas aswan allintaraq ruwasqaykita, munaspaykiqa aswan joventaraqmi aputapas wakchatapas maskakuruwaq karqa, ichaqa manam chaytachu ruwarqanki.

¹¹Chaynaqa, amayá manchakuychu, ñoqam ruwasaq qanwan imam mañakuwasqaykiman hina. Llaqtaypi kaqkunaqa yachankum allin sonqoyuq warmi kasqaykita.

¹²Cheqaptapuni nanachikuq aylluyki kachkaptiypas, kachkanraqmi ñoqamanta aswan hichpa aylluyki.

¹³Paqarin achikyaqta nanachikusaqmi niptinqa allinmi kanqa, manam niptinmi ichaqa ñoqa nanachikusqayki. Kunan tutaqa kaypiyá samakuy, Diospa qayllanpim rimachkanchik, chaynaqa tutamantakamayá puñukuy, nispa.

¹⁴Boozpa haytananpi puñusqanmantam Rutqa manaraq runa reqsiy horata hatarirurqa; chaynataqa ruwarqa Boozpa: “Amam pipas yachanqachu eraman warmi hamusqanta, nisqanraykum”.

¹⁵Boozqa nirqataqmi: Tapakusqayki mantonnikita mastaykuspayki sumaqta hapiykuy, nispa. Mantonninta Rut mastariykuptinmi Booz talliykurqa yaqa tawa arroba cebadata, chayta churkuykuptinmi wasinman ripukurqa.

¹⁶Wasinman Rut chayaruptinmi suegran tapurqa: ¿Allinchu karamunki wawalláy? Nispan. Chaymi Rut willarqa Boozpa tukuy ima nimusqanmanta.

¹⁷Rutqa nirqataqmi: Yaqa tawa arroba cebadatam qoykamuwan: “Suegraykimanqa amayá hinallaqa kutiychu”, nispan.

¹⁸Chaymi Noemí nirqa: Wawalláy, suyaykusunyá imaynam kaykuna tukunankama, chay runaqa manam samaykunqachu imam qallaykusqanta tukunankama, nispa.