Read Biblia Revisión Chuya Qellqa 1992 – Chuya Qellqa 1992 Rut 4 Bible Online

Rut 4 - Biblia Revisión Chuya Qellqa 1992 – Chuya Qellqa 1992 bible

Rut 4

¹Boozmi llaqtapa punkunpi arreglo ruwaqkunapa tiyananpi tiyaykurqa, hinachkaptinmi Rutman Boozpa “kachkanraqmi aswan hichpa aylluyki”, nisqan runa pasachkarqa. Payta qayaykuspanmi Booz nirqa: Hamuspayá kaypi tiyaykuy, nispa. Chaymi pay asuykuspa tiyaykuptin

²llaqtapi chunka ancianokunata qayaykuspan Booz nirqa: Taytakuna kaypiyá tiyaykuychik, nispa. Hinaptinmi paykuna tiyaykurqaku.

³Hinaspanmi Rutta nanachikunanpaq kaq runata Booz nirqa: Moab lawmanta kutimuq Noemiymi wawqenchik Elimelecpa chakranta rantikuchkan.

⁴Chaymi qanman willaykuyta munarqayki, rantiyta munaspaqa kay runakunapa hinaspa ancianokunapa qayllanpi rantinaykipaq. Qamqa kanki Elimelecpa hichpa ayllunmi, chaynaqa derechoykim reclamanaykipaq, mana munaspaykiqa willaykuwayá ñoqa rantirunaypaq, nispa. Hinaptinmi chay runa nirqa: Rantisaqmi, nispa.

⁵Boozñataqmi nirqa: Noemiymanta chakranta rantispaykiqa wañukuqpa viudan Moab nacionniyuq Rutwanpas casarakunaykim, chaynapi wañukuqpa miraynin mana chinkananpaq, nispa.

⁶Chaykunata uyariykuspanmi chay ayllunqa nirqa: Manam ñoqaqa reclamaymanchu, manam munanichu herenciay hukpaq kananta, reclamayta munaspaykiqa qamyá rantiruy, derechoytam qoyki, nispa.

⁷Chay tiempokunapim Israel nacionpi karqa kay costumbre: Pipas imatapas reclamaptinqa otaq contratota ruwaptinqa, hukkaqninmi usutanta hurqokuykuspan contrato ruwaqmasinman qoykuq firmasqa hina kananpaq.

⁸Chay costumbreman hinam Boozpa ayllunqa usutanta hurqokuykuspan nirqa: Qamyá rantiruy, nispa.

⁹Boozñataqmi chaypi kaq ancianokunatawan runakunata nirqa: Kunan punchawmi llapallaykichik testigo kankichik Elimelecpa tukuy kapuqninkuna rantisqaymanta. Noemiymantam rantini Quelionpa hinaspa Mahlonpa kaqninkunatapas.

¹⁰Casarakusaqtaqmi Mahlonpa viudan Moabita Rutwanpas. Chaynata ruwaptiymi wañukuq Mahlonpa chakrankunapas hina sutillanpi kanqa. Chaynapim paypa ayllunpas nitaq mirayninpas mana chinkanqachu. Chaynaqa, kunanmi qamkuna testigo kankichik, nispa.

¹¹Hinaptinmi llaqtapa punkunpi kaq llapallan runakuna hinaspa ancianokunapas nirqaku: Arí, testigom kaniku. Diosyá wasikiman yaykumuq warmita Raqueltawan Leata hina ruwachun, chay iskaynin warmikunamantam ñoqanchik Israel castakuna mirarqanchik. Qamtapas Diosyá yanapasunki Efrata llaqtapi munaychakunaykipaq chaynataq Belén llaqtapipas ancha reqsisqa kanaykipaq.

¹²Kay warmiwan casarakuptikiyá Diosninchik mirachisunki imaynam Farestapas mirachisqanta hina, nispanku. Farespa tayta-mamanqa karqa Judawan Tamarmi.

¹³Chaynapim Booz casarakururqa Rutwan, hinaptinmi Diospa munasqanman hina Rutqa wiksayakuspan qari wawata wachakururqa.

¹⁴Chaymi Noemiyta warmikuna nirqaku: Diosyá hatunchasqa kachun, paymi qoykusunki willkata chaynapi yuyaqyaptikipas nanachikusunaykipaq. Chay willkaykiyá Israelpi kachun ancha reqsisqa runa.

¹⁵Willkaykiyá kachun sonqoyki tiyachiq hinaspa payayaynikipipas nanachikusuqniki, payqa llumpay kuyasuqniki llumchuynikipa wawanmi, Rutqa qanchis qari wawakunamantapas mastaraqmi qampaqqa valen, nispanku.

¹⁶Hinaptinmi wawata hoqariykuspan Noemí marqakuykurqa, chay punchawmantam Noemiyqa wawapa uywaqnin karqa.

¹⁷Chayta qawaspankum vecinankuna nirqaku: “Noemiypaqmi nacerapun qari wawan” nispanku. Chaynata nispankum Obedwan chay wawata suticharqaku. Paymi karqa Isaipa taytan hinaspa Davidpa abuelon.

¹⁸Kaykunam Farespa mirayninkuna: Farespa churinmi karqa Hezrón,

¹⁹Hezronpañataqmi Ram, Rampa churinmi karqa Aminadab,

²⁰Aminadabpañataqmi Naasón, Naasonpa churinmi karqa Salmón,

²¹Salmonpañataqmi Booz, Boozpa churinmi karqa Obed,

²²Obedpañataqmi Isaí, Isaiypa churinñataqmi karqa David.