Read Biblia Revisión Chuya Qellqa 1992 – Chuya Qellqa 1992 1 Samuel 14 Bible Online

1 Samuel 14 - Biblia Revisión Chuya Qellqa 1992 – Chuya Qellqa 1992 bible

1 Samuel 14

¹Huk punchawmi Saulpa churin Jonatán arman apaqta nirqa: Haku chimparusunchik waklaw chimpapi tarikuq Filistea tropakunapa kasqanman, nispa. Ichaqa manam taytanman willarqachu.

²Saulmi tiyachkarqa Gabaa llaqtapa patanpi, granada sachapa sikinpi. Paywantaqmi kachkarqa soqta pachak soldadokunapas.

³Tayta Diospa sacerdotenmi karqa Ahitobpa churin Ahías, paymi efodwan churakusqa karqa. Ahitobqa karqa Icabodpa wawqenmi, Icabodñataqmi karqa Fineespa churin hinaspa Silo llaqtapi Tayta Diospa sacerdoten Eliypa willkan. Manam pipas yacharqachu Jonatanpa pasakusqantaqa.

⁴Jonatanmi Filistea tropakunapa kasqanman chayaypi rirqa. Pasanan wayqopim kaylaw-waklawpi sayay-sayay qaqakuna tarikurqa. Huknin qaqapa sutinmi karqa Boses, hukninpañataqmi Sene.

⁵Huknin qaqam tarikurqa Micmas llaqtapa chimpan norte lawpi, hukninñataqmi Gabaa llaqtapa chimpan sur lawpi.

⁶Jonatanmi arman apaq soldadota nirqa: Qari kayninpi mana señalasqa Filistea tropakunapa kasqanman chimparusunchik. Tayta Diosqa yanapaykuwasunmi, Diospaqqa manam sasachu, achka runawan otaq asllawanpas salvawananchikpaqqa, nispa.

⁷Arman apaq soldadoñataqmi nirqa: Tanteasqaykiman hinayá ruway. Ñoqaqa chayllam kachkani tukuy munasqaykipi yanapanaypaq, nispa.

⁸Hinaptinmi Jonatán nirqa: Wak runakunapa kasqanman chimparuspayá rikurachikusunchik.

⁹Sichum paykuna niwasun: “Chayllapi Suyaykuwayku kasqaykichikman uraykamunaykukama” nispa, hinaptinqa paykunapa kasqanman mana seqaspam maymi kasqallanchikpi suyasunchik.

¹⁰Sichum paykuna qayamuwaspanchik “seqamuychik” niptinkuqa seqasunpunim, chaynapim yachasun vencenanchikpaq Tayta Dios yanapawasqanchikta, nispa.

¹¹Chaymi paykuna Filistea tropakunawan rikurachikurqaku, hinaptinmi chay tropakuna nirqaku: Waqaya hebreo runakunaqa pakakusqanku uchkukunamanta lloqsimuchkanku nispanku.

¹²Hinaspam Jonatantawan arman apaq soldadota qayarqaku: ¡Kay ñoqaykupa kasqaykuman seqamuychik! ¡ñoqaykum hukta willasaykiku! nispanku. Chaymi arman apaq soldadota Jonatán nirqa: Hakuchik, Tayta Diosmi paykunata Israelpa makinman churaykamun, nispa.

¹³Jonatanmi makinwan hapipakustin qespirqa, arman apaqpas qepantam qespirqa. Filisteo soldadokunata Jonatán wichichimuptinmi arman apaqñataq wañuchirqa.

¹⁴Enemigonkunata wañuchiyta qallaykuspankum, manapas parten yugada allpapi yaqa iskay chunka runata wañurachirqaku.

¹⁵Chaymi Filistea tropakunaman, campamentopi kaqkunaman, chakrapi kaqkunapas chaynataq wateqaq soldadokunamanpas llumpay manchakuy yaykururqa; chay punchawmi temblorpas pasarqa, hinaptinmi llapa runakuna llumpayta mancharikurqaku.

¹⁶Saulmi Benjamín ayllupa allpan law Gabaa llaqtapi wateqaqkunata churarqa, paykunam rikururqaku Filistea tropakuna anchallataña kayman chayman kallpakachasqankuta.

¹⁷Chaymi paywan kaq tropanta Saúl nirqa: Chaylla listata qayaychik, pikunam mana kaypi kasqanta yachananchikpaq, nispa. Chaymi listata qayaykuptinku Jonatanwan arman apaq soldado mana chaypichu tarikurqaku.

¹⁸Hinaptinmi Ahiasta Saúl nirqa: Diospa Arcanta apamuy, nispa. Chay punchawmi Diospa Arcan Israel runakunawan tarikurqa.

¹⁹Ichaqa sacerdotewan Saúl rimachkaptinmi Filistea tropakunapa campamentonpi chaqwa aswan-aswanña uyarikurqa, chaymi sacerdoteta Saúl nirqa: ¡Hinaña kachun! nispa.

²⁰Hinaspam lliw tropankunata huñuruspan guerrapi peleananpaq Saúl kallparqa. Ichaqa llumpay chaqwa kasqanraykum Filistea tropakunaqa kikinkupuraña wañuchinakuyta qallaykuspanku lliw tukunakururqaku.

²¹Ñawpaqmantaraq Filistea allpapi yachaq hebreo runakunapas paykunawanmi rirqaku guerrapi yanapamunankupaq. Ichaqa paykunam Saulpa chaynataq Jonatanpa tropankunamanña hukllawakaramurqaku.

²²Efraín law orqonkunapi pakakuq Israel tropakunapas Filistea tropakuna ayqesqankuta uyarispankum peleanankupaq qatirqaku.

²³Chaynatam Israel runakunata Tayta Dios libraykurqa chay punchawpi. Chay wañuchinakuymi Bet-avén llaqtakama chayarurqa.

²⁴Ichaqa chay punchawmi lliw Israel runakuna llumpay sasachakuypi tarikurqaku. Manam pipas ima mikuyllatapas malliykurqachu. Saulmi llapa runakunata juramentachispan nirqa: Enemigoykunata vengakunaykamam ama pipas tutaykunankama mikunqachu, mikuruspaqa ñakasqam kanqa, nispa.

²⁵Llapa tropankunam monteman chayarurqaku, chaypim pampakunapi mielta tarirurqaku.

²⁶Chay monteman llapa runakuna yaykuruspankum tarirurqaku mielta yaku hinaraq lloqsichkaqta, ichaqa chay juramentota manchakuspankum mana pillapas malliykurqachu.

²⁷Jonatanqa manam uyarirqachu tropankunata taytan jurachisqantaqa, chayraykum payqa tawnanpa puntanwan toqpiykuspan mielta mikuykurqa, chayraqmi ñawinpas sumaqta qawarikururqa, chaynataqmi kallpatapas hapirqa.

²⁸Ichaqa hukkaqnin soldadom willaykurqa: Taytaykim llapa tropata jurachirqa pipas ama imallatapas mikunanpaq, pipas mikuruqqa ñakasqa kananpaq. Chayraykum tropakunapas llumpay pisipasqaña kachkanku, nispa.

²⁹Hinaptinmi Jonatán nirqa: Taytayqa nacionninchiktam sasachakuyman churarun. Qawawasqaykiman hinam kay mielta mikuykuptiy ñawillaypas allintaraq qawarikurun.

³⁰Maynataraq tropanchikkuna kallpanchakunman karqa enemigonchikkunamanta qechusqanchikta mikuykuspaqa. ¡Maychikataraq filisteokunata wañuchichwan karqa! nispa.

³¹Chay punchawmi Israel runakuna filisteokunata vencerurqaku. Micmas llaqtamanta qallaykuspa Ajalón llaqtakama. Israel tropakunam ichaqa llumpay pisipasqaña tarikurqaku.

³²Chaymi llapallan runakuna kallpaspanku enemigomanta qechusqankuta hapikurqaku: Ovejakunata, vacakunata, torillokunata. Chaykunata nakaspankum hina yawarnintinta aychata mikurqaku.

³³Ichaqa wakin runakunam Saulman willaykamurqaku: Runakunam Diospa contranpi huchallikuchkanku, aychatam yawarnintinta mikukuchkanku, nispanku. Hinaptinmi Saúl nirqa: ¡Qamkunaqa mana kasukuqkunam kankichik! Kayman huk hatun rumita tanqamuychik.

³⁴Hinaspayá llapa runaman willamuychik vacata otaq ovejata sapakama apamunankupaq, chaynapi nakaspa mikunaykichikpaq, amaña Diospa contranpi yawarnintin aychata mikuspa huchallikunaykichikpaq, nispa. Chay tutam sapakama vacata apamurqaku nakanankupaq.

³⁵Saulñataqmi huk altarta Tayta Diospaq perqarqa, chay altarmi karqa Tayta Diospaq Saulpa punta kaq perqasqan.

³⁶Saulmi tropankunata nirqa: Hakuchik kunan tuta uraykusun Filisteokunapa contranpi achikyanankama tukuy imankuta qechumuq. Amam imatapas saqemusunchu, nispa. Chaymi tropankuna nirqaku: Tanteasqaykiman hinayá ruway, nispanku. Sacerdoteñataqmi nirqa: Puntataqa Diostayá tapuykusun, nispa.

³⁷Hinaptinmi Tayta Diosta Saúl tapurqa: ¿Qatikachaymankuchu filisteokunata? ¿Yaqachum makiykuman churaykamunki? nispa. Ichaqa Diosmi chay punchaw mana imallatapas nirqachu.

³⁸Chayraykum Saúl nirqa: Lliw tropakunapa kamachiqninkuna kayman asuykamuychik, pim huchayuq kasqanta kunan tapukusun.

³⁹Israel runakunapa salvaqnin Tayta Diospa sutinpim jurani, chay huchallikuqqa, churiy Jonatanña kaspapas wañunqapunim, nispa. Chaymi mana pipas rimarirqachu.

⁴⁰Chaymantam Israel runakunata Saúl nirqa: Qamkunayá chaylawpi sayaykuychik, ñoqañataqmi churiy Jonatanpiwan kaylawpi sayaykusaqku, nispa. Chaymi runakunañataq Saulta nirqaku: Tanteasqaykiman hinayá ruway, nispanku.

⁴¹Hinaptinmi Saulñataq Israelpa yupaychasqan Tayta Diosta nirqa: Kunan reqsiykachiwayku ¿pitaq qampa contraykipi huchallikurun? nispa. Hinaptinmi churin Jonatanman tuparurqa. Chaynapim Saulwan runakunaqa mana huchayuq karqaku.

⁴²Huktawanmi Saúl nirqa: Kunanñataqyá akllakuykuy ñoqachus otaq churiy Jonatanchus huchayuq kasqaniku, nispa. Hinaptinmi Jonatanman tuparurqa.

⁴³Chaymi churin Jonatanta Saúl tapurqa: Willaykuway imam ruwasqaykita, nispa. Chaymi Jonatán nirqa: Apamusqay tawnapa puntanwanmi mielta malliykurqani ¿chayraykullachu wañusaq? nispa.

⁴⁴Chaymi churin Jonatanta Saúl nirqa: ¡Diosyá sinchita ñakarichiwachun sichum qam mana wañuptikiqa! nispa.

⁴⁵Hinaptinmi runakunañataq Saulta nirqaku: ¡Manam Jonatanqa wañunmanchu! payqa ñoqanchik Israel runakunatam libraykuwanchik, kawsaq Tayta Diosraykum Jonatanpaqa huk chukchallanpas mana pampamanqa wichinqachu. Payqa Diospa yanapakuyninwanmi ruwarun, nispanku. Chaynatam Jonatantaqa wañunanmanta Israel runakuna librarurqaku.

⁴⁶Saulpas manañam filisteokunata qatirqañachu, chaymi filisteokunaqa allpankuman ripukurqaku.

⁴⁷Israelpi kamachikuyta qallarisqanmantam Saulqa muyuriqnin llaqtakunawan guerrapi karqa: Moab casta runakunawan, Amonpa mirayninkunawan, Edom casta runakunawan, Soba nacionpa reyninkunawan hinaspa filisteokunawan. Maymanña peleaq lloqsispapas vencemuqpunim.

⁴⁸Tropakunata huñuruspanmi, Amalec runakunata vencerurqa, chaynatam payqa Israel runakunata suwaqninkunamanta librarqa.

⁴⁹Saulpa qari churinkunam karqa: Jonatán, Isúi hinaspa Malquisúa. Warmi churinkunañataqmi karqa: Piwi kaq Merab, sullkañataq Mical.

⁵⁰Saulpa warminpañataqmi karqa Ahinoam, payqa karqa Ahimaaspa churinmi. Tropankuna kamachiqñataqmi karqa Abner, Abnerqa karqa Saulpa tion Nerpa churinmi.

⁵¹Saulpa taytan Ciswan Abnerpa taytan Nerqa karqaku Abielpa churinkunam.

⁵²Saulpa munaychakuyninpiqa tukuy tiempom filisteokunawan guerra karqa, chaymi Saúl qawaq kallpasapa allinnin qari-qari runakunata, hinaspam paykunata tropankunapaq huñuq.