Read Biblia Revisión Chuya Qellqa 1992 – Chuya Qellqa 1992 1 Samuel 20 Bible Online

1 Samuel 20 - Biblia Revisión Chuya Qellqa 1992 – Chuya Qellqa 1992 bible

1 Samuel 20

¹Davidmi Ramá llaqtapa hichpan Naiotmanta lluptikurqa, hinaspanmi Jonatanpa kasqanman chayaruspan nirqa: ¿Imatataq ruwaruni? ¿Imapitaq huchallikuruni? ¿Imanarqanitaq taytaykita wañuchiwaypi rinanpaq? nispa.

²Jonatanñataqmi nirqa: ¡Amayá Diospas chaytaqa munachunchu! ¡Manapunim wañunkichu! Taytayqa manam imatapas ruwanmanchu mana willawaspanqa. ¿Imanasqataq taytay chayta pakawanman? ¡Manam chaynaqa kanmanchu! nispa.

³Chaymi David nirqa: Taytaykiqa allintam yachan llumpay amigo kasqanchikta. Chayraykum llakikunaykimanta mana willasunkimanchu. Ichaqa Diosrayku hinaspa qamraykum jurani, ¡ñoqaqa wañuypa patanpiñam tarikuchkani! nispa.

⁴Hinaptinmi Davidta Jonatán nirqa: ¿Imatataq qampaq ruwanayta munanki? nispa.

⁵Chaymi David nirqa: Paqarinmi llullu killa fiesta kanqa, chaypim mikunapaq reywan tiyanay yachakun. Chaynaqa, mincha punchaw tardeykuqkama purunpi pakakaramusaq.

⁶Sichum taytayki ñoqamanta watukuptinqa kaynatam ninki: Davidqa Belén llaqtanman rinanpaqmi valekuwarqa, chaypi watan-watan ruwasqankuta hina ayllunkunawan sacrificiota Diosman ofrecenanpaq, nispa.

⁷Sichum taytayki “allinmi” niptinqa hawkam kasaq. Piñakuruptinmi ichaqa yachankiña contraypi mana allin tanteasqanta.

⁸Chayna kaptinqa, ama hina kaspam kay mañakusqayta ruwaykuwanki, qanwan ñoqaqa Tayta Diospa qayllanpim jurarqanchik: Sichum huchay kaptinqa qampuni wañurachiway, ama taytaykipa ñawpaqninmanraqchu pusaway, nispa.

⁹Chaymi Jonatán nirqa: ¡Ama chaytaqa niychu! Sichum taytaypa mana allin ruway munasqanta yacharusaq hinaspaqa willaykusqaykipunim, nispa.

¹⁰Davidñataqmi nirqa: ¿Pitaq taytaykipa piñakusqantaqa willamuwanqa? nispa.

¹¹Chaymi Jonatán nirqa: Purunman hakuchik, nispa. Hinaspam iskayninku pasarqaku.

¹²Chaypim Davidta Jonatán nirqa: Israelpa yupaychasqan Tayta Diosraykum niki, mincha punchaw kay horatam taytayta tapusaq paypa imam ruway munasusqaykita yachanaypaq. Qampaq allinlla kaptinqa willachimusqaykim.

¹³Taytay mana allin ruway munasusqaykita mana willaykamuptiyqa chaynataq hawkalla ayqekunaykipaq mana yanapaptiyqa, Diosyá llumpayta castigawachun. Diosyá yanapasunki imaynam taytaytapas yanapasqanta hina.

¹⁴Sichum chay punchawkunakama kawsasaqraq hinaptinqa llakipayariwankim imaynam Tayta Diospas qamta llakipayasusqaykita hina. Sichum wañukusaq , hinaptinqa

¹⁵amam aylluykunata qonqarunkichu, enemigoykikunata kay pachamanta Tayta Dios chinkarachiptinpas, llakipayariykuspam imallapipas yanapaykunki, nispa.

¹⁶Chaynatam Jonatanqa Davidwan contratota ruwarqa.

¹⁷Chaymi Jonatanwan David huktawan jurarqaku. Jonatanmi Davidta kikinta hina kuyarqa.

¹⁸Jonatanqa nirqataqmi: Paqarinmi musoq killa fiesta, chaynaqa tiyanaykipi mana tarisuspaykichá watukusunki.

¹⁹Mincha punchaw tiyanaykipi mana rikususpaykiqa aswancha watukunqa. Chaynaqa, maymi pakakusqaykipi pakakamuy hinaspa Ezel law rumikunapa waqtanpi suyay.

²⁰Ñoqañataqmi kimsa kutikama chaylawman flechamusaq chay sitiota hapichiq sumlla.

²¹Hinaspaymi criadoyta kachamusaq: “Flechakunata maskamuy” nispa. Sichum criadoyta nisaq: ¡Kaylawnikipim kachkan, hoqarispa hamuy! niptiyqa, ama manchakuspam hamunki, Tayta Diosmi yachan, manam imapas pasasunkichu.

²²Sichum criadoyta: “Flechakunaqa waklawnikipiraqmi kachkan” niptiyqa pasakunkim. Chayna kaptinqa Tayta Diosmi munan ayqekunaykita.

²³Juramentowan contrato ruwasqanchikmantaqa Tayta Diosmi testigo wiña-wiñaypaq, nispa.

²⁴Chaynapim Davidqa purunpi pakakururqa. Llullu killa fiesta chayaramuptinmi mikunanpaq mesapi rey tiyaykurqa.

²⁵Hinaspanmi reyqa tiyaykurqa maymi tiyanan perqa kuchupi, Jonatanñataqmi chimpanpi, Abnerpas Saulpa waqtanpim tiyaykurqa, Davidpa tiyananpim ichaqa mana pipas tiyarqachu.

²⁶Chay punchawqa manam Davidmanta Saúl tapukurqachu, aswanmi yuyaymanaspa nirqa: Ima mana allintachá ruwarun chaycha mana chuyanchakusqanrayku mana hamunchu, nispa.

²⁷Iskay kaq punchawman Davidta tiyananpi mana rikuspam Jonatanta Saúl tapurqa: ¿Imanasqataq Isaipa churin mana hamunchu mikuq qayna punchawpas nitaq kunan punchawpas? nispa.

²⁸Chaymi Jonatán nirqa: Davidqa Belén llaqtaman rinanpaqmi sinchita mañakuwarqa,

²⁹kaynata nispa: “Wawqeymi kamachimusqa rinaypaq, hinatayá rirusaq aylluymi sacrificiota Tayta Diosman ofrecenqa, chayraykum mañakuyki ayllukunata huk ratollapas watukaramunaypaq”, nispan. Chaymi payqa reywan mikunanpaq mana hamurqachu, nispa.

³⁰Hinaptinmi Saúl sinchita piñakuruspan Jonatanta qaqcharqa: ¡Mana allin warmipa wawan! ¿Manachu yacharqani chay Isaipa churinwan llumpay amigollaña kasqaykita? kayqa hatun penqaymi qampaq chaynataq mamaykipaqpas.

³¹Isaipa churin kawsanankamaqa manam kawsanaykipas nitaq rey kanaykipas yachakunchu. Chaynaqa, maskachimuspa wañuchinaypaq pusamuway, nispa.

³²Chaymi taytanta Jonatán tapurqa: ¿Imanasqataq wañuchisqa kanqa? ¿Ima mana allintataq ruwarun? nispa.

³³Hinaptinmi Saulqa lanzawan chamqarurqa Jonatanta wañuchiyta munaspan, chaywanmi Jonatanqa sumaqta yachaykurqa taytanqa cheqaptapuni Davidta wañurachiy munasqanta.

³⁴Chaymi Jonatanqa mesamanta hatarirurqa llumpay piñasqallaña, chayraykum llullu killa fiestapa iskay kaq punchawninpi mana mikurqachu. Taytan mana allinkunata rimasqanraykum, Davidmanta Jonatanpa sonqon sinchi llakisqa karqa.

³⁵Paqarinnintin tutapaytam Jonatán lloqsirqa purunpi Davidwan tupanankupaq, warma kaq criadonta pusarikuspan.

³⁶Hinaspanmi criadonta Jonatán nirqa: Kallpaspayki kacharisqay flechakunata maskamuy, nispa. Criadon kallpaptinmi Jonatanñataq flechakunata kacharirqa chay criadonpa waklawninkamaraq.

³⁷Hinaptinmi flechapa chayasqanman criadon chayaruptin, Jonatán qayarqa: ¡Flechaqa qanmanta waklawpiraqmi kachkan! nispa.

³⁸Huktawanmi Jonatán qayarqa: ¡Ama sayaykuspa utqayllaman kallpay! nispa. Chaymantam Jonatanpa criadonñataq flechakunata apamuspan kutimurqa.

³⁹Chay criadom ichaqa mana imatapas musyarqachu, Jonatanwan Davidllam chaytaqa yacharqaku.

⁴⁰Hinaptinmi armankunata criadonman qoykuspa Jonatán nirqa: Aparikuspa llaqtaman kutiy, nispa.

⁴¹Jonatanpa criadon pasaruptinmi, rumikunapa qepanpi pakakusqanmanta David lloqsimurqa, hinaspam Jonatanpa ñawpaqninpi qonqoranpa kimsakama pampaman kumuykurqa. Chaymi muchanakuykuspanku iskayninku waqakurqaku. Davidmi aminankama waqarqa.

⁴²Chaymantam Davidta Jonatán nirqa: Hawkalla pasakuy, Tayta Diospa sutinpim jurarqanchik kaynata nispa: Diosmi testigo wiñaypaq amigo kasqanchikmanta chaynataq mirayninchikkunawanpas, nispa. David pasakuptinmi Jonatanpas llaqtaman kutikurqa.