Read Cibverano Cipsa Cisena Mateu 22 Bible Online

Mateu 22 - Cibverano Cipsa Cisena bible

Mateu 22

¹Yezu alonga pontho kuna anthu na misanje, mbaapanga tenepa:

²“Umambo wa kudzulu walandana na mambo m'bodzi adacitisa phwandu ya banja ya mwana wace wa mamuna.

³Na tenepo, mambo atuma anyabasa ace kuti aende kaapange ale akhadacemerwa toera adze kadye phwandu. Mbwenye iwo akhonda pyawo kubwera.

⁴“Buluka penepo, mambo atuma anyabasa anango na mphangwa izi: ‘Ndokoni mukhapange anthu onsene akhadacemerwa pa phwandu kuti pyonsene pyamala kusasanyirwa. Ndamala kuphesa ng'ombe na mphulu zakunenepa. Mphapo mbabwere adze kadye phwandu.’

⁵“Mbwenye iwo akhonda kupitsalakana penepyo, mbaenda kacita pinthu pyawo. M'bodzi aenda kumunda kwace, unango mbaenda kacita malonda ace.

⁶Pontho anango aphata anyabasa ale a mambo, mbaamenya, mbaapha.

⁷Na tenepo, mambo aipirwa napyo. Atuma anyankhondo ace mbaenda kaapha mapanga enewa, mbaapisira nzinda wawo.

⁸“Buluka penepo, mambo alonga kuna anyabasa ace kuti: ‘Phwandu yamala sasanyirwa, mbwenye anthu adacemera ine hadakwanira kuti adye nanthu phwandu tayu.

⁹Na tenepo, ndokoni m'mphambano zonsene, mucemere onsene anagumana imwe toera adze kadye phwandu.’

¹⁰Anyabasa aendadi m'miseu mbakwanisa kugumanya anthu onsene adagumana iwo, adidi na a kuipa. Na tenepo, nyumba ya phwandu yadzala na anthu adacemerwa.

¹¹“Mambo, pakupita n'nyumba toera kuona anyaphwandu adacemerwa, mwenemu agumana mamuna m'bodzi adakhonda kubvala nguwo za pa phwandu ya banja.

¹²Na tenepo, am'bvundza kuti: ‘Kodi iwe, xamwali, wapita tani muno, mbukhonda kubvala nguwo za pa phwandu ya banja?’ Iye akhala wa kumatama.

¹³“Penepo, mambo apanga anyabasa ace kuti: ‘M'mangeni myendo na mikono, mbamumponya kunja, ku cidima. Kweneko kunabveka kulira na kukukuta mano.’

¹⁴“Thangwi azinji ndiwo adacemerwa, mbwenye adasankhulwa ndi pang'ono.”

¹⁵Na tenepo, afarisi abverana pakati pawo kuti asake cinthu ca kupambazira naco Yezu.

¹⁶Penepo iwo atuma andzawo kuna Yezu, pabodzi na anthu anango a pa nsoka wa mambo Herodhi. Iwo atumwi, pidafika iwo, alonga tenepa kuna Yezu: “Mpfundzisi, ife tisadziwa kuti imwe ndimwe munthu wa ndimo mwene, pontho musapfundzisa pya ndimo mwene, pire pinafuna Mulungu mbamukhonda kunyengererwa na munthu unango, thangwi imwe nkhabe kulang'ana nkhope ya munthu.

¹⁷Mphapo, tipangeni manyerezero anu: Pisatawirirwa kulipa nsonkho kuna Mambo Sezari peno nkhabe?”

¹⁸Mbwenye Yezu, na kudziwa manyerezero awo a kuipa, aatawira tenepa: “Anyauthambi! Thangwi yanji imwe musandilesera?

¹⁹Ndipangiseni kobiri inalipa na imwe misonkho.” Iwo ampangisa kobiri ibodzi ya parata.[55]

²⁰Penepo Yezu aabvundza kuti: “Kodi nkhope na dzina iyi nja ani?”

²¹Iwo antawira kuti: “Mphya Sezari.” Penepo Yezu aapanga tenepa: “Na tenepo, pya Sezari, pasani Sezari, pya Mulungu, pasani Mulungu.”

²²Iwo na kubva mafala awa adzumatirwa pikulu, mbansiya, mbabuluka mbaenda.

²³Pa ntsiku ibodzi-bodzi, Asadhusi, ale analonga kuti anthu nkhabe kulamuka pa kufa, afendedzera Yezu mbampanga kuti:

²⁴“Mpfundzisi, Mozesi alonga kuti, mamuna angafa mbakhonda kusiya ana, m'bale wace wa mamuna asatongwa kuti acite banja na manferwa wa nkazi, toera ansiyire dzindza.

²⁵Akhalipo pakati pathu amuna anomwe muubale mwawo. Wakutoma acita banja, mbafa mbadzati khala na mwana. Na tenepo, adza kapitiswa kumusa, m'bale wace waciwiri.

²⁶Pibodzi-bodzi pyacitikambo na waciwiri, na wacitatu mpaka wacinomwe.

²⁷Pa kumalisira, pa kumala onsene, adza kafambo nkazi.

²⁸Na tenepo, pa kulamuka kwa anyakufa, nkazi unowu anadza kakhala wa ani pa anomwe awa? Thangwi onsene acita na iye banja.”

²⁹Yezu aatawira tenepa: “Mwadodomeka na thangwi yakukhonda kudziwa kwanu Bukhu ya Mulungu na mphambvu za Mulungu!

³⁰Thangwi pa kulamuka kwa anyakufa, anthu nkhabe kudza kacitabve banja, peno kuperekwa m'mabanja. Mbwenye ndi ninga anju za kudzulu.

³¹Pa thangwi ya kulamuka kwa anyakufa, imwe mudzati kupiona pidalembwa m'Bukhu, pidakupangani Mulungu kuti:

³²‘[56]Ine ndine Mulungu wa Abharaamu, ndine Mulungu wa Izaki, pontho ndine Mulungu wa Djakobo?’ Iye si Mulungu wa anyakufa tayu, mbwenye ndi Mulungu wa am'maso.”

³³Anthu, na kubva penepyo, adzumatirwa na cipfundzo cace.

³⁴Na tenepo, afarisi na kubva kuti asadhusi acimwana kuntawira Yezu, penepo pene iwo agumanyikana.

³⁵M'bodzi wawo, nyakudziwisa wa Mwambo, toera kulesera Yezu, am'bvundza tenepa:

³⁶“Mpfundzisi, mbapi matongero makulu a Mwambo?”

³⁷[57]Yezu antawira kuti: “ ‘Funa Mbuya Mulungu wako na ntima wako onsene, na uunthu wako onsene, pontho na ndzeru zako zonsene.’

³⁸Awa ndiwo matongero makulu na akutoma, kupita onsene.

³⁹[58]Matongero aciwiri akulandana na akutoma ndi awa: ‘Funa ndzako ninga iwe ene.’

⁴⁰Mwambo onsene wa Mozesi na pipfundzo pya maporofeta pisabulukira n'kati mwa matongero mawiri awa.”

⁴¹Afarisi, pidagumanyikana iwo, Yezu aabvundza kuti:

⁴²“Kodi musanyerezera tani na thangwi ya Kirixtu? Ndi wa dzindza ipi?” Iwo antawira kuti: “Ndi mwana wa Dhavidhi.”

⁴³Yezu aabvundzisa pontho kuti: “Thangwi yanji mphapo iye ene Dhavidhi, pakulonga na Nzimu Wakucena, asancemera ‘Mbuya?’ Thangwi Dhavidhi alonga tenepa:

⁴⁴“[59]Mbuya alonga kuna Mbuya wanga kuti: ‘Khala ku nkono wanga wa madyo, mpaka panaikha ine anyamalwa ako pantsi pa manyalo ako.’

⁴⁵Na tenepo, ngakhala iye ene Dhavidhi asancemera ‘Mbuya’, anakhala tani pontho mwana wace?”

⁴⁶Penepo nkhabe munthu adakwanisa kuntawira cinthu. Kubulukira ntsiku eneyo kwenda kutsogolo, hadaonekabve tayu munthu akhali na cipapu ca kum'bvundzisa.