Read Cibverano Cipsa Cisena Mateu 24 Bible Online

Mateu 24 - Cibverano Cipsa Cisena bible

Mateu 24

¹Pa kubuluka Yezu mu Nyumba ya Mulungu, n'dzidzi ukhaenda Iye, anfendedzera dhuzi anyakupfundza ace toera kumpangisa kumangwa kudacitwa Nyumba ya Mulungu.

²Penepo Yezu aapanga kuti: “Musaona pyonsene ipi? Ndimo mwene, ndisakupangani kuti pano nkhabe kudza kasala mwala padzulu pa mwala undzace. Pyonsene pinamala gwisiwa.”

³Yezu akhakhala nawa pa phiri ya Mulivera, anyakupfundza ace anfendedzera mbam'bvundzisa pa khundu kuti: “Tipangeni, pinacitika lini pinthu penepi? Pontho ndi cidzindikiro canji cinafuna kudza kaoneka pakubwera kwanu, na pakumala kwa dziko?”

⁴Yezu aatawira tenepa: “Cenjerani! Lekani kunyengezwa na munthu.

⁵Thangwi azinji anati abwere na dzina yanga mbalonga kuti: ‘Ine ndine Kirixtu,’ pontho anati anyengeze anthu azinji.

⁶Imwe munadza kabva mbapilongwa pya nkhondo na mabvabva a nkhondo. Pilang'aneni, mbwenye lekani kugopa tayu, thangwi pisafunika kuti picitike tenepo, mbwenye si kumala kwa pinthu tayu.

⁷Thangwi dziko na dziko inadza kamenyana, pontho umambo na umambo unadza kamenyana. Kunaoneka njala na piteke-teke mu mbuto zizinji.

⁸Mbwenye pyonsene ipi ndi kutoma kwa nyatwa.

⁹“Na tenepo, imwe munadza kaoneswa nyatwa, mbamuphiwa. Munadza kaidiwa na anthu onsene na thangwi ya dzina yanga.

¹⁰Pa n'dzidzi unowu anthu azinji anadza kasiya kutawira Mulungu. Pontho mbadza kasandukirana na kuzondana m'bodzi na m'bodzi.

¹¹Na tenepo, anadza kabulukira maporofeta azinji a uthambi mbanyengerera anthu azinji.

¹²Na kuinjipa kwa uipi, kufunana kwa anthu azinji kunacepa.

¹³Mbwenye ule anapirira mpaka pa kumalisa, anapulumuswa.

¹⁴Na tenepo, Mphangwa Zadidi izi za Umambo wa Mulungu zinamwazwa pa dziko yonsene ya pantsi, toera zikhale ninga umboni kuna mbumba yonsene. Buluka penepo, inafika ntsiku ya kumalisa.”

¹⁵[62]Yezu alonga pontho kuti: “Imwe mungadza kaona cinthu cakugopsa cidalonga mporofeta Dhanyeli, mbacikhala pa Mbuto Yakucena mu Nyumba ya Mulungu - anaona mafala awa mbaabvesese -

¹⁶na tenepo, ale anagumanika mu Djudeya mbathawire ku mapiri.

¹⁷Ule anagumanika pa ntsoyi ya nyumba yace, mbaleke kuchita toera kubulusa cinthu cibodzi n'nyumba mwace.

¹⁸Pontho ule anagumanika ku munda, mbaleke kubwerera n'nduli toera akhakwate nguwo zace.

¹⁹Ana nyatwa ikulu ale anagumanika na pathupi, pontho na ale anayamwisa ntsiku zenezo!

²⁰Phemberani kuna Mulungu, kuti kuthawa kwanu kukhonde kucitika n'dzidzi wa khoni peno ntsiku ya Sabudu.

²¹Thangwi pa ntsiku zenezi, kunaoneka nyatwa ikulu kuti cipo idzati kuoneka, kutomera pakutoma kwa dziko mpaka n'dzidzi uno, pontho na lini inadza kaoneka pontho.

²²Ntsiku zenezi mbazidakhonda kugwandirwa, nkhabe m'bodzi akhafuna kupulumuka. Mbwenye na thangwi ya anyakusankhulwa, ntsiku zenezi zinati zigwandire.

²³Na tenepo, munthu angakupangani kuti: ‘Kirixtu ali pano!’ peno kuti: ‘Uyo ali kule!’ lekani kum'bvera.

²⁴Thangwi anadza kabulukira akirixtu a uthambi na maporofeta a uthambi, kuti anadza kacita pirengo pikulu na pinthu pyakudzumisa, toera pingakwanisika, anyengeze na ale ene anyakusankhulwa a Mulungu.

²⁵Lang'anani, ndakucenjezani pyonsene mbapidzati kucitika.

²⁶Na tenepo, mungapangiwa kuti: ‘Iye ali n'thando!’ Lekani kwendako! Peno mungapangiwa kuti: ‘Ali n'kati mwa nyumba!’ Lekani kupitawira.

²⁷Thangwi ninga njazi ingacetuma isaonekera kudzulu, kutomera kumabulukira dzuwa mpaka kumadokero, ndi sawa-sawambo na kubwera kunafuna cita Ine, Mwana wa Munthu.

²⁸Thangwi pale panagumanika cinthu ca kufa, penepo ndipo panagumanyikana malezi.”

²⁹“[63]Na tenepo, Yezu alonga kuti: Pakumala kwa nyatwa eneyo ikulu ya ntsiku zenezo, “ ‘dzuwa inaswipa, mwezi nkhabe kudza kagakabve, nyenyezi za kudzulu zinagwa, pontho mphambvu za kudzulu zinatekenyeka.’

³⁰“Penepo ndi panafuna kuoneka cidzindikiro kudzulu ca Ine Mwana wa Munthu. Madzindza onsene a pantsi anati alire, pontho anadza kaona Ine Mwana wa Munthu, mbandikhabwera padzulu pa makole a kudzulu, na mphambvu pontho na mbiri ikulu kakamwe.

³¹Na tenepo, Ine Mwana wa Munthu, pa kulira kaluta ndinadza katuma maanju anga, kuti agumanye anyakusankhulwa anga a makhundu manai a dziko, kutomera nkhomu ibodzi ya dziko, mpaka ku nkhomu inango.”

³²Yezu alonga pontho kuti: “Pfundzani nsanje wa muti wa nsambvu. Mungaona nthawi zace mbazigubudzika, masamba ace mbatoma kuphwikira, imwe musadziwa kuti malimwe ali dhuzi.

³³Tenepambo imwe, mungaona pinthu pyonsene ipi, dziwani kuti ali dhuzi, ali pa nsuwo.

³⁴Ndimo mwene ndisakupangani kuti pyonsene ipi pinacitika, anthu a midzidzi ino mbadzati kumala.

³⁵Kudzulu na pantsi panamala, mbwenye mafala anga nkhabe kudza kamala.

³⁶“Mbwenye pya thangwi ya ntsiku eneyo na n'dzidzi nkhabe munthu anapidziwa. Izo anju za kudzulu, peno Ine Mwana wa Munthu, nkhabe kupidziwa. Anapidziwa ndi Baba ekha basi.

³⁷Thangwi ninga pidacitika pa ntsiku za Nowa, pinacitikambo sawa-sawa pakubwera kwa Ine, Mwana wa Munthu.

³⁸Thangwi madzi makulu mbadzati kudzala, anthu akhadya, akhamwa, amuna akhacita mabanja, akazi akhaperekwa m'mabanja, mpaka ntsiku idapita Nowa mu arika.

³⁹Pontho, onsene amala kufa na madzi, thangwi nkhabe cinthu cikhadziwa iwo. Tenepa, Ine Mwana wa Munthu ndingabwera, pinacitikambo sawa-sawa.

⁴⁰Na tenepo, amuna awiri anagumanika mbakhalima m'munda, m'bodzi anakwatiwa, unango anasiyiwa.

⁴¹Akazi awiri anagumanika mbakhapeya pa libwe, m'bodzi anakwatiwa, unango anasiyiwa.

⁴²Na tenepo, lang'anirani, thangwi imwe nkhabe kuidziwa ntsiku ya kubwera kwa Mbuya wanu.

⁴³Mbwenye kumbukani kuti: Mbidakhala mwanacinthu nyumba asaudziwa n'dzidzi wa kufika kwa mbava, mbadalang'anira pontho mbadasiya tayu kuti mbava aswe nyumba yace.

⁴⁴Na thangwi eneyo, imwe khalanimbo akusasanyira. Thangwi n'dzidzi unakhonda imwe kudikhira, ndiwo unadza kafika Ine, Mwana wa Munthu.”

⁴⁵Yezu athimiza pontho na kulonga kuti: “Mbani mphapo nyabasa wakunyindirika na wa ndzeru, adaikhwa na mbuya wace kuti aonerere anyabasa andzace, toera kuapasa cakudya n'dzidzi ungakwana?

⁴⁶Mbatsandzaye nyabasa unowu anagumaniwa mbacita tenepa pakubwera kwa mbuya wace.

⁴⁷Ndimo mwene ndisakupangani kuti, mbuya wace anadza kan'nyindira kuti aonere mpfuma yace yonsene.

⁴⁸Ndiye tani mphapo nyabasa uyu angakhala wa kuipa, mbalonga ekha ene kuti: Mbuya wanga ali kudembuka,

⁴⁹mbatoma kumenya anyabasa andzace, mbadya pontho mbamwa pabodzi na anyakuledzera?

⁵⁰Penepo, mbuya wace anadza kabwera ntsiku inakhonda iye kun'dikhira, pa n'dzidzi unakhonda iye kudziwa.

⁵¹Iye anamuonesa nyatwa, mbamponya m'mbuto ibodzi ene na anyauthambi. Mwenemu anati alire na kugeda-geda mano.”