Read Cibverano Cipsa Cisena Mateu 5 Bible Online

Mateu 5 - Cibverano Cipsa Cisena bible

Mateu 5

¹Yezu na kuona mwinji wa anthu, akwira pa phiri mbakhala pantsi. Penepo, anyakupfundza ace anfendedzera.

²Yezu atoma kuapfundzisa mbalonga tenepa:

³“Mbatsandzaye ale anyakucherenga mu nzimu, thangwi Umambo wa kudzulu ndi wawo.

⁴Mbatsandzaye ale analira, thangwi anadza kamatamizwa na Mulungu.

⁵Mbatsandzaye ale anyakupicepesa, thangwi anadza kapasiwa unthaka wa dziko ya pantsi na Mulungu.

⁶Mbatsandzaye ale ana njala na nyota ya kucita kufuna kwa Mulungu, thangwi anadza kapasiwa pyonsene na Mulungu.

⁷Mbatsandzaye anabvera andzawo ntsisi, thangwi iwo anadza kabverwambo ntsisi na Mulungu.

⁸Mbatsandzaye anyakucena ntima, thangwi iwo anadza kaona Mulungu.

⁹Mbatsandzaye ale anasaka ntendere pakati pa anthu, thangwi iwo anadza kacemerwa ana a Mulungu.

¹⁰Mbatsandzaye ale anazondiwa na thangwi ya kucita kufuna kwa Mulungu, thangwi Umambo wa kudzulu ndi wawo.

¹¹“Tsandzayani mungatikanwa, mungazondiwa, na kulongerwa uthambi wa kusiyana-siyana na thangwi ya kukhala anyakupfundza anga.

¹²Komerwani mbamudzala na kutsandzaya, thangwi muwoni wanu unakudikhirani kudzulu ndi ukulu. Thangwi maporofeta akale azondiwambo sawa-sawa ninga imwe.”

¹³“Imwe ndimwe munyu wa padziko. Lang'anani, munyu ungasuluka, unadza kadzipa tani pontho? Na tenepo, unamalisira taiwa, thangwi nkhabe cinango cakucita na iwo, mbumalisira kupwandiwa na anthu.

¹⁴“Imwe ndimwe cieza ca padziko. Nzinda udamangwa pa phiri nkhabe kubisalika.

¹⁵Pontho nkhabe munthu anagasa nyale yace mbaigudumira na citundu. Mbwenye anasaka mbuto ya padzulu toera kumwanikira mwadidi anthu onsene n'kati mwa nyumba.

¹⁶Sawa-sawa ninga imwembo, citani kuti cieza canu cimwanikire anthu onsene, toera aone mabasa anu adidi anacita imwe. Na tenepo, iwo anapasa mbiri Baba wanu ali kudzulu.”

¹⁷“Lekani kunyerezera kuti ndadza kamalisa mwambo wa Mozesi peno cipfundzo ca maporofeta akale. Sidadza kamalisa penepyo tayu, mbwenye ndadza kasimbisisa.

¹⁸Pontho dziwani kuti n'dzidzi uno unagumanika thambo na mataka, nkhabe cinthu cibodzi cing'ono n'kati mwa malemba, peno cidzindikiro cinango ca malemba cinafuna kubuluswa pa Mwambo wa Mozesi, pyonsene mbapidzati kucitika.

¹⁹Na thangwi eneyo, ule anakhonda kubvera mwambo, peno mbudakhala pyawo ung'ono tani, mbapfundzisambo andzace kucita pibodzi-bodzi, munthu unowu anaoniwa wang'ono mu Umambo wa kudzulu. Mbwenye ule anabvera mwambo na kupfundzisa andzace kucita pibodzi-bodzi, anakhala nkulu mu Umambo wa kudzulu.

²⁰Pontho ndisakupangani kuti, imwe mungakhonda kucita mbamutoweza kufuna kwa Mulungu kupiringana anyakudziwisa a Mwambo wa Mozesi na afarisi, nkhabe m'bodzi anafuna kudza kapita mu Umambo wa kudzulu.”

²¹“[15]Imwe mwabva pikhadalongwa kuli akulu anu akale kuti: ‘Leka kupha munthu.’ Ule anapha munthu, anatongwa.

²²Mbwenye Ine ndisakupangani kuti munthu onsene anaipirwa na ndzace,[16] anatongwa. Ule anatikana ndzace, anatongwa, pontho ule anacemera ndzace ‘dzemwa,’ asatongwa kwenda mu moto wa infernu.

²³“Na tenepo, ngakhala iwe uli pa guwa ya ntsembe toera kupereka muwoni wako kuna Mulungu, penepo ungakumbuka kuti ndzako m'bodzi ana thangwi na iwe,

²⁴siya muwoni wako pa guwa ya ntsembe, ndoko pakutoma ukhasekesane na iye. Ungamala, bwerera ukhapereke muwoni wako kuna Mulungu.

²⁵“Pontho pa n'dzidzi unaenda iwe katongwa pabodzi na ndzako, saka kusekesana na mwansanga na nyamalwa wako, toera iye akhonde kukupereka m'manja mwa nkulu wa nyakutonga, iye mbakuperekambo m'manja mwa nsupai wace, mbufungirwa n'kaidi.

²⁶Ndimo mwene ndisakupanga kuti iwe nkhabe kudza kabuluka mwenemu mbudzati kumalisa kulipa mangawa ako onsene.”

²⁷“[17]Imwe mwabva pidalongwa kuti: ‘Leka kucita upombo.’

²⁸Mbwenye Ine ndisakupangani kuti: Munthu onsene analang'ana nkazi mbansirira, n'dzidzi unowu ali kucita upombo na iye muntima mwace.

²⁹Mphapo, ngakhala diso yako ya khundu ya madyo iri kukugwisa mwa kudawa, ibuluse mbuitaya kutali na iwe. Thangwi mphyadidi kuluza phindi ibodzi ya manungo ako, mbukhonda kuponyiwa manungo onsene mu infernu.

³⁰Sawa-sawa, ngakhala manja ako a khundu ya madyo asakugwisa mwa kudawa, agwande mbuataya kutali na iwe. Thangwi mphyadidi kuluza phindi ibodzi ya manungo ako, mbukhonda kuponyiwa manungo onsene mu infernu.”

³¹“[18]Pyalongwambo pontho kuti: ‘Mamuna onsene anakhonda nkazi wace, asatongwa kumpasa tsamba ya kumwalana.’

³²Mbwenye Ine ndisakupangani kuti: Mamuna onsene anamwalana na nkazi wace, thangwi yace mbikhonda kukhala ya lukwali, ali kum'pfundzisa upombo. Mphapo mamuna onsene anacita banja na nkazi wa kumwaliwa, ali kucitambo upombo na iye.”

³³“[19]Pontho imwe mwabva pidapangwa akulu anu akale kuti: ‘Leka kudumbira papezi, mbwenye usatongwa kucita pidadumbirira iwe pamaso pa Mbuya.’

³⁴Mbwenye Ine ndisakupangani pontho kuti: Siyani kudumbira konsene. Lekani kudumbira na dzina ya kudzulu, thangwi ndi mpando wa Umambo wa Mulungu.

³⁵Peno na dzina ya pantsi, thangwi ndipo panaikha iye myendo yace. Peno na dzina ya Djerusalema, thangwi ndi nzinda wa Mambo wa nkulu.

³⁶Pontho leka kudumbira na dzina ya nsolo wako, thangwi unacimwana kusanduza tsisi ibodzi mbidza yakuswipa, peno mbidza yakucena.

³⁷Mbwenye mphyadidi kulonga tenepa: ‘Ande’, ‘ande’. ‘Nkhabe’, ‘nkhabe’. Pyonsene pinango kupiringana penepi, mphya Nyamalwa.”

³⁸“[20]Mwabva pidalongwa kuti: ‘Diso na diso, dzino na dzino.’

³⁹Mbwenye Ine ndisakupangani kuti: lekani kubwerezera uipi kuli ale anakucitani uipi. Munthu angakumenya ku phutu ya khundu ya madyo, mpase akumenyembo khundu inango.

⁴⁰Munthu angafuna kukusumira kwa atongi toera akupokosere kamiza, mpase pontho kazako yako.

⁴¹Munthu angakukakamiza kufamba na ntolo nsindzo ubodzi, famba na iye pontho misindzo miwiri.

⁴²Munthu anakuphemba cinthu, mpase. Munthu anafuna kukubwereka cinthu, leka kumpasa nkhodolo.”

⁴³“[21]Imwe mwabva pidalongwa kuti: ‘Funa ndzako, mbwenye ida nyamalwa wako.’

⁴⁴Mbwenye Ine ndisakupangani kuti: Funani anyamalwa anu, phembererani ale anakuzondani.

⁴⁵Na tenepo, munakhaladi ana a Baba wanu wa kudzulu. Thangwi iye asagasira dzuwa yace anyakuipa na adidi, pontho asabvumbira anyakulungama na anyakukhonda kulungama.

⁴⁶Thangwi mungafuna ale anakufunani basi, munapaswa m'bairo wanji na Mulungu? Anyakukumbusa misonkho asacitambo pibodzi-bodzi.

⁴⁷Pontho, mungamwanyika abale anu basi, ndi ninji pinacita imwe kupiringana anango? Penepyo ndi pinacitambo ale anakhonda kutawira Mulungu.

⁴⁸Na tenepo, imwe khalani akukwana, ninga Baba wanu wa kudzulu ndi wakukwana.”